Waroma 6 - UVORO GHWALOLI KWA WANDU WOSE

Kufwa kele kaung'a na kukala moyo kele Kristo

¹ Tighore ije ndamu, Tijuzile kukala kaung'eni eri mbazi ya Mlungu ijuzilike?

² Hata! Isi tanaifwilile kaung'a, tidimagha ije kukala kaung'eni sena?

³ Kwani mwaimanya iyi fulo: ngelo tebatizo kele kuwataniso na Kristo Jesu, tebatizo kele kuwataniso na kifwa chake.

⁴ Kwa ubatizo tanazikilo ngila mojori naye, na tikawatana na kifwa chake, eri selyi Kristo azusilo kufuma kifweni kwa ngila ya ubwaa ghwa Aba, natose tikale moyo kele umana mwishi.

⁵ Kwani ngera tiwataniso naye kwa ngila ya kifwa chake, tijewataniso naye kwa kuzuso kele umana selyi eluo.

⁶ Nesi tamanya kamba ulya mundu wetu wa kale wanaulagho na Kristo kele msalaba, eri zilya ndighi za kaung'a zihakilo, na sitakale sena wasunyi wa kaung'a.

⁷ Kwani mundu afwa wakala huru kufuma kele ndighi za kaung'a.

⁸ Ela ngera tifwanye na Kristo, tio na kudumusa kamba tijekalanya naye.

⁹ Kwani tamanya kamba Kristo wanazukiso kufuma kifweni na sefwighagha sena, kifwa sichiwesi ndighi ighulu yake.

¹⁰ Kifwa afwile ondeifwila kaung'a kamojori tu, na kukala moyo nako ndamu, ni kukala moyo kwa undu ghwa Mlungu.

¹¹ Na nanyose mukuririkanye kukala mwanafwile kele kaung'a, ela muo moyo kwa undu ghwa Mlungu kele kuwatana na Kristo Jesu.

¹² Kaung'a siyatawale sena mili yenyu yefwa, hata muziwate tamaa za mili yenyu.

¹³ Hata simwafunye kiungo chingi cha mili yenyu kwa kaung'a chitumio kwa ulaghelaghe, ela kufunyeni inyo wenyi kwa Mlungu sa wandu mfunyilo kufuma kifweni hata kele umana, na mkufunye putu kwake amtumie kwa ngila yake ya hachi.

¹⁴ Kaung'a siyamtawale; kwani inyo si muo isi ya Sheria kungi, ela muo isi ya mbazi ya Mlungu.

Wasunyi wa uhachi

¹⁵ Ndamu ije? Tidee kaung'a kwa kukala sitio isi ya sheria ela tio isi ya mbazi ya Mlungu? Hata!

¹⁶ Kwa fulo mwamanya kamba ilyi mwakufunya kukala wasunyi wemusikila mundu, mwakala wasunyi wa ulya mundu mumusikilagha-ngera ni wa kaung'a iyi iletagha kifwa, ango wa kuwata agha ghemdeagha msikilane na Mlungu.

¹⁷ Ela Mlungu akaso! Kwani ngelo moju moluo wasunyi wa kaung'a; ela ndamu mwawata na ngolo zenyu zose hachi mwaiona kele mafundiso mghapatile.

¹⁸ Mwanafungulo kele kaung'a na mwakala wasunyi wa uhachi.

¹⁹ Natumia malagho ghawanguwe kwa undu ghwa unyonge ghuo amweni kwenyu. Kwani selyi ngelo moju mokufunyile putu kukala wasunyi waluwe na wawase, kwa undu ghwa ulaghelaghe. Niko kwenyi imfweni ndamu mkufunye putu putu kukala wasunyi wa uhachi, kwa undu ghwa ghalye ghaelile.

²⁰ Ilyi moluo wasunyi wa kaung'a, mwoluo kulele na hachi.

²¹ Mwanapatile faida muni kwa kudea malagho ghemfwishagha waya ndamu? Ghepatikanagha kwa malagho sa agho ni kifwa!

²² Ela ndamu mwafungulo kufuma kele kaung'a na ninyo wasunyi wa Mlungu, Faida yenyu ni kueleso, na mwapata umana ghwa kale na kale.

²³ Kwani mshahara ghwa kaung'a ni kifwa, ela inosi lya tuu lya Mlungu ni umana ghwa kale na kale kele Kristo Jesu Bwana wetu.