Waroma 14 - UVORO GHWALOLI KWA WANDU WOSE

Swamutaghanye wakwenyu

¹ Mundu ewo na idumusi ichache, mumhokere. Ela simwadee nganyi naye ighulu ya maghelelo ghake ghenyi.

² Mundu mumoju kwa idumusi wanalyighagha kila kindu, ela mnyonge wanalyighagha mbogha zenyi.

³ Mundu elyighagha vindu vose, samumenye uyu sedimagha kulya; naye mundu alyighagha mbogha zenyi samtaghanye uyu elyighagha kila kindu, kwa kukala Mlungu wamdumusila.

⁴ Nuwe ani hata umtaghanye mtumishi wa mundu mzima? Ni ighulu ya Bwana wake emanyagha kamba uwo kimusi ango wagwa. Naye ujemanga kwa kukala Bwana wadima kumdea amange.

⁵ Mundu mumoju wanaririkanyiragha ijua imoju kukala ibwaa; ngelo mundu mumoju eririkanyiragha majua ghose kukala karakara. Kila mundu yanamfweni airime maririkanyo ghake ghenyi.

⁶ Uyo wose eririkanyagha ijua imoju kukala ibwaa, wanadeagha hung'u kwa kumhawa Bwana ishima; naye uyo wose alyighagha kila kindu wanadeagha hung'u kwa kumhawa Bwana ishima, wanamfunyilagha Mlungu asanta kwa chakulya. Naye uwo wose aleghagha kulya vindu vimoju wanadeagha hung'u kwa kumhawa Mlungu ishima, naye wanamfunyilagha Mlungu asanta.

⁷ Sikwesi mundungi wetu akalagha moyo kwa iye mwenyi, hata sikwesi mundungi wetu afwighagha kwa iye mwenyi.

⁸ Ngera takala moyo, takala moyo kwa undu ghwa Bwana na ngera tafwa, tafwa kwa undu ghwa Bwana. Kwa hung'u ndamu, ngera takala moyo ango tafwa, nisi wa Bwana.

⁹ Kwani Kristo wanafwile kazuka eri akale Bwana wa weo moyo na wafwile.

¹⁰ Ndamu uwe, kudani umtaghanyagha wakwenyu? Ango kudani umumenyesagha wakwenyu? Kwani itose tijemanga hambiri ya Mlungu kutaghanyo.

¹¹ Kwani Mawandiko gha Kuela ghaghamba, “Selyi nio moyo, waghora Bwana, Kila mundu ujedyaya ngokoro hambiri yangu, na kila mundu ujeghamba kamba imi ni Mlungu.”

¹² Kwa hung'u kila mumoju wetu, ujeghora malagho ghake mwenyi hambiri ya Mlungu.

Swamdee wakwenyu agwe

¹³ Kwa hung'u sitataghanye, ela kibalo chake, simwadee ilagho lyingi lyidimagha kumdea wakwenyu kukwalo, ango kungila kele kaung'a.

¹⁴ Kulya kuwataniso kwangu na Bwana Jesu, kwanidea nimanye kamare kamba sikwesi kindu chiluwe kwa cho chenyi; ela ilyi mundu adumusa kamba kindu chingi chanaluwe, aho chikalagha chaluwa kwake.

¹⁵ Ilyi wamdea wakwenyu awasilo kwa undu ghwa kindu ulyighagha aho ni kughora suo na mashayo. Swadee chakulya ulyighagha chimhaitise mundu afwililo ni Kristo!

¹⁶ Swadee icho ughelelagha ni chaloli kukala chiwase.

¹⁷ Kwani uzuri ghwa Mlungu si kulya na kunwa, ela ni hachi, sere, na maboelo ghalye ghefunyogho ni Roho wa Kuela.

¹⁸ Naye uyo wose emtumikilagha Kristo kwa ngila iyi, umuboelagha Mlungu na wandu.

¹⁹ Kwa hung'u ni suti tidee ngelo zose ghalye malagho ghedimagha kuleta sere na ghedima kungizana ndighi.

²⁰ Simwahakile kazi ya Mlungu kwa undu ghwa chakulya. Vakulya vose ni valoli kulya, ela ni laghelaghe kulya chakulya chidimagha kumdea mundu mumoju angile kaung'eni.

²¹ Ilagho lyio lyaloli ni kulegha kulya nyama, kunwa divei ango kudea ilagho lyingi lyidimagha kumdea wakwenyu agwe.

²² Wata malagho agha waghadumusila ghati yako na Mlungu. Uwo na maboelo ulya mundu ngolo yake siyemtaghanyagha.

²³ Ela ilyi akala na ngera kwa chakulya elyighagha, Mlungu umtaghanyagha ilyi alya, kwa kukala sadeile hung'u kwa idumusi. Na icho chose sichefumanyagha na idumusi ni kaung'a.