1 Abatuki 19 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Elija naali hu Lugulu Sinai

¹ Omutuki Ahabbu yaboolera Yesebbeeli omuhasi wae buli siindu syosi si Elija yali naaholere haandi koti lu yeeta abanabbi ba Bbaali boosi.

² Yaatuma emboosi eyiri Elija eyiboola yiti: “Banasaae bahoya baanjitirao, nikali mbwe muchuli esaa cheene chiti nitahuhola esiindu sy'oholere abanabbi bala.”

³ Elija yeemao yaatya muno, mani yeyiruhira; yabukula omuhalaabani wae mani baachia mu Bberisebba mu Yuda. Niyamala ohuleha omuhalaabani wae ebweene eyo,

⁴ Elija yakeenda oludaalo lwoosi mu sichiimi. Yeehala aasi mu siiniha sy'omusaala mani yekoomba ati afwiire abweene ao. Yasaba yaboola ati, “Bino bibitiirifu, ewe Omwaami. Maya sa akaanjita fwe; ngandi ndi sa koti omuundu owamala ohufwa!”

⁵ Yakona mu siiniha sy'omusaala okwo endoolo chaamuyira. Nae abweene ao, malaika yamudiiraho yaboola ati, “Ewe simuha olye.”

⁶ Yewuunja yebodoohania emoni, mani yaabona omugaati alala neende enjaagi yirimo amaachi nibiri aambi neende omutwe kwae. Yalya haandi yaang'wa, yaamala yaakona abweene ao.

⁷ Malaika w'Omwaami haandi yaakobola, yaamusimusa ehabi lyohubiri, n'aboola ati, “Ewe simuha mani olye, ataali ao, olukeendo luchia ohuhubitiirisa.”

⁸ Elija yasimuha, yaalya haandi yaang'wa, mani ebyohulya ebyo byamuberesa amaani akamunyalira ohukeenda hu mbaka y'endaalo amahumi kane naachia hu Sinai.

⁹ Abweene ao niwo yi yachiira yeengirira mu ng'uungu ati amalire omwo esiro syoosi. Abweene ao haandi Omwaami yalomaloma nae, n'aboola ati, “Ewe Elija, siina syeene sy'oli ohuholaanga ano?”

¹⁰ Nae yakobolamo ati, “Ewe Omwaami, Nasaae w'Obunyala bwoosi, ese ndamenya nihuhalaabaniraanga endaalo choosi, ewe sa weeng'ene. Nae abaandu ba Yisiraeli bamala ohuhalaka endagaano yaabwe naawe, nibalikula nibakwiisa alutaari chao aasi, haandi nibeeta abanabbi bao boosi. Ese syeeng'ene niise owadoong'ao, haandi mbao syeesi bali ohungiiya ohuunjita!”

¹¹ Omwaami nae yamuboolera ati, “Ewe tula erwaanyi ochie weeme mu moni waange aakulu w'olugulu.” Omwaami yeeha yachaaka ohubitaanga aambi nae n'ataangira ohuleeta okuyaka okw'amaani okwanyala ohwaataniamo engulu haandi kwasaasakula enyaanda. Nae Omwaami mweene siyaba mu kuyaka okwo. Omuyaka okwo kwaakama ohuwuucha, mani musisi yakwaao, nae haandi Omwaami haandi haba siyali mu musisi omwo.

¹² Luunyuma lwa musisi ohuwa, omuliro nikwo okweecha mani kwatubuha nae Omwaami haba siyali mu muliro okwo. Haandi omuliro nikwasima, ekono ediidi elimoonyesa lyawuliirihana.

¹³ Mani Elija niyaliwulira, yebwiiha mu bweeni neende eganjuula lyae mani yaatula erwaanyi yeema mu siruwa sy'eng'uungu eyo. Ekono elyo lyamuboolera liti “Ewe Elija, siina syeene syooli ohuhola ano?”

¹⁴ Nae yakobolamo ati, “Omwaami Nasaae ow'Obunyala bwoosi, ese huhalaabaniraanga buli olubeerera niiwe weeng'ene sa. Nae abaandu ba Yisiraeli bamala ohuhalaka endagaano yaabwe naawe, haandi balikula alutaari chao choosi, haandi beeta abanabbi bao boosi. Ese syeeng'ene niise odoong'ereo, haandi mbano bali ohungiiya ohuunjita syeesi.”

¹⁵ Omwaami yeemao yaboola ati, “Ewe kobolayo sa mu sichiimi esiri aambi neende Damasiko, mani wiingire mu siko omwo, mani haandi ochuhe amafuta hu Hasaeli nomwiihasa ohuba omutuki wa Siria;

¹⁶ haandi chuha amafuta hu Yehu omwaana wa Nimusi n'omwiihasa ohuba omutuki wa Yisiraeli, haandi ochuhe amafuta hu Elisa omwaana wa Safati ohutula hu Abbeli-Mehola n'omuhola ohukobola mu makulu kao ohuba omunabbi.

¹⁷ Mani oyo yeesi onyala ohwebalula ohwiitwa neende Hasaeli aba achia ohwiitwa neende Yehu, haandi oyo yeesi owebalula ohwiitwa neende Yehu, aba achia ohwiitwa neende Elisa.

¹⁸ Kata katyo njia ohulehao abaandu bayera elifu chitaanu-na-chibiri (7,000) ohuba abalamu mu Yisiraeli yoosi ayakiriire, abo boosi abanjisamo oluyaali haandi abatenamiraho Bbaali haandi kata sa ohukwa mu sirifu sy'esiloongwaloongwe syae syoosi.”

Ohulaangwa Hwa Elisa

¹⁹ Elija yanyoola Elisa naali ohulimyaanga omukaanda kw'eng'oombe endaawu; kyali emikaanda ehumi neende mulala n'akimiise mu moni wae, nae yali naali ohulimyaanga omukaanda mulala okwali nikumaliriihe enyuma. Elija yefwaalulamo eganjuula lyae yalifwaasa Elisa.

²⁰ Elisa yesi yalehuula endaawu chae echio, mani yaatimuha embiro yaloonda Elija, mani yaamuboolera ati, “Ewe leha mberi njie ngwe laata yaange mu sirifu neende mu maama nimbaseebula hu nyemeo njiche mbweo naawe.” Elija nae yakobolamo ati, “Esyo syabweene, ewe kobolayo. Ese haba siindi ohuhukaira daawe!”

²¹ Bulaanu Elisa yakobolayo eyiri omukaanda kw'endaawu chae, mani n'achiita choosi, n'adeeha enyama yachio, niyehoonyera amakadi koti eehwi ch'omuliro kudeeha. Yakaba abaandu enyama echio baalya baayimalirana. Mani yeemao yaachia yaloonda Elija, yaaba omuloobera wae.