Waroma 12 - UVORO GHWALOLI KWA WANDU WOSE

Kukala kele utumishi ghwa Mlungu

¹ Kwa hung'u wana wakwetu, kwa kukala Mbazi ya Mlungu ni mbwaa kwetu, namlomba: Mkufunye inyo wenyi kwa Mlungu sa sadaka, iwo moyo ielile na imuboelagha Mlungu. Ughu nigho utasi ghumfweni kumtasa Mlungu.

² Simwairime gha urumengu ughu, ela mghalulo ni Mlungu komweni kwa ngila yeghalula maghelelo ghenyu. Nao ima mdime kumanya mashayo gha Mlungu, na ilyo lyio lyaloli lyemuboela na lyiketi.

³ Na kwa undu ghwa mbazi nihawilo ni Mlungu, ndemuza inyose: simwakuririkanyile inyo wenyi kukala wabwaa kuchumba selyi imfweni. Ela maririkanyo ghenyu ghakale ghafweni, na kila mumoju apime mwenyi idumusi ilyi ahawilo ni Mlungu.

⁴ Kwani mili yetu iwo na viungo vingi na kila kimoju chio na kazi yake.

⁵ Ni hung'u kwenyi nesi hata ngera sani nisi wengi, nisi muli ghumojori ghuwataniso na Kristo na itose tanawataniso sa viungo kele muli ghumojori.

⁶ Kwa hung'u titumie manosi ghetu sighefwanane, kwa kuirimana na mbazi ilya Mlungu atihawile. Ngera inosi lyetu ni kughora ilagho lya Mlungu, tighore kuirimana na lyilya idumusi tihawilo.

⁷ Ngera ni kutumika, ni suti titumike. Ngera ni kufundisa ni suti tifundise.

⁸ Ngera ni kuwakumba ngolo wazima ni suti tidee hung'o. Uyo wose esaragha na wazima ichi ewo nacho, ni suti asare kwa ishima: Uyu wose ewo na nguma ni suti akale na chadi kele kazi yake, uyo wose ewo na mbazi ni suti adee kwa kuboelo.

⁹ Mashayo ni suti ghakale ghaketi putu putu. Mumenye ghalye ghawase na mwatane na ghaloli.

¹⁰ Mshayane hachi yenyi sa wana wakwetu kele Kristo na kila mumoju amhawe mumbawe ishima.

¹¹ Mkale na chadi kazini na simwakale waghadi. Mumtumikile Bwana kwa ngolo yekukufunya.

¹² Mkoseree kwa maboelo, mrumaghie kwa matiriro na kulomba ngelo zose.

¹³ Wahaweni wandu wa Mlungu ivi washaile na nyumba kwenyu muwakaribishe wagheni.

¹⁴ Mulombe Mlungu awabarikie awa wemutiriragha mumlombe awabarikie, simwawawanyize.

¹⁵ Boeloni na awa weo na kuboelo na mulile na awa welilagha.

¹⁶ Wadeileni wandu wose karakara. Hata simwakukase, ela mukufwananise na wandu wa isi. Simwakuone inyo wenyi kukala walachu kuchumba.

¹⁷ Ngera mundungi amdeile laghelaghe, simwalwanile. Timeni kudea agha wandu wose weonagha ni ghaloli.

¹⁸ Mdee selyi mdimagha kukala na sere na wandu wose.

¹⁹ Simwalwanile wagheni wangu, ela msighe hare ya Mlungu idee kazi. Kwani Mawandiko gha Kuela gheghoragha, “Imi nijelwanila, imi nijelipa, aghora Bwana.”

²⁰ Ela kibalo chake, Mawandiko gha Kuela ghaghora, “Ngera mumaiza wako ewo na njala, mlyise, ngera ewo na kau mhawe chenwa; kwani kwa ngila iyi ujemufwisha waya sa kumtukisa makala gha moto kele chongo chake.”

²¹ Simwasimo ni ulaghelaghe, ela ghusimeni ulaghelaghe kwa kudea ghaloli.