1 Abatuki 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enono ch'emukulu chijeema

¹ Rehobboamu yeemao yaachia mu Sekemu, yi baandu boosi aba Yisiraeli y'emukulu bali nibebuusiire ohumwiihasa abe omutuki.

² Mani Yerobboamu omwaana wa Nebbati, owali niyachia mu Misiri ohweiba hu Mutuki Solomooni, yaawulira amayaaha kano, yakobola naatula mu Misiri.

³ Abaandu b'enono ch'emukulu nibo abamulaanga, mani boosi baachia eyiri Rehobboamu mani baamuboolera bati,

⁴ “Solomooni lataao yatudiraanga neende obwaalaba yaatudwiihaho ebidinyu bisito muno. Mani ewe naawe noonyala ohukyaanguya, haandi waanyala ohuhola obusito bweefwe bwaatubeera obwaangu, efwe huba huchia ohuba abaandu bao baloonga.”

⁵ Nae yakobolamo ati, “Kobole ehabi liindi luunyuma lw'endaalo chidatu mani mba njia ohunyala ohubakobolamo. Mani bawaao.”

⁶ Omutuki Rehobboamu yachia yeteebaho hu basaacha bahuluundu, bahoonyaanga Solomooni laatang'ene koti abakeraki. Yateebaanga ati, “Siina syeene simwahaangeraka ohukobola mu baandu bano?”

⁷ Nabo bakobolamo bati, “Ewe nooba noodaha ohuhalaabanira baandu bano bulai muno, baberese ekaluso libalyooyera, mani baba bachia ohunyala ohuhuhalaabaniraanga neende obutiiririrwa.”

⁸ Nae yabisira sa engeraka eyo, eyali ey'abasaacha bahuluundu bala mani naachia eyiri abaana baraaga abali bahula nae mbwe nibo ababa babe abakeraki bae.

⁹ Yateeba ati, “Eng'we muungeraka muti mboole endye? Ndaboolera endye abaandu abo abali ohuusabaanga ohwaanguya obudinyu bwaabwe?”

¹⁰ Nabo bamukobolamo bati, “Sino nisyo sy'ochia ohubaboolera: ‘Olwaala lwaabusyu lwaange luhira esibuno sya laata yaange obutulifu!’ ”

¹¹ Obaboolere oti, “Ese laata yaange yadwiihaanga ebidinyu bisito muno hweengwe; Nae ese njia ohubihola bisidoe ohuhiraho ao. Yabanalaanga ehoba; naange njia ohubanyweehaanga neende oluhoba lw'efaraasi!”

¹² Endaalo chidatu nichawa, Yerobboamu alala neende abaandu boosi bakobola eyiri Omutuki Rehobboamu, koti lu yali nabalakire.

¹³ Omutuki oyo yaabisira sa engeraka y'abasaacha bahuluundu bala mani yaalomaloma neende obwaalaba eyiri abaandu abo,

¹⁴ koti sa lu basyaani baraaga bali nibamukerakiire. Yaboola ati, “Laata yaange yadwiihaanga eng'we ebidinyu bisito muno; naange njia ohubihola bibe ebisito bihiraho neende ao. Yabahuyaanga neende embariki; naange njia ohubatoocha neende ehoba ch'efaraasi!”

¹⁵ Hane yali niyo endekeha y'Omwaami ohwoosereseramo bi yali n'amalire ohulomaloma neende Yerobboamu omwaana wa Nebbati naabitira mu munabbi Ahija ohutula mu Silo. Mani sino nisyo esyakera omutuki wuno yaahaya ohufwa hu baandu abo.

¹⁶ Mani abaandu baabona bati omutuki oyo saadaha ohuwulira akaabwe, bachaaka ohwehuuma nibaboola bati, “Daudi yeehe aasi neende edaala lyae lyosi! Siina syeene sibatuholeraho? Eng'we abaandu ba Yasiraeli hweekobolere engo! Lehe Rehobboamu yeeholeho omweene!” Mani batyo, abaandu ba Yisiraeli beehalaka,

¹⁷ mani baaleha Rehobboamu ohuba omutuki w'abaandu bali nibamenya mu situundu sy'esyaalo sya Yuda syoong'ene.

¹⁸ Omutuki Rehobboamu yaatuma Adoniramu owali naali omuhoongo w'obuhalaabani buyiikwa, ati achie eyiri Abaisiraeli, nae baamubba amakina yaafwa. Mani ohweema hu syeene sino, Rehobboamu yeecha mani yaanguya ohwiingira mu sigaari sy'efaraasi syae, mani yeeyiba yaachia mu Yerusalemu.

¹⁹ Mani ohutula esiha syeene esyo, abaandu bomu butuki bw'emukulu obwa Yisiraeli bwamenya nibweekabula ohutula hu bwaami bwa Daudi.

²⁰ Mani abaandu ba Yisiraeli baawulira bati Yerobboamu yali n'amalire ohukobola ohutula mu Misiri, baamulaaliha yeeche mu muhung'aano okw'abaandu mani baamuhola ohuba omutuki wa Yisiraeli. Enono ya Yuda yoong'ene niyo eyadoong'a niyisiwuliirisania neende abeechuhulu ba Daudi.

Obunabbi bwa Semaya

²¹ Mani Rehobboamu niyoola mu Yerusalemu, yanyala ohulaanga abalwaani bahiramo ohulai abayera elifu emia ndala neende amahumi kataanu-na-kadatu (180,000) ohutula mu nono cha Yuda neende Bbenjamini. Yali nakiiya ohulwaana ebiita mani hwaanyale ohukobosa obunyala bwae mu nono ch'emukulu cha Yisiraeli.

²² Nae Nasaae yaboolera Semaya omunabbi

²³ ohuberesa Rehobboamu emboosi chino, haandi neende ohuchiosa hu baandu boosi ab'enono cha Yuada neende Bbenjamini mbwe:

²⁴ “Mutaseetaho abaana beeng'we abo daawe, abaandu ba Yisiraeli abo. Mukoboleyo, eng'we mweesi. Ebikwiireo sino situla hu hudaha hwaange ese omweene.” Mani boosi beecha baanyala ohwiisa oluyaali mu silagiro sy'Omwaami esyo, mani beekobolereyo engo waabwe.

Yerobboamu yeetusa hu Omwaami

²⁵ Omutuki Yerobboamu owa Yisiraeli yoombahiraho olukoba hu siko sya Sekemu esiri mu syaalo sy'ebigulu esya Efuraimu mani yaamenya omwo budiidi. Yeemao yaatulamo, haandi yoombahiraho olukoba luundi hu siko sya Penueli.

²⁶ Bulaanu Yerobboamu yeemao yaboola mu mwooyo kwae ati, “Bulaanu obwaami buchia ohukobola mu nyuumba ya Daudi;

²⁷ mani abaandu baandi nibanaba mbwe hu bachia ohuyaana ebiyaanwa byaabwe mu nyuumba y'Omwaami mu Yerusalemu, mani ao omwooyo kw'abaandu bano ohukobolera omwaami waabwe, hu Rehobboamu omutuki wa Yuda, mani baanjite mani bamale haandi bakobole hu Rehobboamu omutuki wa Yudah.”

²⁸ Mani luunyuma lw'ohwebaasa haandi, mani yaanyala ohuhola esiloongwaloongwe mu saabbu esy'esurusi njere chibiri, n'aboolera abaandu bae ati, “Eng'we musaandire ebimala ohwechembaanga mu Yerusalemu ohunyala ohwiinamiraanga Omwaami. Eng'we baandu ba Yisiraeli, ngaandi banasaae beeng'we mbano bali ano, bala abanyala ohubatusa mu Misiri!”

²⁹ Yata esiloongwaloongwe silala esy'esurusi njere y'esaabbu mu Bbeteli, nae esiindi naasita mu Daani.

³⁰ Mani batyo, abaandu bano bachaaka ohwonoona, ohuchichaanga mu Bbeteli ohwiinamira, haandi neende mu Daani.

³¹ Yerobboamu haandi yoombaha ebituundu biindi eby'ohwiinamiraangamo aakulu w'ebigulu, mani yadoola abalaamisi ohutula mu madaala akataali ak'Abaleefi.

Ohwiinamiraanga huli mu Bbeteli hukayirwa

³² Yerobboamu haandi yabekao esidyaalo sy'esinadiini ohubechaangao hu buli ludaalo lw'ehumi-na-hataanu olw'omwoosi kwohutaanu-na-chidatu, koti esidyaalo syalichiingi sa mu Yuda. Hu alutaari nahwo eyali mu Bbeteli yayaaniraangaho ebiyaanwa eyiri ebiloongaloongwe by'esaabbu by'esurusi njere bi yali niyahola, mani naamala naata mu Bbeteli omwo, abalaamisi abohuhalaabanaanga abuundu wohwiinamiraangao bi yali niyoombaha.

³³ Mani hu ludaalo lw'ehumi-na-hataanu olw'omwoosi kwa hataanu-na-hadatu, oludaalo lu mweene yali niyatoongola, yaachia mu Bbeteli mani yayaanayo esiyaanwa hu alutaari naahusa esidyaalo si yali omweene nateerereo abaandu ba Yisiraeli.