1 Abakoriito 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Bi Omutume ahoyera ohunyoola, neende bi ahoyere ohuhola

¹ Ese haba si ndi owedeembe? Haba si ndi omutume? Sindabonaho Yesu Omwaami weefwe? Eng'we haba simuli ebyaamo by'omulimo ku holera Omwaami?

² Nitaali omutume eyiri abaandu baandi, nae eyiri eng'we ndi omutume; olwohuba niing'we esilolero syomiisa obutume bwaange mu Omwaami.

³ Huno nihwo ohwekaya hwaange eyiri abo abahadahire ohunyiingania.

⁴ Haba sihuli neende obunyala bw'ohubereswa ebyohulya neende ebyohung'wa byeefwe?

⁵ Haba sihuli neende obunyala bw'ohukeendaanga neende omuhasi, koti lu batume baandi neende bamwanaang'ina Omwaami neende Keefa baholaanga?

⁶ Oba Bbarinabba neende ese fweeng'ene niifwe abahoyere ohuholaanga emirimo hu hunyale ohunyoola esyohulya?

⁷ Muundu siina ohalaabana koti omusikaari haandi mani yetunga omweene? Muundu siina otaaka endaalo y'emisabbiibbu mani yaahaya ohulyaaho ebyaamo byamwo? Wiina mweene owaaya ebyaayo mani yaahaya ohung'waaho amabeere kabyo?

⁸ Mubaasa muti ndi ohuboolaanga bino nindehoonyera obunyala bwaange koti omuundu sa? Amalako ka Musa kosi haba sikaboola katyo?

⁹ Olwohuba syandiikwa mu malako ka Musa siti, “Otaboyaanga omunwa kw'endaawu niyiri ohuhunyeenya engaano.” Mubaasa muti, Nasaae adeeba hu ndaawu choong'ene?

¹⁰ Haba saalomalomera elalira hweefwe?

¹¹ Nikali mbwe efwe hwabataakamo eby'omwooyo bilai, mani sihuhoyere ohubakesamo ebituhoonya mu bulamu bw'omubiri?

¹² Abaandu baandi nibali neende obunyala bw'ohunyoola omukabo mweeng'we, efwe naafwe sihuba nihuhira hoo? Kata katyo, efwe haba hutehoonyeraho obunyala buno, nae hwagumira buli siindu syoosi hu huhaye ohwiikalira y'Emboosi Ndai ya Kristo engira.

¹³ Eng'we haba simumanyireho muti abo abaandiikwa ohuhalaabana mu Nyuumba ya Nasaae bahoyere ohunyoola ebyohulya byaabwe ohutula mu Nyuumba ya Nasaae eyo, haandi muti abo abahalaabanira hu alutaari bosi ohukabana hu biyaanwa bitusirwe?

¹⁴ Mu ngeri nasilala eyo, Omwaami yalagira ati, abo abayaala Emboosi Ndai, bahoyere ohunyoola obuhoonyi mu bulamu bwaabwe ohutula mu huyaala emboosi ndai eyo.

¹⁵ Ese haba sindehoonyeraangaho obunyala buno kata, haandi haba si ndi ohwandiikaanga bino hu nyemeo nyoole obuhoonyi buli butyo. Ese maya ndaafwa ohuhira omuundu yeesi ohundusaho esyo si ndesuungiramo.

¹⁶ Olwohuba, kata ninjaala Emboosi Ndai, esyo syoong'ene haba sisimberesa ohwesuunga. Olwohuba hoyerwa-buhoyerwa ohuyaala. Mani chinjakaanire nitayaala Emboosi Ndai!

¹⁷ Olwohuba ni mba niihola omulimo kuno hulw'ohudaha hwaange omweene, mba hoyera omukabo; nae koti lu taali ohukuhola hulw'ohudaha hwaange omweene, nguhola olwohuba Nasaae yaakumberesa ohukuhola.

¹⁸ Mani omukabo kwaange nikwo okuli yeena? Nikwo kuno sa: Ohuyaalira abaandu Emboosi Ndai ebihaya, nitehoonyera obunyala bwaange bw'ohuyaala Emboosi Ndai.

¹⁹ Kata nitaali omuwaambe eyiri abaandu boosi, omweene ndeehola omuwaambe w'abaandu boosi, ndeete abaandu abaangi eyiri Kristo.

²⁰ Eyiri Abayudaaya, ndeeyira koti Omuyudaaya, hu nyale ohuleeta Abayudaaya. Eyiri abatukwa neende amalako ka Musa, ndeeyira koti otukwa neende amalako ka Musa kata omweene nitaali ohutukwa neende amalako ka Musa hu nyale ohuleeta abatukwa neende amalako ka Musa.

²¹ Nae eyiri abali erwaanyi w'amalako ka Musa, ndeeyira koti oli erwaanyi w'amalako ka Musa, sino si syeekesa siti ndali mbula amalako ka Nasaae, nae siti ndali ndukwa neende amalako ka Kristo.

²² Eyiri abakata, ndeeyira koti omukata, hu nyale ohuleeta abakata. Ndeehola buli siindu eyiri abaandu boosi, hu nyale mu ngeri yoosi ohuwoniaho abaandi.

²³ Bino byoosi mbihola hulw'Emboosi Ndai, hu nyale ohukabana hu habi chiayo.

²⁴ Simumanyire muti mu mbiro abeeruhi boosi bakeranaanga, nae mulala yeeng'ene niye onyoolaanga esiyaanwa? Mani yiruha nochoomere ohunyoola esiyaanwa.

²⁵ Buli mwiiruhi w'embiro yefwiirisa mu biindu biingi. Bahola batyo, hu banyale ohunyoola esisiimo sinyaasiha lwaangu, nae efwe hulwaanilira omukabo kutahanyaasiha.

²⁶ Mani ese haba sinjiruha sa nimbula esichiririrwa, si ndi koti omulwaani otuupa ebikoonde byae mu miyaka sa;

²⁷ nae njuunia muno omubiri kwaange haandi ndaakutukira elalira, bitaba mbwe niimala ohuyaalira abaandu baandi Emboosi Ndai, ese omweene mbe owohwiikalirwa erwaanyi w'omukabo kwayo.