1 Abatuki 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Solomooni asaba Nasaae amube amakesi

¹ Solomooni yataao obuhoonyani neende omutuki wa Misiri naabitira mu hudeehya omuhaana wae. Solomooni yamuleeta ohumenya mu Siko sya Daudi ohwoola lu mweene yamala ohwoombaha edooho lyae, Enyuumba ya Nasaae neende esida ohwebodoohania Yerusalemu.

² Enyuumba ya Nasaae yali niyisisiiri ohwoombahirwa Omwaami, mani abaandu bali nibasiyaaniraanga ebiyaanwa byaabwe hu alutaari chikabuhaane.

³ Solomooni yali yaheera Omwaami muno haandi naalondakanaanga sa neende ebilagiro bya Daudi laatang'ene, nae kata katyo yasinjaanga ebisolo mani naamala naabiyaana koti ebiyaanwa hu alutaari chikabuhaane.

⁴ Ludaalo luundi yaachia mu Gibbeoni ohuyaana ebiyaanwa olwohuba eyo niyo eyali alutaari yali ni yihiramo ohumanyihana. Haandi yali niyamala ohuyaaniraanga hooyo ebiyaanwa bisaambwa ebiyera obuhumi neende obuhumi hale.

⁵ Mani mu siro syeene esyo, Omwaami yaamubonehera mu silooto, yaamuteeba ati, “Siindu siina syeene si wahadahire ese huberese?”

⁶ Nae Solomooni yakobolamo ati, “Ewe wali niwalumirira ohweekesaanga obuheeri buhunuufu eyiri Daudi laata yaange, owali omuhalaabani wao, haandi owali omulai muno, omutiiririrwa yooli, haandi owali omweesikwa mu lwiiho lwae naawe. Mani haandi ewe wemeedere sa ohumweekesaanga obuheeri bwao buhunuufu haandi obw'olubeerera noobitira mu humuberesa omwaana musyaani oli bulaanu buti ohutuka mu bweyaango bwae.

⁷ Eee, Omwaami Nasaae, ewe niiwe owanyalira ndaanyala ohukerama laata yaange koti omutuki, kata neende ni ndi omuyere muno haandi otaamanyire ohutuka bulai.

⁸ Bulaanu ese mbano ndi ano mu baandu ba wamala ohulobola oti nibo ababa babe abao beene, abaandu abaangi muno, abatahanyala ohubalwa daawe.

⁹ Mani sakira ewe mberese sa amakesi kahoyeere ohutukiramo abaandu bao bano ninjakanirisa haandi niinyala ohumanyaanga engabula yiba niyiriwo akatikaati w'esilai neende esyonoono. Ataali ao, ese naange mba njia ohunyala endye ohutuka abaandu bao bahunuufu bano?”

¹⁰ Omwaami yasangaala muno ohubona ati Solomooni yasaba sino,

¹¹ mani yaamuboolera ati, “Olwohuba ewe onyalire ohusaba amakesi ak'ohutuka n'otakwiira olwaande lwoosi, ataali ohwedahisa omweene obulamu buleeyi muno, kata sa emyaandu, kata sa ohufwa hw'abasuku bao daawe,

¹² mani ese njia ohuhola koti lu osabire. Njia ohuhuberesa amakesi kahira hoo, haandi neende ohumanya huungi muno ebihira bi buli muundu yeesi yali hooho nabyo enyuma eyo, kata sa neende byaalinyala ohuba nabyo hooho yi bwiicha eyo.

¹³ Ese haandi njia ohuhuberesa kata neende esyo syotabeere niwuusabire, mu bulamu bwao bwoosi ochia ohubechaanga neende emyaandu alala neende oluyaali, ebihira eby'omutuki wasyo wuundi.

¹⁴ Haandi n'ochia ohuumbuliraanga, mani onyale ohwooseresaanga amalako kaange, neende ebilagiro byaange, koti lu Daudi lataao yaholaanga, ese mba njia ohuhuberesa obulamu buungi.”

¹⁵ Solomooni yasimuha mani yaamanya ati hane, Nasaae abereenge naalomaloma nae naali mu silooto. Yeemao yaachia mu Yerusalemu yeema mu moni w'Esanduuku ly'Endagaano ly'Omwaami, mani yaamala yayaana ebiyaanwa bisaambe, haandi neende ebiyaanwa by'ohukobola alala eyiri Omwaami. Esyo nisyawa, yatekehera abahoongo bae boosi esidyaalo.

Solomooni akaya omusaango mudinyu

¹⁶ Ludaalo luundi, abahasi bacheke babiri beemao beecha beema mu moni w'Omutuki Solomooni.

¹⁷ Mulala hu beene abo yaboola ati, “Ow'Oluyaali, omuhasi wuno neende ese mweene hwamenya mu nyuumba ndala, ese ndeecha ndeebula omwaana musyaani ango ao nataaliwo.”

¹⁸ Endaalo chibiri nichaabitao omwaana waange n'amalire ohwiibulwa, yesi yeecha yeebula omwaana musyaani yesi. Efwe fweembi fweeng'ene niifwe abali nihuli mu nyuumba omwo, abulao omuundu yeesi owuundi owali naaliwo daawe.

¹⁹ Mani esiro siindi yeecha n'atamanyire yeekaluuhania yafwiinyirira omwaana wae, yaamala yaamubwiihaho bulai sa.

²⁰ Yasiingira esiro akati mani yaatusa omwaana waange mu lubafu waange ningona, naamuta mu lubafu wae, naamala ata omwaana wae mufu mu lubafu waange.

²¹ Nindasimuha echuli ohunuunia omwaana waange, ndesiinduha ohumubona n'afwiire. Nae nindamwehaliirisa bulai, ndabona endi haba siyali omwaana waange mweene yi ndeebula.

²² Nae omuhasi wuundi wula yaboola ati, “Haba! Omwaana ofwiire niye owao, nae omulamu niye owaange!” Mani bayiinganira mu moni w'Omutuki batyo.

²³ Mani Omutuki Solomooni yaboola ati, “Buli mulala hweeng'we ali ohubolaanga ati omwaana mulamu wuno niye owae, haandi eno muti omwaana ofwiire niye ow'owaasye.”

²⁴ Solomooni yeemao yaasaba bamuleetere olugaanga, mani nibamuleetera olugaanga,

²⁵ yaboola ati, “Yatemo omwaana mulamu oyo ebituundu bibiri mani mukabe buli muhasi esituundu syae.”

²⁶ Nae, ng'ina mwaana mweene oyo yakobola mu mutuki oyo neende obuheeri buungi ati, “Nookanya Ow'Oluyaali, beresa sa omuhasi oyo omwaana mulamu oyo, nae otamwiita daawe.” Nae omuhasi wuundi wula yaboola ati, “Mutaberesaho mulala hweefwe daawe; mumwaatemo sa mutukabanie.”

²⁷ Mani omutuki oyo yakobolamo yaboola ati, “Bukule omwaana mulamu oyo muberese omuhasi otangiire, mutamwiita daawe, olwohuba niye ng'ina wadyeeri.”

²⁸ Mani Yisiraeli yoosi ayaakiriire niyawulira eheenga eyo yi Mutuki yali n'aholere, batya muno omutuki oyo, olwohuba babona bati amakesi ka Nasaae kali nikamulimo nikamunyalira ohuhola obuhoyera.