Waroma 2 - UVORO GHWALOLI KWA WANDU WOSE

Utaghanyi ghwa Mlungu ghwa hachi

¹ Kwa hung'u, uwe mundu utaghanyagha wambenyu, hata ngera nuwe ani, suwesi lyekutetela. Kwani kwa kuwataghanya wambenyu, wakutaghanya uwe mwenyi, kwa kukala nawose wanadeagha malagho ghalye ghenyi wadeagha.

² Tamanya kamba kutaghanya kwa Mlungu ni kwa hachi ngelo etaghanyagha wandu wadeagha malagho sa agha.

³ Uwe mundu udeagha malagho agha ghenyi utaghanyagha nagho wambenyu! Ukilagha ije kutaghanyo ni Mlungu?

⁴ Ango ngera wamenya uloli mubwaa ghwake, kurumaghia kwake na kumuka luma kerumaghia. Simumanyagha kamba uloli ghwa Mlungu ni ghomdea mrihe?

⁵ Ela uwe wana ngolo ikulile na imangile, na wadea makwito ghako ghakale mabwaa kele Ijua lya hare ya Mlungu na kutaghanya kwa hachi kujeonekana.

⁶ Kwani Mlungu ujemlipa kila mundu kuirimana na madeo ghake.

⁷ Walye wandu wadeagha ghaloli na kuhada ubwaa ghwa Mlungu na ishima na umana, Mlungu uwahawagha umana ghwa kale na kale.

⁸ Ela walye wandu wakushaile wenyi na siweshaile fulo na weirimagha ghawase, hare na kubia kwa Mlungu kujewakalila.

⁹ Kujekala na masirimi na matiriro kwa wandu wose wedeagha ghawase, kudyowela Wayahudi, nama kwa wandu wa mbari nzima na wose.

¹⁰ Ela Mlungu ujewahawa ubwaa, ishima na sere walye wose wedeagha ghaloli, kudyowela Wayahudi na walye wa mbari nzima nawose.

¹¹ Kwani Mlungu sasaghulagha mundungi.

¹² Walye waideile kaung'a shighati ya Sheria ya Musa, wehaitagha hata ngera sani siwaweni sheria. Na walye wedeagha kaung'a na waweni Sheria wetaghanyogho kwa Sheria.

¹³ Kwani si kwa kusikila Sheria wandu wekalagha wahachi kwa Mlungu, ela ni kwa kudea gheo gha Sheria.

¹⁴ Wandu wa mbari nzima siwawesi Sheria, ela kila ngelo wedeagha wenyi gha Sheria, waonyeza icho chidimagha kudeo ni sheria hata ngera sani siwawesi sheria.

¹⁵ Mighendo yawe yaonyeza kamba sheria yanawandiko ngoloni kwawe. Ngolo zawe zashuhudia, maghelelo ghawe ghawashitakia na ngelo zimoju ghawatetela.

¹⁶ Kwa hung'u kuirimana na Ilagho Lyaloli ilyi nilyichilagha, niko kwenyi ijekala ilyo Ijua, Mlungu kwa ngila ya Jesu Kristo ujetaghanya malagho ghavisike ngoloni kwa wandu.

Wayahudi na Sheria

¹⁷ Na uwe ije? Wanakuitagha uwe mwenyi Myahudi; nawe wakusaghika na sheria na wanakukasagha na Mlungu;

¹⁸ wanaweni agha Mlungu ashaile udee na wanakufundise kele sheria kusaghula hachi;

¹⁹ wamanya kamba nuwe kilongozi wa vifondo na mlangazi ghwa walye weo kizeni,

²⁰ mundu ofundisa wazimu, na mwalimu wa wanake. Wanaweni putu kamba sheria yana kumanya kose na hachi.

²¹ Ndamu, uwe ufundisagha wazima, kudani sokufundisagha uwe mwenyi? Uwe uchilagha swaiwe, “Kudani waiwa uwe mwenyi?”

²² Wanaghoragha, “Swazinge, kudani uwe mwenyi uzingagha?” Wanamenyile sanamu, ela wanaiwagha vindu va hekalu.

²³ Wanakukasagha na sheria ya Mlungu, ije wanamufwishagha Mlungu waya kwa kuivunja Sheria?

²⁴ Mawandiko gha Kuela ghanaghoragha, “Kwa undu ghwenyu inyo Wayahudi, wandu wa mbari nzima waghora laghelaghe ighulu ya Izina lya Mlungu.”

²⁵ Kuchwigho kukalagha kwa faida ilyi wawata Sheria. Ela ilyi waivunja Sheria, kuchwigho kwako kukalagha si kuchwigho kungi.

²⁶ Ngera mundu wa mbari nzima sechwilo aziwata Sheria, Mlungu semdumusilagha sa kukala wanachwilo?

²⁷ Kwa hung'u wandu wa mbari nzima siwechwilo wejemtaghanya inyo Wayahudi, kwa kuvunja Sheria iwandiko na mwanachwilo, kwa kukala wo wanawatagha Sheria na siwachwilo.

²⁸ Myahudi wa fulo achwilo, si mundu wooneka shighati ango achwilo muli,

²⁹ ela ni Myahudi wa fulo ko mweni na achwilo ngoloni kwake, na iyi ni kazi ya Roho wa Mlungu, si ya Sheria iwandiko. Mundu sa uyu wakaso ni Mlungu, ela si wandu.