Waroma 13 - UVORO GHWALOLI KWA WANDU WOSE

Ghafweni kudeila wabwaa wa isanga

¹ Kila mundu yanamfweni kusikila wabwaa wa isanga kwa kukala sikwesi wabwaa wa isanga wengi wekalagha sikweo na kushaya kwa Mlungu; na wabwaa wose weo wendeiko ni Mlungu.

² Uwo wose ewo kinyume cha mubwaa wa isanga uwo kinyume cha agha Mlungu aikile, naye edeagha hung'u ukuletelagha mwenyi kutaghanyo.

³ Kwani wabwaa siwaoghogho ni walye wadeagha ghaloli, ela walye wadeagha laghelaghe. Wanashaile swamwoghe mubwaa? Dea gheo ghaloli, naye ujekulika.

⁴ Kwani iye ni mtumishi wa Mlungu adeagha kazi kwa undu ghwa uloli ghwako. Ela ilyi wadea laghelaghe, mwoghe, kwani wana udimo ghofunya azabu. Iye ni mtumishi wa Mlungu wokatisa hare ya Mlungu kwa walye wedeagha ghawase.

⁵ Kwa hung'u ni suti muwasikile wabwaa wa isanga, si kwa undu ghwa azabu tu, ela ni kwa kukala ngoloni niko kwenyi uuzogho.

⁶ Ilyi nilyo lyimdeagha mlipe kodi, kwa kukala wabwaa wanadeagha kazi zawe andu kumojori na Mlungu.

⁷ Walipeni vose wemlailagha; lipeni ushuru na kodi, na waogheni na kuwahawa ishima wabwaa wose.

Lyimfweni kila mumoju kwa mumbawe

⁸ Simwalailo ni mundungi, deni yenyu ikale ni kushayana tu. Uwo wose amshaile mumbawe waziwata sheria.

⁹ Milomu ighoragha, “Swazinge; Swaulaghe, Swaiwe; Swakale na iziso,” milomu ii yose ngila mojori na mizima, yangizo kele mlomu ghumojori, “Mushaye mumbenyu sa uwe mwenyi.”

¹⁰ Uwo wose amushaile mumbawe sedimagha lyingi kumdeila laghelaghe. Kuwashaya wambetu ni kuiwata sheria yose.

¹¹ Ni suti mdee hung'u, kwa kukala mwaimanya ni ngelo muni iyi tio nayo; kwani iyi ni ngelo yenyu yeuka kufuma haring'eni. Kwani ndamu ngelo yekizo iwo avui kuchumba ilya ngelo tedumuse.

¹² Kiro chendedua, na kondeela. Kwa hung'u tisighe ghalye malagho gha kiza, na tiwate mata zelwana mlangazini.

¹³ Tighende kirani ndamu, sa wandu wa mlangazi; si kwa lwafuo ango kunarua, si kwa fete ango uzingi si kwa kondo ango iziso,

¹⁴ ela ni kwa kumurwara Bwana Jesu Kristo, na kulegha kuihawa ngolo ya kikaung'a ya kidamu, kukatisa tamaa zake.