1 Abatuki 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ohweema huhulagira omunabbi ohutula mu Yuda yaachia mu Bbeteli mani yoola ebweene eyo esiha si Yerobboamu yali niyeemere hu alutaari ohuyaana esiyaanwa.

² Mani ohuloondakana neende esilagiro sy'Omwaami, omunabbi oyo yachia yabwaaba alutaari eyo ati, “Ewe alutaari, alutaari, sino nisyo si Omwaami aboola: Omwaana, yi liita lyae lichia ohuba Yosia, achia ohwiibulwa mulwiibulo lwa Daudi. Achia ohuhusiinjiraho abalaamisi boosi abali ohuhalaabanira hu alutaari y'obukafiiri abahuyaaniraho ebiyaanwa, haandi achia ohusaambiraho amakuumba k'abaandu.”

³ Haandi omunabbi yemeeda ohuboola ati, “Alutaari yino yichia ohusalaana, mani ekohe li yiriho lichia ohudumuuswa. Mani ao niwo wochia ohumanyira oti hane Omwaami niye owunomanomeeremo.”

⁴ Mani Omutuki Yerobboamu yaawulira bino atyo, yasyoomesa yaali mani yaalagira ati, “Abweene ao, omuhono kw'omutuki oyo kwoomerao mani byaamuhaya koti lu ananyala ohukwekobosaho yaakufuumbia.”

⁵ Esiha syeene esyo, alutaari eyo yakabuhanamo mani ekohe lyasalaanira hu loba, koti sa lu munabbi yali naalakuule mu liita ly'Omwaami.

⁶ Omutuki Yerobboamu yeemao yaboolera omunabbi oyo ati, “Nookanya ndekoongoyere eyiri Omwaami Nasaae wao oyo omusabe awonie omuhono kwaange!” Omunabbi oyo yasaba Omwaami, mani omuhono kw'omutuki oyo kwaaona

⁷ Mani omutuki oyo yaboolera omunabbi oyo ati, “Ewe yicha huchie naawe engo waange, mani onyooleho esyohulya. Ese njia ohuhukaba omukabo kwao hulw'esiindu syooholere.”

⁸ Nae omunabbi oyo yaakobolamo ati, “Ewe kata neende niwahanyalire ohuumbaho esituundu sy'emyaandu kyao, ese haba sindahanyalire ohuchia naawe, kata sa ohung'wa, kata sa ohulya esiindu syoosi naawe.

⁹ Omwaami yaandagiire obutalyaaho, haba sa ohung'waaho sa esiindu syoosi, haandi neende obutakobolerayo hu ngira nasilala eyo yi njichiireho.”

¹⁰ Mani haba siyakobolerayo hu ngira nasilala yira yi yali niyecheereho, nae yaloonda sa engira yiindi.

Omunabbi mukofu wamenya mu Bbeteli

¹¹ Nae esiha esyo, yaliyo omunabbi wuundi omukofu owali niyamenya mu Bbeteli. Mani abaana bae beemao baamuboolera bi munabbi wuundi ohutula mu Yuda bi yali naaholeere mu Bbeteli oludaalo olwo, haandi esyo si yali n'aboleere Omutuki Yerobboamu.

¹² Mani omunabbi mukofu oyo yaabateeba ati, “Ngira siina yi yabitiraho n'awaao?” Bosi beemao baamweekesa engira eyo

¹³ mani yesi yaababoolera ohumutekehera esuhiri yae. Bahola sa batyo, mani yayiniinaho, yawaao

¹⁴ niyeehirira neende engira n'aloonda omunabbi oyo owali naatula mu Yuda yaanyala ohumwakaana niyehaale mu siiniha sy'omutuumba. Mani n'amuteeba ati, “Ewe niiwe omunabbi otula mu Yuda, kose?” Omusaacha oyo nae yamukobolamo ati, “Niise.”

¹⁵ Mani yaboolera omusaacha oyo ati, yicha huchie engo waange, olyeeho naange esyohulya.

¹⁶ Nae omunabbi wuno otula mu Yuda yakobolamo ati, “Ese haba siinyala ohuchia engo wao daawe, kata sa ohusiima obukeni bwao obwo. Haandi haba siinjia hukanya ohulyaho kata ohung'waaho esiindu syoosi naawe ano buti,

¹⁷ olwohuba Omwaami niye oundagire obutalyaaho kata obutang'waaho esiindu syoosi daawe, haandi neende obutakobolerayo engo waange hu ngira nasilala eyo yi njichiireho.”

¹⁸ Mani omunabbi mukofu oyo owamenya mu Bbeteli yaboola ati, Ese syeesi, ndi omunabbi koti ewe sa, ohweema huhulagira hw'Omwaami, malaika yeechere yamboolera ohwiicha ohuhubukula huyire engo waange huliinde. Nae kata katyo, omunabbi mukofu oyo yali sa naali ohubacha.

¹⁹ Omunabbi wali n'atula mu Yuda yaachia engo w'omunabbi mukofu wula, mani yaalya nae.

²⁰ Koti lu bali nibali ohuliira hu meesa, emboosi y'Omwaami yatulira mu munabbi mukofu,

²¹ mani yayuhira hu munabbi otula mu Yuda n'aboola ati, “Omwaami aboola ati, ewe ohayire ohumuwulira mani waahaya ohuhola koti lu ahulagiire.

²² Ataali ohuhola otyo, ewe okoboole waliira ebyohulya abuundu yabeere ahulagiire obutaliirao. Ohweema hu sino siti, ochia ohwiitwa sa, omubiri kwao sikuchia ohusiihwa mu ng'ani y'edaala lyeeng'we daawe.”

²³ Nibaba nibamalire ohulya, omunabbi mukofu oyo yatekehera omunabbi otula mu Yuda esuhiri yae,

²⁴ mani yeweerao. Niyali hwaali hu ngira, edalang'i yabukaanana nae mani yaamwiita yaafwa. Omubiri kwae kwakona hu ngira ohwo, mani esuhiri alala neende edalang'i eyo byeema sa endulo wakwo.

²⁵ Abasaacha baandi bali nibabita hu ngira ohwo, babona omulaambo okwo nikuli hu ngira, neende edalang'i niyeemere aambi nakwo. Bemeeda bawaao boola mu Bbeteli mani baboola bi bali nibabweene.

²⁶ Omunabbi mukofu wula niyawulira atyo, yaboola ati, “Ngandi oyo niye omunabbi wula owahaya ohuloonda esilagiro sy'Omwaami! Mani sakira Omwaamni atumire edalang'i yaamuseeta yamwiita, koti sa lu Omwaami aboolere.”

²⁷ Mani yaboolera abaana bae ati, “Eng'we muutekehere esuhiri yaange.” Bosi bahola sa batyo,

²⁸ mani yaayiniinaho yaachia mani yaabona omulaambo kw'omunabbi oyo nikukonere hu ngira, neende esuhiri alala neende edalang'i nibisyeemere sa endulo wakwo. Edalang'i eyo haba siyali niyiriire omulaambo okwo daawe, kata neende niyitaseetere esuhiri daawe.

²⁹ Omunabbi mukofu wuno yabukula omulaambo okwo, yaakuta hu suhiri, mani yaakukobosa mu Bbeteli ohukuholeraho amasika neende ohukusiiha.

³⁰ Yakusiiha mu ng'ani y'edaala lyae, mani omweene alala neende abaana bae bakuholera amasika abweene ao nibaboola bati, “Ooo, omwaana weefwe mweene, omwaana weefwe!”

³¹ Nae luunyuma lw'ohukusiiha, omunabbi wuno yaboolera abaana bae ati, “Ese syeesi nindilifwa, muhoyaanga musiiha mu ng'ani yeene yino, mwaalisa omubiri kwaange kwaasibirana neende okwae.

³² Emboosi chi yalomaloma naalagiirwe neende Omwaami nachalaasa alutaari yiri mu Bbeteli haandi nachalaasa abuundu woosi aohwiinamiraanga ali mu biko bya Samaria ohwoola bichia ohwoolerera.”

Esyonoono sya Yerobboamu sihiramo obubi

³³ Omutuki Yerobboamu owa Yisiraeli haandi kata haba siyakanya ohukaluuhana yaatula mu ngira chae embi echio daawe, nae yemeeda sa ohudoolaanga abalaamisi ohutula mu buli ludaalo, ohuchia ohuhalaabana hu alutaari yi yali niyoombaha omweene hu bwae. Yaawulaanga sa omuundu yeesi owadahaanga sa ohwaulwa.

³⁴ Esyonoono sino, hu lwaande lwae, syaleetao ohusihirira neende ohunyaasira elalira obwaami bwae.