1 Abatuki 14 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohufwa hw'omwaana wa Yerobboamu

¹ Esiha esyo, omwaana wa Yerobboamu omutuki olaangwa mbwe Abbija yalwaala.

² Yerobboamu yaboolera omuhasi wae ati, “Wefuule mani omuundu yeesi ahaye ohuhumanyirisa, mani ochie mu Silo, yi Ahija omunabbi yali niyamenya, owaboola ati ese njia ohuba omutuki wa Yisiraeli.

³ Muyirire emigaati ehumi (10) kino, ekeeki, haandi neende enjaagi y'obuuhi. Mani muteebeho esiindu sichia ohukwa hu mwaana weefwe wuno, ahuboolere.”

⁴ Mani omuhasi oyo yaachia ena daala lya Ahija mu Silo. Obukofu bwali nibwahola Ahija ohuba omuwofu.

⁵ Omwaami nae yali yamala ohumuboolera mbwe omuhasi wa Yerobboamu achia ohwiicha ohumuteeba ebidiira hu mwaana wae, owali omulwaae. Omwaami yaboolera Ahija esy'ohuboola. Mani omuhasi wa Yerobboamu niyoola yaali, yateemaho ohweehola ohuba naali omuhasi wuundi sa.

⁶ Nae Ahija niyawulira niyeengira yaali mu lwiiki, yaboola sa ati, Ewe yingira sa mukati. Ese manyire sa bulai bweene endi ewe niiwe omuhasi wa Yerobboamu. Nae siina syeene esikera nooli ohwefuula ohuba omuundu wuundi? Ese ndi neende amayaaha kao amabi.

⁷ Chia mani oboolere Yerobboamu oti sino nisyo si Omwaami, Nasaae wa Yisiraeli, amuboolera ati, “Ese ndahudoola mu baandu baangi, mani ndaahuhola waaba omwiimirisi wa Yisiraeli abaandu baange”.

⁸ Ese ndang'uula obwaami ndaabutusa hu beechuhulu ba Daudi ndaahububeresa. Nae ewe mbao haba s'obeere koti Daudi omuhalaabani waange wula, owali niyaambuliirira elalira, yafunihiraanga ebilagiro byaange, mani yaaholaanga buli siindu si mba nifukiirisania nasyo.

⁹ Ewe naawe waaholere ebyonoono bihoongo muno ohuhiraho abo boosi abatukaho hale baahutaangirira. Ewe wamala ohunjwaang'a mani wasiingisa etima lyaange, niweeholera ebiloongaloongwe, alala neende ebiloongaloongwe by'ebibya ohubiinamiraanga.

¹⁰ Mani ohweema hu sino, njia ohuleeta amasira mu butuki bwao, mani njite abeechuhulu bao b'esisaacha boosi, abayere alala neende abahuluundu sidubaanie. Ese njia ohusihirisa edaala lyao lyoosi; boosi bachia ohung'uulirwa koti amasiingo sa.

¹¹ Buli muundu w'edaala lyao achia ohufwiira mu siko esyo, achia ohuliibwaanga neende embwa, haandi abo boosi abachia ohufwiiraanga mu syaalo siyanjaafu, bachia ohuliibwaanga neende engosya. Ese Omwaami, mbao nomanoome.

¹² Mani Ahija yemeeda ohuboolera omuhasi wa Yerobboamu ati, “Bulaanu, ewe kobolayo engo wao. Mani noonaba niwoola sa oti mu siko omwo, omwaana wao achia ohufwa.

¹³ Abaandu boosi aba Yisiraeli bachia ohumulira mani bamusiihe. Niye ochia ohuba mulala hu b'edaala lya Yerobboamu ochia ohusiihwa bulai yeeng'ene, olwohuba oyo niye yeeng'ene yi Omwaami, Nasaae wa Yisiraeli, yasangaalira.

¹⁴ Omwaami achia ohutaao omutuki wa Yisiraeli ochia ohwaakamia obutuki bwa Yerobboamu.

¹⁵ Omwaami achia ohusaandya Yisiraeli, yoole ohuteengereha koti ekada liri mu mwaalo kuhulukusa. Achia ohwiiya abaandu ba Yisiraeli ohubatusa mu loba lai lino, li yali yaberesa bakuuka yaabwe, mani abasalaanie abaambuse Omwaalo kwa Ewufuraate, olwohuba bamalire ohusaangulusa etima lyae neende ohuhola ebiloongaloongwe bya Aseera nasaae muhasi.

¹⁶ Omwaami achia ohujwaang'a Yisiraeli olwohuba Yerobboamu yonoona mani yeemirira abaandu ba Yisiraeli mu huhola esyonoono.”

¹⁷ Omuhasi wa Yerobboamu yaakobolayo mu Tirisa. Mani koti lu yali huyeengira sa ati mu daala lyae, omwaana wae oyo yafwa.

¹⁸ Abaandu ba Yisiraeli beecha baamulira, mani baamusiiha, koti lu Omwaami yali n'aboolere ohubitira mu muhalaabani wae, Ahija omunabbi.

Ohufwa hwa Yerobboamu

¹⁹ Mani buli siindu syoosi si Mutuki Yerobboamu yaholaanga, ebiita bi yalwaanaanga, haandi koti lu yatukanga, byoosi byandiikwa mu sitabo sya Ebyaliwo by'Abatuki ba Yisiraeli.

²⁰ Yerobboamu yatuka hulw'emyaaka amahumi kabiri neende kibiri. Yafwa yasiihwa, mani omwaana wae olaangwa Nadabbu yaamukobola mu makulu koti omutuki.

Omutuki Rehobboamu owa Yuda

²¹ Rehobboamu omwaana wa Solomooni yali naali emyaaka amahumi kane neende mulala eky'obuhuluundu niyaholwa ohuba omutuki wa Yuda, mani yaatuka hulw'embaka y'emyaaka ehumi neende kitaanu-na-kibiri naali mu Yerusalemu, esiko si Omwaami yadoola ohutula mu situundu sy'esyaalo sya Yisiraeli yoosi ohuba abuundu y'ahoyere ohwiinamirwaangamo. Ng'ina Rehobboamu yali Naama ohutula Abaamooni.

²² Mani abaandu ba Yuda boosi bonoonera Omwaami mani bemeeda ohuholaanga ebiingi ebisaangulusa etima lyae ohubachooma ohuhiraho neende bakuuka yaabwe boosi bali bahola.

²³ Boola ohwoombaha abuundu wohwiinamiraangao banasaae bataali abadyeeri aba Asera ohwiinamiraanga hu ngulu neende mu biiniha by'emisaala kyadidya.

²⁴ Esihirira elalira obubi, yaliyo abasaacha neende abahasi abaholeraanga obucheke abuundu w'obukafiiri. Abaandu ba Yuda boosi baholaanga ebiindu by'omukwoobo koti ebyaholwaanga neende abaandu ba Omwaami yali niyeerusa mu syaalo omwo koti lu Baisiraeli bayiinduulaanga nibeengira mu syaalo omwo.

²⁵ Mu mwaaka kwohutaanu okw'obutuki bwa Rehobboamu, Omutuki Sisaki wa Misiri yaseeta Yerusalemu.

²⁶ Yayaaya obuyiinda bwoosi obwalichiingi mu Nyuumba ya Nasaae, haandi neende mu dooho, n'oyirira alala neende engabo ch'esaabbu chi Solomooni yali yahola.

²⁷ Ohukobola mu bweyaango bwacho, Omutuki Rehobboamu yaahola engabo cha mugasa yaachibiihisa abahoongo bali neende omulimo kw'ohuliindaanga ebiruwa by'edooho.

²⁸ Mani buli siha si mutuki yachiraangamo mu Nyuumba ya Nasaae, abaliindi bakingaanga engabo echio, mani nibamala nibachikobosa mu nyuumba y'abaliindi.

²⁹ Buli siindu siindi si Mutuki Rehobboamu yahola syandiikwa mu sitabo Ebyaliwo by'Abatuki ba Yuda.

³⁰ Mu biha bino byoosi, Rehobboamu neende Yerobboamu bali nibamenyera ebiita nibalwaananga buli otula neende owaasye.

³¹ Rehobboamu yeemao yaafwa, mani yasiihwa mu ng'ani ch'abatuki mu Siko sya Daudi, mani Abbijaamu omwaana wae yaamukobola mu makulu yaaba omutuki.