1 Abakoriito 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emisaango akati w'abafukiiriri

¹ Omuundu mulala hweeng'we naaba naali neende ohwekanyiirisa hwoosi hu waasye, yenyiira atye hu yoola yaacha enamalako mu moni w'abaandu bataali abaluungifu, mu bweyaango bw'ohuchia eyiri abaluungifu ba Nasaae eng'we?

² Eng'we haba simumanyire muti abaluungifu nibo abacha ohuheengera esyaalo omusaango? Mani nikali mbwe esyaalo sichia ohuheengerwa omusaango naang'we, mani mwahaba nimutanyala ohuyaaswa otusaango tudiidi-diidi tutyo?

³ Eng'we simumanyire muti, niifwe abacha ohuheengera kata neende bamalaika omusaango? Mani hwaaka yeena ohuhola hutyo, ebiindu bidiira sa hu bulamu buno!

⁴ Nimuba neende emisaango kifwaana kityo, lwasiina muchia nimukita mu moni waabo abalekeereswa batyo neende omukaanda kw'abafukiiriri?

⁵ Esoni hachibadiire! Mani mubwadyeeri bweene siriho mbwe mweeng'we mubulahoomo omuundu oliho neende amakesi kanyala ohukaya abafukiiriri basyeeng'we,

⁶ hu bulaanu omuundu yeteeho ohuchia enamalako ohusitaaka owaasye eyiri abakafiiri?

⁷ Mberi, ohwoola ohuba neende emisaango ky'ohuhalaka amalako syeekesa ohuhirwa hweeng'we. Lwasiina mani simunyala mwesimiirisira ohuholwa bubi? Lwasiina haba simunyala ohubachirwa?

⁸ Nae koti eng'we mwesi abeene mukosa haandi mubachira, haandi muhola mutyo Abaheerwa basyeeng'we.

⁹ Eng'we haba simumanyireho muti abo abataali abaluungifu haba sibachia ohwiingira mu bwaami bwa Nasaae? Muteebachaanga; kata ab'esifwaabi, oba ab'emisaambwa, oba abayirani, oba abakonana mu ngeri yitafukiirirwa,

¹⁰ kata abeebi, kata ab'okuliira, kata abameesi, kata abachalaasi, kata abanyaka haba sibachia ohwiingira mu bwaami bwa Nasaae daawe.

¹¹ Abaandi mweeng'we mwabechaanga mutyo hale. Nae kali mbwe eng'we mwamala ohwooswa, mwaalabisibwa, mwoola ohuholwa abahoyera mu liita ly'Omwaami Yesu Kristo haandi neende mu Mwooyo wa Nasaae weefwe.

Mwehoonyereenge emibiri kyeeng'we mu ngeri yiberesa Nasaae oluyaali

¹² “Ese hoyera ohuhola ebiindu byoosi,” nae ebiindu byoosi haba sibiri neende obuhoonyi daawe. “Ese hoyera ebiindu byoosi,” nae haba sinyala ohuwaambwa neende esiindu syoosi.

¹³ “Ebyaahulya byateebwao hulw'enda haandi enda hulw'ebyohulya.” Nae Nasaae achia ohubisihirisa byoombi syasilala. Omubiri haba sikwaholerwa esifwaabi, nae hulw'Omwaami, haandi Omwaami hulw'omubiri.

¹⁴ Haandi Nasaae niye owasyuuhisa Omwaami, haandi lwosi achia ohutusyuuhisa neende amaani kae.

¹⁵ Eng'we haba simumanyire muti, emibiri kyeeng'we n'ebituundu bya Kristo? Bulaanu haandi ndahabukula ebituundu bya Kristo mani ndamala ndaabihola byaaba eby'omuhasi mucheke? Haba kata nabudiidi!

¹⁶ Eng'we haba simumanyire muti oyo yeesi oweyambaania omweene hu muhasi mucheke aba yeehola omubiri mulala nae? Olwohuba, koti sa lu syandiikwa siti, “Boombi abo bachia ohweehola omubiri mulala.”

¹⁷ Nae oyo owaambanisibwa hu Omwaami, aba mulala nae mu mwooyo.

¹⁸ Mwebwaabe esifwaabi. Buli syonoono siindi syoosi, si muundu ahola siri sa erwaanyi w'omubiri; nae omusaacha wesifwaabi aba yonoona eyiri omubiri kwae omweene.

¹⁹ Ewe haba soomanyire oti omubiri kwao okwo n'enyuumba ya Mwooyo Mwoolerefu ohulimo, ku wanyoola ohutula eyiri Nasaae? Ewe haba sooli weeng'ene hu bwao;

²⁰ wamala ohukulwa neende obukusi buhoongo. Mani sakira ohoyere ohuberesa Nasaae oluyaali mu mubiri kwao.