1 Abatuki 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Omwaami yalomalomera omunabbi Yehu omwaana wa Hanani yaamuberesa emboosi yino eya Bbaasa:

² “Ewe wali notaaliho omuundu daawe. Nae bulaanu omalire ohwonoona koti sa Yerobboamu haandi waayira abaandu baange wabeengisa mu syonoono. Mani ebyonoono byaabwe nibyo ebisaanguluuse etima lyaange.

³ Mani sakira njia ohuhumalao, haandi neende edaala lyao, koti sa lu ndahola Yerobboam.

⁴ Abaandu boosi abomu daala lyao abachia ohufwiraanga mu siko, bachia ohulibwaanga neende embwa, haandi abo boosi abachia ohufwiraanga mu syaalo siyanjaafu, bachia ohulibwaanga neende engosya.”

⁵ Mani buli siindu syoosi si Bbaasa yahola, neende ebiholwa by'obululu byae byoosi byandiikwa mu sitabo sya Ebyaliwo eby'Abatuki ba Yisiraeli.

⁶ Bbaasa yaafwa, yasiihwa mu Tirisa, mani Ela omwaana wae yaanyala ohumukobola mu makulu koti omutukii.

⁷ Emboosi eyo eyatula eyiri Omwaami eyidiira hu Bbaasa alala neende edaala lyae yaleetwa neende Yehu omunabbi hulw'ebyonoono bi Bbaasa yaholera Omwaami. Yasaangulusa etima ly'Omwaami ataali ohuba sa mbwe hulw'ebibi bi yahola, koti sa lu Omutuki Yerubboamu yali yahola hale wuno natabaao, nae haandi olwohuba mbwe yeeta edaala lya Yerobboamu lyoosi pe.

Omutuki Ela owa Yisiraeli

⁸ Mu mwaaka kw'amahumi kabiri neende kisaasaba, eky'obutuki bw'Asa owa Yuda, Ela omwaana wa Bbaasa yaba omutuki wa Yisiraeli, mani yaatukira mu Tirisa hulw'embaka y'emyaaka kibiri (2).

⁹ Simuri, mulala hu bahoongo bae owali niye ofunaanibwa hu situundu sy'ebigaari by'omutuki, Ela yali nameereraanga mu daala lya Arisa, owali ofunaanibwa mu dooho lyoosi.

¹⁰ Simuri yeengira mu nyuumba, yaniega sa Ela, mani yaamala yaamukobola mu makulu koti omutuki. Sino syakwaao mu mwaaka kw'amahumi kabiri neende kitaanu-na-kibiri okw'obutuki bw'Omutuki Asa owa Yuda.

¹¹ Bwaangu bweene bu Simuri yehasirwa ohuba omutuki, yachia yeeta abaandu boosi abomu daala lya Bbaasa. Buli mwiiho w'esisaacha, kata sa omwiicha, yeetwa sa.

¹² Mani katyo, ohuloondakana neende bi Omwaami yali yaboola ebichooma Bbaasa ohubitira mu munabbi Yehu, Simuri yasihirisa edaala lyoosi elya Bbaasa.

¹³ Ohweema hu hwiinamiraanga ebiloongaloongwe hwaabwe, haandi ohweema hu huyira Abaisiraeli babeengisa mu syonoono, Bbaasa neende Ela omwaana wae, banyala ohusaangulusa etima ly'Omwaami, Nasaae wa Yisiraeli.

¹⁴ Mani buli siindu syoosi si Ela yahola syandiikwa mu sitabo sya Ebyaliwo by'Abatuki ba Yisiraeli.

Simuri omutuki owa Yisiraeli

¹⁵ Mu mwaaka kw'amahumi kabiri neende kitaanu-na-kibiri eky'obutuki bwa Asa owa Yuda, Simuri yatukiraanga Yisiraeli mu Tirisa ohumala embaka y'endaalo chitaanu-na-chibiri. Amaye ka Yisiraeli kali nikawaamba Esiko sya Gibbetooni mu Filisiti,

¹⁶ bawulira bati Simuri amalire ohuhoba omutuki haandi amalire neende ohumuniega, abweene ao bosi bachaaka ohulaangirira bati omuhoongo wali owaabwe olaangwa mbwe Omuri ohuba niye omutuki wa Yisiraeli.

¹⁷ Omuri neende eye lyae elyo baleha Gibbetooni mani baachia baamba Tirisa.

¹⁸ Mani Simuri niyabona ati esiko esyo simalire ohukwa, yachia yeengira mu lukoba lw'ematyeelo bweene ow'edooho, mani yaambya omuliro hu dooho, mani yafwiira mu muliro bweene omwo.

¹⁹ Sino syeehola sityo ohweema hu bibi byae eyiri Omwaami. Koti sa lu Yerobboamu omutuki yi yakobola mu makulu yali niyanyoolesa Omwaami neende ebyonoono byae omweene, haandi neende ohuyiraanga Yisiraeli yiingira mu syonoono.

²⁰ Buli biindu byoosi bi Simuri yahola, n'omeedaho neende olukano ludiira hu huhoba hwae, byandiikwa mu sitabo sya Ebyaliwo by'Abatuki ba Yisiraeli.

Omuri omutuki owa Yisiraeli

²¹ Abaandu ba Yisiraeli bali nibakabuhanamo, abaandi badahaanga ohuhola Tibbuni omwaana wa Ginati omutuki, nae abaandi bali nibakwiira Omuri.

²² Muhumaliiriha, abo abali nibakwiira Omuri bahira; Tibbuni yafwa, mani Omuri yeehola omutuki.

²³ Mu mwaaka kw'amahumi kadatu neende mulala okw'obutuki bwa Asa owa Yuda, Omuri yeehaswa ohuba omutuki wa Yisiraeli, mani yaatuka embaka y'emyaaka ehumi neende kibiri. Emyaaka kisaasaba kyataangira yatukiraanga mu Tirisa,

²⁴ yakula esigulu sya Samaria hu bituundu by'efeesa elifu chisaasaba (6,000) ohutula hu musaacha olaangwa mbwe Semeeri, mani yaalulaanga ati Samaria, ohutulana neende Semeeri, owali hale omweene lugulu luno

²⁵ Omuri yonoona eyiri Omwaami muno ohuhiraho owatukaho hale n'ateecha.

²⁶ Koti sa Yerobboamu owaliwo hale, yesi yasaangulusa etima ly'Omwaami, Nasaae wa Yisiraeli, hulw'ebyonoono byae haandi olw'ohuyira abaandu mu syonoono neende ohwiinamiraanga ebiloongaloongwe.

²⁷ Ebiindu biindi bi Omuri yahola alala neende bi yanyala ohwooseresaho byandiikwa mu sitabo sya Ebyaliwo by'Abatuki ba Yisiraeli.

²⁸ Omuri yafwa mani baamusiiha mu Samaria, mani Ahabbu omwaana wae yaamukobola mu makulu koti omutuki.

Ahabbu omutuki wa Yisiraeli

²⁹ Mu mwaaka kw'amahumi kadatu neende kitaanu-na-kidatu okw'obutuki bwa Asa owa Yuda, Ahabbu omwaana wa Omuri yeehaswa ohuba omutuki wa Yisiraeli, mani yaanyala ohutukira mu Samaria ohumala embaka y'emyaaka amahumi kabiri neende kibiri.

³⁰ Yeecha yonoona mu moni w'Omwaami ohuhiraho abo boosi abatuka n'asisiiri ohutuka.

³¹ Nae haba siyonoona ohwaakana neende Omutuki Yerobboamu; yemeeda mu moni mani yadeehya Yesebbeeli, owali omuhaana w'Omutuki Etibbaali owa Sidoni, mani yeenamiraanga Bbaali.

³² Yoombaha enyuumba ya nasaae eya Bbaali mu Samaria, yaamuholera alutaari, mani yaayita mu nyuumba ya nasaae eyo.

³³ Haandi yaatao esifwaanani sy'Asera nasaae muhasi. Yahola ebibitiirifu ebisaangulusa etima ly'Omwaami, Nasaae wa Yisiraeli, ohuhiraho abatuki boosi abali mu Yisiraeli enyuma wae.

³⁴ Mu butuki bwae, Hieli ohutula Bbeteli yoombaha haandi Yeriko. Koti lu Omwaami yali niyabuula ohubitira mu Yosua omwaana wa Nuuni, Hieli yafwiirwa omwaana wae waamberi Abbiramu niyali hwataniha omusiingi kwa Yeriko, haandi omwaana wae walaka Segubbu niyali niyoombaha ebiruwa.