1 Abakoriito 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohukeraka hudiira hu misaambwa

¹ Basyaange ndaha mumanye muti, bakuuka yeefwe boosi bali aasi w'esireesi, haandi boosi baambuha enyaanja.

² Boosi babatiisibwa mu sireesi neende mu nyaanja baaba abaloondi ba Musa.

³ Mani boosi baalya hu syaahulya silala esyo esitula Muukulu

⁴ haandi baang'wa hu syohung'wa silala esyo esitula Muukulu. Olwohuba bang'wa hu maachi katulaanga mu lwaanda lwo Muukulu lwabaloondaanga, nihaandi olwaanda olwo lwali Kristo.

⁵ Nae kata katyo, boosi haba sibasangaasa Nasaae; olwohuba abaangi bafwiira mu siparara.

⁶ Bulaanu ebiindu bino byaholehana ohutulabula, hu huhaye ohwekoomba esyonoono koti lu bahola.

⁷ Mutaba abalaama emisaambwa koti lu baandi hu abo bali; koti lu syandiikwa siti, “Abaandu beehala aasi ohulya, neende ohung'wa, mani baasiingira ohuhina.”

⁸ Huteyingisaangaho kata nabudiidi mu byobudaamba koti lu baandi hu abo bahola, mani abaandu elifu amahumi kabiri-na-chidatu (23,000) baafwa hu ludaalo lulala.

⁹ Hutatemaangaho Omwaami koti lu baandi hu abo bahola, mani enjuha mbi muno chiabeeta.

¹⁰ Mutemulugunyaanga, koti lu baandi hu abo bahola mani baasihiriswa neende Omusuku.

¹¹ Bulaanu, ebiindu bino byoosi byabeeholehaho koti esyohulabula eyiri abadoong'ereo, haandi byandiikwa ohutusomesa, efwe abaliwo bulaanu hu njakamo y'esyaalo.

¹² Mani sakira mulehe oyo yeesi obaasa ati muluungifu omweene, yeliinde ahaye ohukwa.

¹³ Abulao esiteemo syaboolaho esitoolaanga hu buli muundu. Nasaae n'omweesikwa niye, mani haba saachia ohuleha ebiteemo bibahira amaani bibooleho. Nae buli siteemo sinechaanga, achia ohubaberesaanga engeri neende obeekuliraanga engira yohusihira, hu munyale ohusyesimiirisa.

¹⁴ Mani sakira, basyaange baheerwa, mutenamiraanga ebiloongaloongwe.

¹⁵ Nomanoma koti oboolera abaandu bali neende amakesi; abeene mweheengereo si mboola sino.

¹⁶ Esikoombe sy'ehabi sihwehoonyera hu meesa y'Omwaami haandi sihwebasiraho Nasaae, nisyo obulala bweefwe mu Mabaanga ka Kristo. Omugaati ku humekulamekulamo, nikwo obulala bweefwe mu mubiri kwa Kristo.

¹⁷ Olwohuba omugaati kuli mulala, kata hwahaba abaangi hutye, hukabana fweesi hu mugaati mulala.

¹⁸ Mubonereho hu baandu Abaisiraeli; abo abalya hu siyaanwa haba sibaba nibakabana hu alutaari?

¹⁹ Bulaanu siina syeene si mboola? Mboola endi aliwo ebyohulya biyaanirwa ebiloongaloongwe, oba endi emisaambwa kiriwo?

²⁰ Haba daawe. Mboola endi, ebyohulya bi bakafiiri bayaana, babiyaanira emisaambwa, nae haba sibabiyaanira Nasaae. Haba siindaha mube silala neende emisaambwa.

²¹ Simunyala ohung'wa hu sikoombe sy'Omwaami haandi mwaang'wa hu sikoombe sy'emisaambwa. Simunyala ohuba silala neende emeesa y'Omwaami, haandi mwaaba silala neende emeesa y'emisaambwa.

²² Hunyala ohunyoolesa Omwaami? Hunyala ohumuhira amaani?

²³ “Ebiindu byoosi bifukiirirwa.” Nae kata katyo, ebiindu byoosi haba sibyoombaha.

²⁴ Lehe omuundu yeesi ateekonyera ebilai byae yeeng'ene, nae akoonye ebilai by'abaasye.

²⁵ Mulye buli siindu sikusibwa mu siito ataali ohukana-kana hutulana mu hweelalihira hw'emyooyo kyeeng'we.

²⁶ Olwohuba, “esyaalo syoosi sy'Omwaami nisyo, neende buli siindu sisirimo.”

²⁷ Niwiichuhana mulala hu bakafiiri yabalaanga ohulya nae mani mwafukiirira ohuchia, mulicheenge buli si bababeresa nimutateeberesa mu myooyo kyeeng'we, emyooyo kyeeng'we kihaye ohwelalihirira.

²⁸ (Nae omuundu yeesi n'ababoolera ati, “Enyama yino yayaanirwa emisaambwa,” mani ohweema hu mbaasa y'omuundu obaboolere neende hulw'obulayi bw'omwooyo

²⁹ mboola obulai bw'omwooyo kwae, ataali okweeng'we, mutalichaanga enyama eyo.) Olwohuba, lwasiina omuundu wuundi niye oba niyaheengerao mu humanya hwaange?

³⁰ Ni mba nindeebasa Nasaae hulw'esyo siimba niindya, lwasiina heengerwa omusaango hulw'esiindu si ndya nindeebasa?

³¹ Sakira, syosi-syoosi syooba noohola, mu hulya oba mu hung'wa, siholeenge hulw'oluyaali lwa Nasaae.

³² Otanyolesaanga Abayudaaya oba Abagiriki oba abafukiiriri ba Nasaae,

³³ koti sa lu ndeemaho ohusaangaasa buli muundu mu buli siindu si hola, niteedahisira ebilai byaange omweene byoong'ene, nae ebilai by'abaangi, hu banyale ohuwonisibwa.