1 Abatuki 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abbija omutuki wa Yuda

¹ Mu mwaaka kw'ehumi na kitaanu-na-kidatu okw'obutuki bw'Omutuki Yerobboamu wa Yisiraeli, Abbijaamu yeehaswa ohuba omutuki wa Yuda,

² mani yaanyala ohutuka hulw'embaka y'emyaaka kidatu naali mu Yerusalemu. Ng'ina yali Maaka, omuhaana wa Abbusalomu.

³ Yesi yahola sa ebyonoono koti ebyali ebya laatang'ene haandi haba siyeesera elalira oluyaali mu Omwaami Nasaae wae, koti lu Daudi kukaang'ene muhuluundu yaholaanga.

⁴ Nae hu lwa Daudi oyo, Omwaami Nasaae wae, yaberesa Abbijaamu omwaana ohutuka enyuma wae mu Yerusalemu, haandi neende ohuliinda Yerusalemu bulai ataali ohutya hwoosi.

⁵ Omwaami yahola ati olwohuba Daudi yali niyaholaanga ebyamusaangasaanga nga haba siyali niyahayaho ohuwulira ebilagiro byae, ohutusaho hulw'omuhasi Wuria Omuhiiti.

⁶ Ebiita byali nibyachaaka akatikaati wa Rehobboamu neende Yerobboamu byachiiririra sa bityo ohubita mu siha sya Abbija syoosi.

⁷ Mani buli siindu syoosi si Abbija yahola syandiikwa mu sitabo sya Ebyaliwo by'Abatuki ba Yuda.

⁸ Abbija yesi yaafwa mani yasiihwa mu Siko sya Daudi, mani Asa omwaana wae yaamufunya mu makulu kae yaaba omutuki.

Asa omutuki wa Yuda

⁹ Mu mwaaka kw'amahumi kabiri kweene, mu myaaka ky'obutuki bwa Yerobboamu owa Yisiraeli, Asa yaaba naali omutuki wa Yuda,

¹⁰ mani yaanyala ohutuka hulw'emyaaka amahumi kane neende mulala naali mu Yerusalemu. Nguhwaang'ene yali Maaka, owali omuhaana wa Abbusalomu.

¹¹ Asa yanyala ohuholaanga ebyasaangasaanga Omwaami, koti Daudi kukaang'ene lu yali yaholaanga.

¹² Yadumuula yaatusa mu syaalo syoosi abacheke b'esisyaani neende ab'esihaana boosi abachakaliraanga abuundu yi bakafiiri beenamiraanga banasaae bataali abadyeeri, mani yaatusa ebiloongaloongwe byoosi bi batuki baasye bawaaho bali nibahola.

¹³ Yatusa Maaka nguuhwang'ene abuundu yi ng'ina yali omutuki, olwohuba yali niyahola esiloongaloongwe sy'obuwemu esya Aseera nasaae muhasi w'olwiibulo. Asa yakwiisa esiloongwaloongwe esyo mani yasisaambira mu hoondo ya Kidironi.

¹⁴ Kata neende Asa naatasakuula buli abuundu w'esikafiiri w'ohwiinamiraanga, omweene yadoong'a sa naali omweesikwa eyiri Omwaami obulamu bwae bwoosi.

¹⁵ Yata mu Nyuumba ya Nasaae eyo ebiindu byoosi bi laatang'ene yali niyayaana eyiri Nasaae, kata neende ebiindu by'esaabbu alala neende eby'efeesa bi mweene yayaanaanga eyiri Nasaae.

¹⁶ Omutuki Asa owa Yuda haandi neende Omutuki Bbaasa owa Yisiraeli bali nibamenya ni balwaanaanga ebiita buli otula neende owaasye ebiha byoosi bi boombi bali mu bunyala.

¹⁷ Bbaasa yaseeta Yuda mani n'achaaka ohwoombaha olukoba hu Rama mbwe hwaanyale ohuhalaka engeendo choosi echiingira haandi neende echitula mu Yuda.

¹⁸ Mani Omutuki Asa niyeecha yakiinga yaayira efeesa yoosi alala neende esaabbu yoosi eyali niyalehwa mu Nyuumba ya Nasaae, haandi neende mu dooho bweene, mani yaamala yaabita hu bahoongo baandi ohukiinga ohubiyira mu Damasiko, eyiri Omutuki Bbenihadadi owa Siria, omwaana wa Tabburimooni neende omwiichuhulu wa Hesirooni, neende emboosi chino

¹⁹ “Leha huholere alala, koti lu baseefwe baba. Bulaanu yita obulala bwao neende Omutuki Baasa wa Yisiraeli, hu yeemeo anyale ohutusa abalwaani bae mu syaalo syaange.”

²⁰ Omutuki Bbenihadadi yafukiirisania neende esibaaso sya Asa, mani yaatuma abahoongo b'eye lyae neende amaye kaabwe ohuchia ohuseeta ebiko bya Yisiraeli. Mani banyala ohuwaamba Yijoni, Daani, Abbeli-Bbeti-Maaka, ebituundu biri aambi w'Enyaanja Galilaaya, haandi neende esyaalo syoosi esya Nafutaali.

²¹ Omutuki Bbaasa niyawulira esyali nisiholehaane, yalehera ao ohusita Rama neende olukoba, mani yaachia Tirisa.

²² Omutuki Asa yaatusa omunwa mu Yuda yoosi naadahisa buli muundu, ataali ohubisira kata mulala, ohuhoonya ohukiinga ohutusa mu Rama amakina alala neende embaao chi Bbaasa yalichiingi niyehoonyera ohwoombahiraho olukoba. Mani ohwehoonyera ebyoombaha bino, Asa yesi yoombahira olukoba hu biko Misipa neende Gebba, esiko siri mu syaalo sya Bbenjamini.

²³ Buli siindu syoosi si Mutuki Asa yahola, ebiholwa byae by'obululu, neende ohusitana engoba hu biko, byoosi byandiikwa mu sitabo sya Ebyaliwo by'Abatuki ba Yuda. Nae niyali n'akofuule muno yadataaswa neende oluumbe lw'amakulu.

²⁴ Asa yaafwa, mani yasiihwa mu ng'ani ch'abatuki mu Siko sya Daudi, mani omwaana wae Yehosafati yaanyala ohumukobola mu makulu wae yaaba omutuki.

Omutuki Nadabbu owa Yisiraeli

²⁵ Mu mwaaka kw'ohubiri okw'obutuki bwa Asa owa Yuda, Nadabbu omwaana w'Omutuki Yerobboamu yeehaswa ohuba omutuki wa Yisiraeli, mani yaanyala ohutuka embaka y'emyaaka kibiri.

²⁶ Mani koti sa laatang'ene owaliho omweene natabaao, yonoona eyiri Omwaami, mani yeemirira Yisiraeli ohuyiingisa mu syonoono.

²⁷ Bbaasa omwaana wa Ahija, ow'enono ya Yisikari, yahoba Nadabbu mani yamwiita koti lu Nadabbu neende eye lyae lyali niliwaamba esiko sya Gibbetooni mu Filisiti.

²⁸ Sino syakwaao mu biha by'omwaaka kwa hadatu okw'obutuki bwa Asa omutuki wa Yuda. Mani katyo, Bbaasa niye owakobola mu makulu ka Nadabbu koti omutuki wa Yisiraeli.

²⁹ Abweene ao, yachaakiraniramo ohwiitaanga abaandu bomu nono ya Yerobboamu boosi. Ohuloondehana neende bi Omwaami yali niyaboola ohubitira mu muhalaabani wae, omunabbi Ahija ohutula mu Silo, edaala lyoosi elya Yerobboamu lyeetwa; abulao kata mulala owawonamo daawe.

³⁰ Sino syakwaao sityo olwohuba Yerobboamu niye owasaangulusa etima ly'Omwaami, Nasaae wa Yisiraeli, neende ebyonoono bi yaholaanga neende bi yakera Yisiraeli yaahola.

³¹ Buli siindu syoosi si Nadabbu yahola syandiikwa mu sitabo sya Ebyaliwo eby'Abatuki ba Yisiraeli.

³² Asa omutuki wa Yuda neende Bbaasa omutuki wa Yisiraeli bali mu biita bya buli siha buli otula nalwaanianga owaasye esiha syoosi si boombi balichiingi mu butuki.

Bbaasa omutuki owa Yisiraeli

³³ Mani mu mwaaka kwa hadatu kwa Asa omutuki wa Yuda, Bbaasa omwaana wa Ahija, yeehaswa yaaba omutuki wa Yisiraeli yoosi, mani yaanyala ohutukira mu Tirisa hulw'embaka y'emyaaka amahumi kabiri neende kine.

³⁴ Mani koti sa Yerobboamu omutuki waliwo oyo natabaao, yesi yonoona mu moni w'Omwaami haandi yaayira Yisiraeli yosi mu huhola esyonoono.