Waroma 16 - UVORO GHWALOLI KWA WANDU WOSE

Maroghoi ghake ghenyi

¹ Namumanyisa kwenyu wakwetu wa wake Fibi atumikilagha ikanisa lya Kenkrea.

² Mumhokere kele izina lya Bwana selyi wandu wa Mlungu wadeagha, na mumwarure kwa kila ngila eshayagha kufuma kwenyu. Kwani iye mwenyi ni mgheni waloli kwa wandu wengi na hata imi.

³ Nawaroghowa wana Priska na Akula, wadei kazi ya Kristo Jesu ngila mojori nemi.

⁴ Wandu wakungizile ndengweni kwa undu ghwangu, Nio nikewafunyila asanta, na si imi tu, ela na wandu wose wa makanisa gha wandu wa mbari nzima.

⁵ Nalyiroghowa ikanisa lyikoghanikilagha nyumba kwawe na lyose. Namroghowa mgheni wangu Epaineto, uyu eluo mundu wa hambiri kele Asia kumdumusa Kristo.

⁶ Namroghowa Mariamu, uyu adeile kazi kwa chadi kwa undu ghwenyu.

⁷ Nawaroghowa wana Androniko na Junia kichuku changu tefunganyo, wandu wamanyikane kele watumo na weluo Wakristo hambiri yangu.

⁸ Namroghowa Ampliato, mgheni wangu kele Bwana.

⁹ Nawaroghowa Urbano, mumbetu kele utumishi ghwa Kristo, na Staku mgheni wangu.

¹⁰ Namroghowa Apele, uyu ewo mdumusiliki kwa Kristo. Nawaroghowa walye weo kele nyumba ya Aristobulo.

¹¹ Namroghowa Herodiana Myahudi mumbetu, na wana wakwetu kele Bwana wa nyumba ya Narkisi.

¹² Nawaroghowa wana Trufena na Trufosa, walye wake wadei kazi kele kazi ya Bwana, na mgheni wangu Persis uyu adeile mengi kele kazi ya Bwana.

¹³ Namroghowa Rufasi ulya mdei kazi ya Bwana kwa chadi, na mee, uyu anideilagha sa mwana wake.

¹⁴ Nawaroghowa wana Asunkrito, Flegoni, Hermes, Patroba, Herma na wana wakwetu wose ngila mojori nawo.

¹⁵ Nawaroghowa wana Filologo na Julia, Nerea na wakwawe, na Olumpa na wandu wose wa Mlungu wakalanyagha nawo.

¹⁶ Roghowaneni kwa kususugana kiwanawakwetu. Makanisa gha Kristo ghose ghamroghowa.

Malagho ghemalila

¹⁷ Namvoya wana wakwetu: Mkulinde na walye wandu wesaragha wandu na kuhakila idumusi lya wandu, weo kinyume cha ghalye mafundiso mpatile, simwawatane nawo.

¹⁸ Kwani walye wadeagha malagho sagha, siwamtumikilagha Kristo Bwana wetu, ela watumikila vifu vawe venyi. Kwa malagho ghawe ghaloli na maheleo ghasingile, waembaemba wandu siwewesi makosa.

¹⁹ Kila mundu wanasikile gha kudumusilika kwenyu kele Injili na kwa undu ughu nio na kuboelo kwa undu ghwenyu. Nanashaile mkale walachu kele ghaloli, ela kele ulaghelaghe simwakale na makosa.

²⁰ Naye Mlungu wa sere, ujemfwasha Shetani isi ya maghulu ghenyu. Mbazi ya Bwana wetu Jesu ikale nenyo.

²¹ Timotheo mdei kazi ngila mojori nemi wamroghowa na hata wana Lukio, Jasoni na Sosipata, Wayahudi wambetu wamroghowa.

²² Tertio mwandiki wa iyi barua wamroghowa kwa maroghoi gha Kikristo.

²³ Gayo uyu nikalagha kwake na nyumba kwake ikanisa lyikoghanikilagha, wamroghowa. Erasto mwiki pesa kele muzi, na wakwetu Kwarto wamroghowa. [

²⁴ Mbazi ya Bwana wetu Jesu Kristo ikale nenyo inyose, Ameni.]

Ilombi lyemalila lya kukasa

²⁵ Ndamu timhawe Mlungu ubwaa. Niye edimagha kumumangisa putu putu kele idumusi, kuirimana na Ilagho Lyaloli nalyichila lya uvoro ighulu ya Jesu Kristo, na kwa kuirimana na kufunukulo kwa ilya hachi yeluo ivisike kwa ngelo ndele zaita.

²⁶ Ela ndamu ilya hachi yamalila kufunukulo mwazi kwa ngila ya mawandiko gha wana tondolo; na kwa mlomu ghwa Mlungu ewo moyo yamanyikana kwa mbari zose, eri wose wadumuse na kumsikila.

²⁷ Kwa Mlungu mumojori, ewo na ulachu ghose keng'weri, kukale ubwaa kwa ngila ya Kristo Jesu hata kale na kale. Ameni.