1 Abatuki 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Solomooni atula hu Nasaae

¹ Solomooni yali niyaheera abahasi bateende. Nootusireho omuhaana w'omutuki wa Misiri, haandi yadeehya abahasi baandi, Abahiiti, haandi neende abaandi ohutula mu Moabbu, Abaamooni, Edomu, neende mu Sidoni.

² Yabadeehyaanga sa kata neende Omwaami yali n'alagiire Abaisiraeli boosi obutadeehisaniangaho neende abaandu baandi bano, olwohuba bali bachia ohunyala ohukera Abaisiraeli ohuta obuwulisi bwaabwe eyiri banasaae baandi.

³ Solomooni yadeehya abahaana b'abatuki emia chitaanu-na-chibiri (700) neende abahasi b'erwaanyi emia chidatu (300). Bano boola baamuhola yaleha ohuloonda Nasaae wae

⁴ mani mu ndaalo chiyakofuliramo, bali nibamala ohumuyira mu hwiinamiraanga banasaae bateende. Haba siyanyala ohuba omweesikwa eyiri Omwaami Nasaae wae daawe, koti lu Daudi laatang'ene yali.

⁵ Yeenamiraanga Asitariite nasaae muhasi owa Disoni, haandi neende Moleki nasaae musinyisi wa Abaamooni.

⁶ Yonoona mu moni w'Omwaami mani yaahaya ohuba ow'obwadyeeri eyiri omweene koti Daudi laatang'ene yalichiingi.

⁷ Mani hu lugulu lwa luundi ebukwe wa Yerusalemu yoola ohwoombahaho abuundu wohwiinamiraangao Kemosi, nasaae musinyisi owa Moabbu, haandi neende abuundu waandi ow'ohwiinamiraangamo Moleki, nasaae musinyisi wa Abaamooni.

⁸ Haandi yoombaha abuundu wohwiinamiraangamo yi bahasi bae bateende boosi banyalaanga ohuniooheseraangayo obubbaani haandi neende ohuyaaniraangaho ebiyaanwa eyiri banasaae baabwe.

⁹ Mani Omwaami yeecha yanyoolerera Solomooni, olwohuba omwooyo kwae kwali nikumalire ohukaluuhana nikutulire hu Omwaami, Nasaae wa Yisiraeli, owali yanyala ohumubonehera amahabi kabiri amalaamba,

¹⁰ mani niyamulagira ebidiira hu biindu bino biti, ata haba s'ahoyere ohuloonda banasaae baandi daawe; nae yali ahayire ohuliinda bi Omwaami yali n'alagiire.

¹¹ Mani sakira Omwaami yeecha yaboolera Solomooni ati, “Koti lu mbaasa yino niyo eyihubereengemo, mani waahaya ohudiira amalako kaange haandi neende ebilagiro byaange bi ndahuberesa, njia ohuhunanululaho obwaami buno mani male mbuberese omuhalaabani wao sa.

¹² Nae kata katyo, hulwa Daudi lataao, haba siinjia ohusihola ewe nosisiiriwo omulamu daawe, nae mu ndaalo ch'obutuki bw'omwaana wao.

¹³ Haandi haba siinjia humutusaho obwaami obwo bwoosi daawe; nae njia ohumuleheraho enono ndala yoong'ene hulw'omuhalaabani waange Daudi haandi neende hulwa Yerusalemu, esiko si ndeeholera omweene ohuba esyaange syeeng'ene.”

Abasuku ba Solomooni

¹⁴ Mani katyo, Omwaami yeecha yaahola Hadadi, otula mu nono nduki ya Edomu, ohwekaluuhania hu Solomooni.

¹⁵ Olwohuba koti lu Daudi yali naali mu Edomu, nae Yoabbu omuhoongo w'eye lyae yali achiire ohusiiha abali nibeeterwe, yeeta buli muundu w'esisaacha owali mu Edomu

¹⁶ (olwohuba Yoabbu alala neende Yisiraeli yoosi yadoong'a omwo emyoosi kisaasaba, ohwoolera elalira lu yali n'amalire ohwiita buli w'esisaacha owali mu Edomu);

¹⁷ ohutusaho Hadadi yeeng'ene neende abaandu hu bahalaabani ba laatang'ene ab'Edomu, abeeyiba ohutula mu Misiri. (Esiha esyo, Hadadi yali n'asisiiri sa omudoto.)

¹⁸ Beecha mani baatula mu Midia mani baachia mu Parani, yi basaacha baandi banyala ohwiicha ohubeyambaaniaho. Mani beecha bakeenda baachia mu Misiri, nibamala nibachia eyiri omutuki owanyala ohuberesa Hadadi eloba hooho, neende enyuumba, haandi yamuhoonyaanga neende ebyohulya.

¹⁹ Hadadi yaanyala ohuhola obwiicha neende omutuki oyo, mani omutuki oyo yaanyala ohumuberesa mulamuung'ene, owali mwaanang'ina Tapene omuhasi mutuki, ati badeehisanie.

²⁰ Omuhasi oyo yaanyala ohumwiibulira omwaana mwaana olaangwa mbwe, Genubbaati, owahuswa neende omuhasi mutuki oyo mu dooho, yi yali yamenya neende abasyaani b'omutuki oyo.

²¹ Mani amayaaha ako nikoolera Hadadi naali mu Misiri, mbwe Daudi amalire ohufwa, nihaandi kati Yoabbu omuhoongo w'eye yesi yali n'afwiire, Hadadi yaboolera omutuki oyo ati, “Ndeheho ngobole mu syaalo syeefwe syeene esyo.”

²² Omutuki oyo nae yamuteeba sa ati, “Esikera nisi? Ese nyala ohuba nihayiiswe ohuhubaaho esiindu siindi syoosi-syoosi? Mani esyo nisyo esikera syeene ewe noodaha ohukobola engo weeng'we?” Nae Hadadi yakobola mu mutuki oyo ati, “Ewe ndehe sa ngoboleyo?” Mani yeemao yeekobolerayo engo mu syaala syaabwe. Mani koti lu yali omutuki wa Edomu, Hadadi yali omubi, haandi omusuku mululu mweene owa Yisiraeli.

²³ Nasaae haandi niye oweecha yaahola Resoni omwaana wa Eliada ohukaluuhanira Solomooni. Resoni yali niyeeruha ohutula hu Mutuki Hadadeseri owa Soobba owali omwaami wae,

²⁴ mani yeehola ohuba omuhoongo w'omukaanda kw'abahalaki b'amalako. (Sino syakwaao luunyuma lwa Daudi ohumala ohuyiingira Hadadeseri naanyalire neende ohwiita Abasiria abali nibamuhoonya.) Resoni alala neende abasaacha bae beecha baatula mani baachia baamenya mu Damasiko, yi basaacha bae beecha baamuhola ohuba omutuki wa Siria.

²⁵ Yali niyeehola ohuba omusuku wa Yisiraeli mu ndaalo cha Solomooni choosi.

Esisuubise sya Nasaae eyiri Yerobboamu

²⁶ Omusaacha wuundi owakaluuhanira Omutuki Solomooni yali owali mulala hu bahoongo bae, Yerobboamu omwaana wa Nebbati, ohutula Seereda mu Efuraimu. Ng'ina yali omuhasi mufwiirwe olaangwa mbwe Serua.

²⁷ Mani luno nilwo olukano ludiira hu hweehalaka ohwo. Solomooni yali naali ohwiichusaanga eloba hu lwaande lw'ebukwe wa Yerusalemu, haandi naali ohuteresaanga esida sy'Esiko esyo.

²⁸ Yerobboamu nae yali naali omusyaani muraaga w'amaani, mani Solomooni niyeecha yaamanya koti lu yali omuhalaabani w'esinani muno, yaamuhola ohuba omuhoongo wa bahalaabani bayiikwa mu situundu sy'esyaalo sy'enono cha Manaase neende Efuraimu.

²⁹ Mani ludaalo luundi, koti lu Yerobboamu yali naali naasamula ohutula mu Yerusalemu, Ahija omunabbi, ohutula Silo, yeecha yaabukaanana nae naali yeeng'ene hu ngira mu syaalo silafu sya peengerere.

³⁰ Ahija yeecha mani yefwaalula eganjuula yaaha li yali niyefwaalire, mani yaamala yaalitaandulamo ebituundu ehumi neende bibiri (12),

³¹ mani yaamala yaboolera Yerobboamu ati, “Ewe wedoolereho ebituundu ehumi bibe ebyao, olwohuba Omwaami, Nasaae wa Yisiraeli, ali ohuhubooleraanga ati, ‘Ese njia ohutusa obwaami hu Solomooni, mani male hube enono ehumi.

³² Solomooni achia ohwedoong'isira enono ndala, hulwa Daudi omuhalaabani waange, haandi hulwa Yerusalemu, esiko si mweene ndedoolera ohuba esyaange syeng'ene ohutula mu syaalo sya Yisiraeli syoosi.

³³ Ese njia ohuhola endyo, olwohuba Solomooni nguno amalire ohundebwaaba, haandi amalire ohuchaaka ohwiinamiraanga ba Nasaae bateende koti, Asitariite, nasaae muhasi owa Sidoni; Kemosi, nasaae wa Moabbu; neende Moleki, nasaae wa Abaamooni. Solomooni amalire ohuhaya ohuumbulira, amalire ohuhola esitahoyera, haandi ahayire ohwooseresa amalako kaange neende ebilagiro byaange, haandi sa koti lu Daudi laatang'ene yoola ohuhola.

³⁴ Nae ese haba siinjia ohung'uula obwaami bwoosi ohumala hu Solomooni daawe, haandi njia ohumuleha sa mu bunyala ohwoola lwaalifwa. Sino nisyo siinjia ohuhola hulwa Daudi omuhalaabani waange, yi ndedoolera omweene, haandi owanyala ohwooseresa amalako kaange haandi neende ebilagiro byaange.

³⁵ Ese njia ohung'uula obwaami mbutuse hu mwaana wa Solomooni mani mbuberese enono ehumi chiindi,

³⁶ nae njia ohukanya omwaana wa Solomooni abe neende enono ndala, hu nyale olubeerera ohubechaanga neende omwiichuhulu wa Daudi omuhalaabani waange naatuka mu Yerusalemu, esiko si ndedoolera omweene ohuba abuundu waange anyinamirwamo.

³⁷ Ewe Yerobboamu, ese njia ohuhuhola obe omutuki wa Yisiraeli, mani onyale ohutuka esituundu syoosi esy'esyaalo syoodaha.

³⁸ Noochia ohuunjisamo oluyaali elalira, mani omenye niwooseresa amalako kaange, mani onyale ohukera ese husiime nooholaanga bi mba nindagira, koti lu Daudi omuhalaabani waange yaholaanga, njia ohubechaanga naawe olubeerera. Njia ohuhuhola obe omutuki wa Yisiraeli haandi mbone endi abeechuhulu bao nibo abachia ohutukaanga ewe n'omalire, koti sa lu ndaholera Daudi.

³⁹ Hulw'esyonoono sya Solomooni njia ohusaandyaho abeechuhulu ba Daudi, nae ataali olubeerera.’ ”

⁴⁰ Solomooni yateemaho ohwiita Yerobboamu, nae yeeyiba yaachia eyiri Omutuki Sisaki ow'e Misiri mani naamala naamenya ebweene eyo ohwoolera elalira hu hufwa hwa Solomooni.

Ohufwa hwa Solomooni

⁴¹ Buli siindu syoosi si Solomooni yanyala ohuhola, omulimo kwae, neende amakesi kae, byoosi byandiikwa mu sitabo silaangwa mbwe Ebyaliwo ebidiira hu Solomooni.

⁴² Yali omutuki mu Yerusalemu, naatuka Yisiraeli yoosi hu myaaka amahumi kane.

⁴³ Yafwa, mani baamusiiha mu siko sya Daudi, nae Rehobboamu omwaana wae yaamukerama ohuba omutuki.