1 Abakoriito 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ohutula eyiri Paulo, owalaangwa sa neende obuheeri bwa Nasaae ohuba omutume wa Kristo Yesu, haandi ohutula eyiri Sositenesi mwaanaama.

² Eyiri omukaanda kw'abafukiiriri okuli Koriiti, eyiri abo abalabisirwa mu Kristo Yesu, abalaangwa ohuba abaluungifu, alala neende abo boosi abali buli abuundu woosi nibalangaanga eliita ly'Omwaami weefwe Yesu Kristo, haandi sidubaanie oli Omwaami waabwe haandi oweefwe fwesi:

³ Embabaasi cha Nasaae seefwe, neende omuleembe kw'Omwaami Yesu Kristo bibe naang'we.

Ehabi chiri mu Kristo

⁴ Ndeebasa muno Nasaae waange buli siha hulweeng'we hulw'embabaasi cha Nasaae chi ndabereserwa mu Kristo Yesu,

⁵ mbwe mu buli ngira yoosi, mwaholwa abayiinda mu mweene oyo mu nomanoma yoosi, haandi neende amakesi koosi

⁶ kata sa neende koti lu buloli budiira hu Kristo bwomiisibwa mweeng'we

⁷ ohubona mbwe abulao esyo si mutaali nasyo esidiira hu siyaanwa sya mwooyo, koti lu muli ohuliindiriraanga ohuboneswa hw'Omwaami weefwe Yesu Kristo;

⁸ oyo ochia ohubalera ohwoolera elalira hu njakamo, nimubulaho simudondobaane mu ndaalo eyo ech'Omwaami weefwe Yesu Kristo.

⁹ Nasaae n'omweesikwa, oyo owabalaanga ohwiingira mu bulala neende Omwaana wae, Yesu Kristo Omwaami weefwe.

Ohukabuhanamo mu mukaanda kw'Abafukiiriri

¹⁰ Ese ndi ohubalirira, basyaange, mu liita ly'Omwaami weefwe Yesu Kristo, endi eng'we mweesi munyale ohufukiirisania, haandi endi mweeng'we muhoya mwahaya ohubahoomo ohukabuhana-kabuhanamo, nae endi munyale ohweyambaania alala mu bibaaso bifwaanana, haandi neende mu huwuliirisania.

¹¹ Olwohuba syamala ohumboolerwa neende abaandu ba Kuloe mbwe eyo yiriyo obusoolo mweeng'we, eng'we abaheerwa.

¹² Si ndi ohuboola nisyo sino mbwe, buli muundu mweeng'we ali hulwae. Aliwo oboola ati “Ese ndi owa Paulo,” owuundi ati, “Ese ndi owa Apolo,” owuundi ati, “Ese ndi owa Keefa,” haandi yaabaao oboola ati, “Ese ndi owa Kristo.”

¹³ Mani Kristo wuno yakabuhanahoomo? Yali Paulo owabaambwa hulweeng'we? Oba mani eng'we mwabatiisibwaho mu liita lya Paulo?

¹⁴ Ese naange ndeebasa Nasaae waange, olwohuba ese sindabatiisaho omuundu yeesi ohutusaho Kirispo neende Gaayo;

¹⁵ awuundi owuundi yaheweereyo sa ohuboola ati ese ngaandi ndabatiisibwa mu liita lyao.

¹⁶ (Mubwadyeeri bweene, ese ndabatiisaho sa edaala lya Sitefaano. Ohuhira ao, siimanyire nindabatiisaho omuundu wuundi yeesi.)

¹⁷ Olwohuba Kristo haba siyanduma ohubatiisaanga, nae ohuyaalaanga emboosi ndai, haandi ataali neende amakesi kalyooyeresa daawe, awuundi amaani k'omusalabba kwa Kristo kahachalaasirwe.

Kristo Amaani haandi Amakesi ka Nasaae

¹⁸ Olwohuba emboosi yidiira hu musalabba, y'obusiru niyo eyiri abo abali ohukotaanga, nae eyiri abo abali ohuwonisibwaanga, niyo amaani ka Nasaae.

¹⁹ Olwohuba syamala ohwandiikwa siti, “Ese njia ohusihirisa amakesi k'abakesi, haandi ebikesi-kesi by'abakesi-kesi ese njia ohubyetooya.”

²⁰ Omusaacha mukesi ali yeena? Omwandiiki mweene ali yeena? Omuyiingani mumanyirifu weendaalo chino ali yeena? Haba si Nasaae niye owahola obusiru buno ohuba amakesi k'esyaalo?

²¹ Olwohuba Nasaae mu makesi kae yakayira abaandu ohumumanya ohubitira mu makesi kaabwe. Nae, syasaangaasa Nasaae ohubona mbwe ohubitira mu busiru bw'ebiindu bi huyaala bino, nga lu baandi babaasa, abo abafukiirira banyala baonisibwa.

²² Olwohuba Abayudaaya nabo baheera muno ohukoonyeresa ebilolero, nae Abagiriki nabo baheera muno ohukoonyeresa amakesi,

²³ nae efwe huyaala Kristo owabaambwa, oli esigiingi syegumulwaho eyiri Abayudaaya haandi esy'obusiru eyiri abaandu bateende,

²⁴ nae eyiri abo abali ohulaangwa, Abayudaaya neende Abagiriki sidubaanie, Kristo niye amaani ka Nasaae haandi niye amakesi ka Nasaae.

²⁵ Olwohuba obusiru bwa Nasaae buhirira amakesi k'abaandu eyale muno, haandi obukata bwa Nasaae buhirira amaani k'abaandu eyale muno.

²⁶ Eng'we mubaaseho hu hulaangwa hweeng'we, baana beefwe; abaangi hweeng'we haba simwali abakesi ohweema hu hola y'esyaalo, abaangi hweeng'we haandi simwali ab'amaani muno, haandi abaangi hweeng'we haba simwaliho abeebulwa ohutulana neende oluyaali luhoongo muno;

²⁷ nae Nasaae yadoola esyo esyali nisiri esisiru mu syaalo, ohudiisa esoni abakesi, Nasaae yadoola esyo esiri esikata mu syaalo, ohudiisa esoni ab'amaani,

²⁸ Nasaae yadoola esyo esiri esy'aasi haandi esirekereswa mu syaalo, kata neende ebiindi byali nibitaali ebiindu, ohuchalaasira elalira ebiindu byali nibiri ebiindu byeene,

²⁹ hu bulaanu abuleo omuundu mulya-busuma sa owunyala ohweniinia mu moni wa Nasaae.

³⁰ Oyo niye enjaako y'obulamu ohubitira mu Yesu Kristo, oyo yi Nasaae mweene yahola ohuba amakesi keefwe, obuluungifu bweefwe, haandi kata niye ohwooswa neende ohununulwa hweefwe;

³¹ mani hu bibe koti lu byandiikwa biti, “Mulehe oyo yeesi owehuduumbasa, yehuduumbasire mu Omwaami.”