Waroma 15 - UVORO GHWALOLI KWA WANDU WOSE

Waboele wazima, swakuboele uwe mwenyi

¹ Isi tio timangile kele idumusi, yanafweni tiwawarure wanyonge kutuka misigo yawe. Siifweni tidee selyi tishaile isi wenyi.

² Ela yanafweni kila mumoju amuboele mumbawe kwa undu ghwa uloli ghwake, eri amwaghale kele idumusi.

³ Kwani Kristo sakuboelele iye mwenyi, ela kuirima selyi Mawandiko gha Kuela gheghoragha, “Masholelo ghalye wakusholelele ghananipatile imi.”

⁴ Kila ilagho lyiwandiko kele Mawandiko gha Kuela lyanawandiko kwa mafundiso ghetu, eri tikale na kukoserea kele kurumaghia na kukumbana ngolo tipatagha kwa Mawandiko gha Kuela.

⁵ Ndamu Mlungu uyu arumaghiagha na kukumba ngolo, umdimisagha inyo kukala na ngolo seyo yenyi ghati yenyu kwa kuirimira fwana ya Kristo Jesu,

⁶ eri kamba inyose kwa lwaka lumojori mumkase Mlungu na Aba wa Bwana wetu Jesu Kristo.

Injili ya wandu wa mbari nzima

⁷ Kwa hung'u karibishaneni, kwa undu ghwa ubwaa ghwa Mlungu selyi Kristo amkaribishe inyo.

⁸ Kwa kukala nendemuuza kamba, Kristo wanakalile mtumishi wa Wayahudi eri awaonyeze kamba Mlungu ni mdumusiliki naye ujeghakatisa malagano awaikilile wana ake,

⁹ na sena ujewadimisa wandu wa mbari nzima kumkasa Mlungu kwa mbazi yake. Selyi Mawandiko gha Kuela gheghoragha, “Kwa hung'u nijekulika ghati ya wandu wa mbari nzima; Nijeimba lumbo lolika izina lyako.”

¹⁰ Sena ghaghora, “Boeloni inyo mbari nzima, ngila mojori na wandu wa Mlungu.”

¹¹ Na sena andu kumoju ghaghora, “Mkaseni Bwana mbari zose; Mkaseni wandu wose!”

¹² Na sena Isaya waghora, “Mundu mumoju wa kivali cha Jese ukuja naye ujeuka atawale mbari zose; nawo wejekala na ikosereo kwake.”

¹³ Mlungu ewo kirimba cha ikosereo, amjuze maboelo ghose na sere kwa ngila ya idumusi kwake, eri ikosereo lyijuzile kuzeguwa kwa ndighi za Roho wa Kuela.

Chausa cha Paulo kuwandika kiing'oni

¹⁴ Wana wakwetu: Imi mwenyi namanya kamba mwanajule ghaloli, kumanya kose na mwadima kufundisana inyo wenyi!

¹⁵ Ela kele iyi barua naghora sikweo na wogha ghungi malagho ghamoju neshaile kumkumbusa. Nakala sewesi wogha kwa undu ghwa mbazi nihawilo ni Mlungu,

¹⁶ yekala mtumishi wa Kristo Jesu kwa kazi ya wandu wa mbari nzima. Nadea kazi sa mkohani yechila ilagho lyaloli kufuma kwa Mlungu, eri kamba wandu wa mbari nzima wakufunye wakale sadaka idumusilogho ni Mlungu ieleso ni Roho wa Kuela.

¹⁷ Kwa hung'u, kele kuwataniso na Kristo Jesu, nadima kukukasa kwa utumishi ghwangu kwa Mlungu.

¹⁸ Nijekala sewesi wogha kughora ghalye ghenyi Kristo adeile kwa ngila yangu, kulongoza wandu wa mbari nzima wamsikile Mlungu kwa malagho na madeo;

¹⁹ Kwa ndighi za mwakilimbita na mashiniko, na kwa ndighi za Roho wa Mlungu. Na kwa hung'u, kele kutamba kose kufuma Jerusalemu hata Iluriko, nanachilile kamare Ilagho Lyaloli lya Kristo.

²⁰ Tamaa yangu ngelo zose ni kuchila Ilagho Lyaloli andu Kristo sesikilo, eri sawaghale kele msingi ghuikilo ni mundu mzima.

²¹ Selyi Mawandiko gha Kuela gheghoragha, “Walye siweghorerero ighulu yake wejeona, na walye siwesikile wejetambukilo.”

Paulo kupanga kughenda Roma

²² Kwa undu ughu naimo ngelo nyingi kuja kwenyu.

²³ Ela ndamu andu namalila kazi yangu kele agha masanga, na kwa kukala kwa miaka mingi neshaile kuja kumwona, ndamu nakoserea kuja.

²⁴ Naelelia kuonana nenyo nikeita kughenda Spaini; na inyo muniwarure kughenda alye, nyuma yekalanya nenyo kwa maboelo kwa ngelo njache.

²⁵ Ela indakwenyi, nendeghenda Jerusalemu kuwatumikila wandu wa Mlungu alye.

²⁶ Kwani makanisa gha Makedonia na Akaya wanafunyile kwa kushaya wenyi sadaka yewarura wakiwa wa wandu wa Mlungu alye Jerusalemu.

²⁷ Nawo wanaonile wenyi wadea hung'u. Ela kwa fulo, weluo na hachi yewarura wakiwa walye, kwa kukala wanasarire mibaraka yawe ya kiroho kwa wandu wa mbari nzima, na kwa hung'u wandu wa mbari nzima yanafweni wawatumikile Wayahudi kwa mibaraka yawe ya vilambo va urumengu.

²⁸ Ilyi namalila iyi kazi na nikawahawa pesa zose zichangilo kwa undu ghwawe, nijeuka kughenda Spaini na nijeitila kwenyu nikeghenda alye.

²⁹ Ngelo nikujagha kwenyu, namanya kamba nijeja ngila mojori na mubaraka ghuketi ghwa Kristo.

³⁰ Nendemlomba, wana wakwetu kwa undu ghwa Bwana wetu Jesu Kristo na kwa mashayo ghefumagha kwa Roho, mwatane nemi kele kunilombela Mlungu.

³¹ Nilombeleni kamba nilindo banana kwa wandu siwedumuse wa Judea na kamba utumishi ghwangu Jerusalemu ghudumusilo ni wandu wa Mlungu alye.

³² Na aho nijemjila na maboelo ghaketi ikakala ni mashayo gha Mlungu, na nijeboelo kuzumua ngila mojori nenyo.

³³ Mlungu wa sere akale nenyo inyose, Ameni.