1 Abakoriito 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuyaala hulomaloma hu Kristo Wabaambwa

¹ Ese koti lu ndeecha yi muli, eng'we baana beefwe, haba sindeecha nimbayaalira obuloli bw'esyaama bwa Nasaae mu mboosi ch'esilyoolyo sa oba ech'olukesi-kesi daawe.

² Olwohuba nindali nindamenya naang'we ndateemaho neende amaani maangi muno obutafwaana koti owamanyaho esiindu siindi syoosi ohutusaho Yesu Kristo yeeng'ene, haandi oyo owabaambwa hu musalabba.

³ Ndabamenyamo nimbonehana koti oli omukata muno haandi omuti muno haandi oteengereha sa;

⁴ mani enomanoma yaange alala neende amayaalo kaange haba sibyalichiingi mu mboosi hoongo muno ech'olukesi-kesi daawe, nae kalichiingi mu biholwa bya Mwooyo neende amaani byoong'ene,

⁵ hu bulaanu efukiirira yeeng'we yinyale ohutediira hu makesi k'abaandu sa nae yeeme mu maani ka Nasaae yeeng'ene.

Amakesi ka Nasaae

⁶ Nae kata katyo, nihuba nihuli mu baandu baangafu, huteemaho muno ohubataamo amakesi kosi, kata nibiba mbwe haba sikaba makesi akaba ak'oluse luno koti lu fwaana, oba koti ak'abeemeresi b'oluse luno kali, abacha sa ohuwaao.

⁷ Nae efwe hubataamo esyaama haandi amakesi keekisa aka Nasaae, ka Nasaae mweene yataao kata endaalo choosi nichitabaao hulw'oluyaali lweefwe.

⁸ Abulao kata mulala hu beemeresi b'oluse luno owamanyaho esiindu sino kata nabudiidi; olwohuba nikali mbwe bali nibamanya batyo, haba sibahabaambire Omwaami w'oluyaali.

⁹ Nae koti sa lu syandiikwa siti, “Esyo si moni yoosi yitaabonaho, kata neende ohutwi hwoosi ohuwuliraho, kata sa neende omwooyo kw'omuundu yeesi ohumanyirisaho, nisyo esiindu si Nasaae yatekehera abo abamuheera,”

¹⁰ Nae efwe Nasaae mweene yamala ohutubwiihulirao ohubitira mu Mwooyo. Olwohuba Mwooyo oyo ahosaanga buli siindu, kata ohwoolera elalira mu lwaalo wa Nasaae bweene.

¹¹ Olwohuba siri mbwe ni muundu siina oyo onyala ohumanya ebibaaso by'omuundu ohutusaho omwooyo kw'omuundu oyo okuba nikumulimo? Sakira kata katyo siri mbwe abulao omuundu yeesi onyala ohumanya ebibaaso bya Nasaae ohutusaho Mwooyo wa Nasaae.

¹² Bulaanu, efwe haba sihwaberesebwa mwooyo w'esyaalo sino, nae Mwooyo oyo otula mu Nasaae, hu hweemeo hunyale ohumanya ebiyaanwa bi Nasaae aba niyanyala ohutuberesa.

¹³ Mani fwesi hukaba omweene oyo nihwehoonyera emboosi chiteekeswaanga neende amakesi k'abaandu sa nae echeekeswaanga neende Mwooyo, natuumbulaanga obwadyeeri bw'omwooyo eyiri abo ababa nibali neende Mwooyo oyo.

¹⁴ Omuundu otaalimo Mwooyo haba saanyala ohunyoola ebiyaanwa bya Mwooyo wa Nasaae daawe, olwohuba ebyo biba sibiri neende amahuluundu yaali, haandi saaba naanyala ohubimanya olwohuba ebyeene ebyo bimanyirisibwaanga sa neende omwooyo kwoong'ene.

¹⁵ Omuundu olimo Mwooyo, aba neende amakesi kakabuhania ebiindu byoosi, nae omweene haba saanyala hukerakirwa neende omuundu wuundi yeesi.

¹⁶ “Olwohuba ni naanu mweene owanyala ohumanya ebibaaso by'Omwaami hwaanyale ohumukerakira?” Nae efwe huli neende ebibaaso bya Kristo.