1 Abakoriito 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Muumbonereho, koti lu ese mbonera hu Kristo.

Ohufuuniha omutwe nooli mu hwiinamira Nasaae

² Mbasiima muno olwohuba munjichulisaanga mu buli siindu, haandi mwadiira mwomiisa enjekesa yoosi koti lu ndabadiisa.

³ Nae ndaha mumanye muti Kristo niye omutwe kwa buli musaacha, nae omusaacha niye omutwe kw'omuhasi wae, haandi Nasaae niye omutwe kwa Kristo.

⁴ Mani omusaacha yeesi oba nalaama Nasaae oba n'ayaala emboosi ya Nasaae niyefwaalire ekofia yosi hu mutwe kwae aba ayaambia Kristo esoni.

⁵ Nae omuhasi yeesi nalaama Nasaae oba n'ayaala emboosi ya Nasaae nateeboyere esitaambaya hu mutwe kwae, aba ayaambia omusaacha wae esoni, haandi aba ali sa koti owebekere efwiiri hu mutwe kwae.

⁶ Olwohuba omuhasi nateeboya esitaambaya hu mutwe, mani ahoyere ohweebekaho efwiiri; nae nisiba nisy'esoni omuhasi ohweehendeesaho oba ohweebekaho efwiiri, lehe yeeboye esitaambaya hu mutwe.

⁷ Olwohuba omusaacha saahoyere ohweefuuniha esiindu hu mutwe, olwohuba niye esifwaanani haandi oluyaali lwa Nasaae; nae omuhasi niye oluyaali lw'omusaacha.

⁸ (Olwohuba omusaacha siyaholwa ohutula mu muhasi, nae omuhasi niye owatula mu musaacha.

⁹ Haandi kata omusaacha haba siyaloongerwa omuhasi, nae omuhasi niye owaloongerwa omusaacha.)

¹⁰ Esyo nisyo esikera omuhasi yahoyeera ohuba neende esitaambaya hu mutwe kwae, hulwa bamalaika.

¹¹ (Kata biri bityo, nae mu Omwaami, omuhasi sabaao ataali omusaacha, oba omusaacha yabaao ataali omuhasi;

¹² olwohuba koti lu muhasi yaholwa ohutula mu musaacha, nilwo lu siri bulaanu, omusaacha yeebulwa neende omuhasi. Nae ebiindu byoosi bitula ewa Nasaae.)

¹³ Mweheengereo abeene; mani sihoyera omuhasi ohulaama Nasaae nateeboyere esitaambaya hu mutwe?

¹⁴ Obulamu bwa buli ludaalo, haba sibubeekesa buti omusaacha ohuba neende efwiiri leeyi bimudiisa esoni?

¹⁵ Nae omuhasi naaba neende efwiiri leeyi, si sibeekesa siti eyo niyo esuunga yae? Olwohuba efwiiri lyae lyamubereswa libe ely'ohwebwiiha.

¹⁶ Nae omuundu yeesi naaba nasiyiingana, amanye ati efwe hubula oba abafukiiriri ba Nasaae boosi babula engeri yiindi yoosi yohwiinamiramo Nasaae.

Esy'engoloobe sy'Omwaami

¹⁷ Nae mu njekesa yiloondaho yino, haba simbasiima, olwohuba buli lu mwebuusa alala, bi muhola haba si bilai ohutusaho bibi bihaya.

¹⁸ Esitaangirira elalira, buli lu mwebuusa alala koti abafukiiriri, mbulira endi aliwo ohwekabulamo abeene-na-beene; haandi syesi haba sisifukiirira elalira,

¹⁹ olwohuba ohukabuhana-kabuhanamo huhoyere ohubaao, hu abo abali abadyeeri mweeng'we banyale ohumanyihana.

²⁰ Nimwesangaasira alala koti abafukiiriri, Esy'engoloobe sy'Omwaami haba sinisyo si mulichaanga.

²¹ Olwohuba mu hulya huno, omuundu mulala yemeeda ohulya sa ebyohulya byae, nae owuundi alumwa enjala haandi owuundi nae ameera.

²² Esyo siina syeene! Haba simuli neende enyuumba cheeng'we chi munyala ohuliiramo haandi neende ohung'weramo? Oba muli ohulekeresaanga abafukiiriri ba Nasaae, haandi mudiisa esoni abo abataali nabyo? Mbalomalomeho endye? Mbasiime mu siholwa sino syosi? Daawe, haba siinjia ohubasiima.

²³ Olwohuba Omwaami niye owamberesa esyo si ndabadiisa, mbwe Omwaami Yesu mu siro si yaliirwamo olukwe, yabukula omugaati,

²⁴ mani niyali n'amalire ohweebasa Nasaae, yaakudonyadonya, mani yaboola ati, “Kuno nikwo omubiri kwaange hulweeng'we. Muholeenge sino ohunjichulisa.”

²⁵ Mu ngeri nasilala eyo, nibamalire esy'engoloobe, yabukula esikoombe syosi n'aboola ati, “Esikoombe sino nisyo endagaano njaaha mu Mabaanga kaange. Buli lu munasing'wechaanga, musing'wecheenge, ohunjichulisa.”

²⁶ Olwohuba buli lu munaalicheenge hu omugaati kuno, haandi buli lu munang'wecheenge hu sikoombe sino, munalaangiriraanga ohufwa hw'Omwaami ohwoola lwaalikobolera.

²⁷ Mani sakira, oyo yeesi, onalicheenge omugaati kuno, oba onang'wecheenge esikoombe sy'Omwaami sino mu ngeri yitaahoyere, omusaango kunaamuhireenge hulw'ohunyaasa omubiri neende amabaanga k'Omwaami.

²⁸ Lehe buli muundu hweeng'we yelingaleenge omweene mberi, hwaamala alya hu omugaati kuno haandi ang'wa hu sikoombe sino.

²⁹ Olwohuba omuundu yeesi olya haandi yaang'wa nataamanyire omubiri kw'Omwaami, aba yeheengeera omweene omusaango.

³⁰ Esyo nisyo esikera abaangi mweeng'we muli abadehere haandi mulwaala, haandi abaandi bafwa.

³¹ Nae nihweheengera abeene omusaango mubwadyeeri, haba sihwahaheengeerwe omusaango.

³² Nae Omwaami n'atuheengera omusaango, aba atusaandya n'atukolola huhuhaye ohuheengerwa omusaango kutuhire alala neende esyaalo.

³³ Mani sakira basyaange, nimwiicha ohwebuusa alala ohulya, muliindaneenge.

³⁴ Omuundu yeesi naalumwa enjala, leheenge alya engo wae, ataali ao, munebuusaanga alala ohuheengerwa omusaango. Ebidiira hu biindu bidoong'ereyo, njia ohubakerakira niinjichire.