1 Abatuki 17 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Elija neende esiminyu

¹ Omunabbi wuundi olaangwa Elija, ohutula Tisibbe mu Gileadi, yaboolera Omutuki Ahabbu ati, “Mu liita ly'Omwaami, Nasaae mulamu wa Yisiraeli, yi halaabaniraanga, ndi ohuhuboolera endi siyicha hubaao olume kata efula ohukwaho hulw'emyaaka kibiri oba kidatu emilaamba ekiicha mu moni eyo, ohwoolera elalira lu ndahaboole endi bibeeo.”

² Mani Omwaami yaboolera Elija ati,

³ “Ewe tula ano ochie ebukwe weekise aambi neende etale lya Keriti, ebukwe wa Yorodaani.

⁴ Etale elyo nilyo elichia ohuhuberesaanga amaachi k'ohung'wa, haandi malire ohulagira amabburuuku ohuhuleeteraanga ebyohulya ebweene eyo.”

⁵ Elija yafukiirira esilagiro sy'Omwaami esyo, mani yaachia yaamenya aambi neende etale lya Keriti.

⁶ Yang'wechaanga amaachi katula hu tale elyo, nae amabburuuku kamuleeteraanga emigaati neende enyama buli chuli neende buli ngoloobe.

⁷ Luunyuma lw'esiha esidiidi hooho, etale elyo lyoomerera hulw'efula ohutakwichaangaho.

Elija neende omuhasi mufwiirwe owali mu Sarefaati

⁸ Omwaami yaboolera Elija ati,

⁹ “Ewe bulaanu, siingira ochie mu siko sya Sarefaati, aambi neende Sidoni, mani omenye ebweene eyo. Ese mbao ndagiire omuhasi mufwiirwe owamenya ebweene eyo ohuhulisaanga.”

¹⁰ Mani Elija yaachia mu Sarefaati, mani koti lu yali aambi ohwola hu siruwa sy'esiko esyo, yabona omuhasi mufwiirwe naali ohutenyaanga eehwi. Yaboolera omuhasi oyo ati, “Nookanya, ndeetereho amaachi k'ohung'wa.”

¹¹ Mani koti lu yali hwaachia ohumuleetera amaachi ako, haandi yalaanga n'aboola ati, “Ewe haandi nookanya, ndeetereho neende omugaati kwosi.”

¹² Nae omuhasi oyo yamukobolamo ati, “Mu liita ly'Omwaami mulamu, Nasaae wao, ndeelaira endi haba siindiho neende omugaati kwoosi. Siindi nasyo syoong'ene, nisyo oluyu lulala olw'obusye obuli mu bbakuli, haandi neende etoonde lala ely'amafuta k'emiseituuni akali mu jaagi. Ese mbeere njichire ano ohudooberesaho otuhwi njire engo, mani nyale ohudeehaho ahadiidi haandi naho hulw'omwaana waange naange. Esyo nisyo esibeere sichia ohuba esyohulya syeefwe siheneerehayo, mani humale hufwe oluwoongera.”

¹³ Elija nae yamuboolera ati, “Ewe otadeebayo daawe. Chia sa mu moni mani odeehe esyohulya syao esyo. Nae taangira mberi ohole omugaati mudiidi okunyala ohutula mu busye bwooli nabwo mani omale okuleete ano yi ndi, mani haandi hwoomale ochie odeehe ebidoong'ereyo ebyeeng'we mweembi, ewe neende omwaana wao oyo”.

¹⁴ Olwohuba sino nisyo si Omwaami, Nasaae wa Yisiraeli ali ohuboola ati: “Ebbakuli eyo haba siyichia hwoomerera ohuwaaho obusye daawe, kata sa enjaagi yosi haba siyichia hwoomerera ohuwaaho amafuta daawe oludaalo lu ese mweene Omwaami, njia ohunyala ohuleeta efula nilutoola.”

¹⁵ Omuhasi mufwiirwe oyo yachia mani yaahola sa koti lu Elija yali naamuboleere, mani boosi alala baanyala ohunyoola ebyohulya bibaera hulw'endaalo enyiingi muno.

¹⁶ Mani koti sa lu Omwaami yali nasubiise ohubitira mu Elija, ebbakuli eyo haba siyanyala ohwoomerera ohuwaamo obusye daawe, kata sa neende enjaagi eyo yosi haba siyanyala ohwoomerera yawaamo amafuta daawe.

¹⁷ Luunyuma hooho, omwaana w'omuhasi mufwiirwe oyo yalwaala; Yemedaanga sa ohuhiraana, mani luunyuma yaafwa.

¹⁸ Omuhasi wuno yachia yaboolera Elija ati, “Muundu wa Nasaae ewe, lwasiina wuuholeere sino siti? Ewe hane weecha ano onyale ohwiichulisa Nasaae ebidiira hu byonoono byaange mani hu oleetere omwaana waange afwe?”

¹⁹ Elija nae yaboola sa ati, “Ewe mberese omwaana oyo.” Elija yabukula omwaana oyo yaamutusa mu mahono k'omuhasi oyo, yaamukiinga yaamuniinia mu goroofa mu siseenge si yali niyamenyamo, mani yamwaalisa hu buliri bwae.

²⁰ Yachaaka ohusaba Nasaae neende ekono hoongo ati, “Ewe Omwaami, Nasaae waange, siina syeene esikerere waaholera omuhasi mufwiirwe wuno esiindu silulu siti? Yabeere niyangwiira esisa muno ohuniinda ati, nihaandi naawe wiita sa omwaana wae oti!”

²¹ Mani Elija yeecha yelambiisa hu mwaana oyo amahabi kadatu mani naamala naasaba haandi ati, “Ewe Omwaami, Nasaae Waange, kobosa obulamu mu mwaana wuno!”

²² Omwaami yeemao yaakobola mu saala ya Elija eyo; mani omwaana oyo yachaaka ohuyeera yaalamuha.

²³ Elija yeemao yaabukula omwaana oyo yamwiisa engaasi yaamukobosera ng'ina mani yaamuboolera ati, “Ewe bonaho, omwaana wao wuno nga nguno ali omulamu!”

²⁴ Omuhasi oyo nae yakobolamo ati, “Bulaanu ese ndahamanyira elalira endi ewe hane oli omuundu wa Nasaae, haandi endi Omwaami hane alomalomeraanga mweewe!”