Waroma 10 - UVORO GHWALOLI KWA WANDU WOSE

¹ Wana wakwetu, lyangu nishaile na ngolo yangu ni kamba wandu wa mbari yangu wakizo. Nemi nawalombela Mlungu.

² Nemi nadima kuwashuhudia kamba wanakufunyile kwa Mlungu. Ela kukufunya kwawe sikuwo kele umanyi ghwa fulo.

³ Kwani kwa kulegha kumanya hachi ifumagha kwa Mlungu wahada ngila zawe wenyi, na kwa hung'u siwakuseleze wenyi kele ngila ya Mlungu iwaikagha wandu kele hachi.

⁴ Kwani Kristo wanaimalile Sheria, eri kila mundu edumusagha adeo kukala mhachi na Mlungu.

Ukizi ni kwa wose

⁵ Agha nigho Musa awandike ighulu ya kukala na hachi na Mlungu kwa kuwata Sheria. “Uwo wose edeagha selyi sheria ighoragha ujekala moyo kwa iyo.”

⁶ Ela agha nigho ghaghoriro ighulu ya kudeo mhachi na Mlungu kwa ngila ya idumusi. “Simwaghore inyo wenyi, Nani ejokagha mlunguni?” (Eri amseleze Kristo).

⁷ “Hata simwaghore, Nani engilagha urumenguni ko mweni?” (Eri amfunye Kristo kufuma kifweni).

⁸ Ela Mawandiko gheghoragha ije? “Ilagho lya Mlungu lyio avui newe, kele mlomu ghwako na ngoloni kwako” ilyi ni ilagho lya idumusi tilyichilagha.

⁹ Ilyi waghora na mlomu ghwako, “Jesu ni Bwana” na wadumusa ngoloni kwako kamba Mlungu wanamzusile kufuma kifweni, ujekizo.

¹⁰ Kwani kwa kudumusa ngoloni kwetu tapata hachi kwa Mlungu, taghora na milomu yetu na takizo.

¹¹ Mawandiko gha Kuela ghaghora, “Uwo wose emdumusagha sefwishikagha waya.”

¹² Ilyi ni kwa kila mundu, kwa kukala sikwesi machumbano kwa Wayahudi na wandu wa mbari nzima. Mlungu ni Bwana wa wose na wanawabarikiagha wose wamghora.

¹³ Selyi Mawandiko gha Kuela ghaghoragha, “Uwo wose elombagha kwa Izina lya Bwana ujekila.”

¹⁴ Ela wemughoragha ije, ngera siwemdumuse? Na wedumusagha ije, ngera siwesikile Ilagho? Na wesikilagha ije, ngera Ilagho silyechililo?

¹⁵ Na Ilagho lyichilogho ije, ngera wachili siwetumilo? Selyi Mawandiko gha Kuela ghaghora, “Ni kwaloli sani kuwaona walye wechilagha Ilagho Lyaloli?”

¹⁶ Ela si wandu wose welyihokeragha Ilagho Lyaloli. Kwani Isaya waghora, “Bwana nani adumuse ilagho lyetu?”

¹⁷ Kwa hung'u, idumusi lyeja kwa ngila ya kusikila ilagho na ilagho lyafumanya na kumchila Kristo.

¹⁸ Ela nendekotela: Ado ni fulo siwasikile ilyo ilagho? Namanya wanalyisikile; selyi Mawandiko gha Kuela gheghoragha, “Nywaka zawe zaghenda kila andu urumenguni; malagho ghawe ghafika hata koduila urumengu.”

¹⁹ Sena nendekotela: Ado wandu wa Israeli siwamanyile? Musa mwenyi ni wa hambiri kutumbulila: “Nijemdea mkale na iziso kwa wandu siweo mbari; Nijemdea mwasilo ni mbari ya wandu wazimu.”

²⁰ Naye Isaya waghora kiung'oni, “Nanaonilo ni walye siweluo wekenihada; Nanaonekane na walye siweluo wekenikotela.”

²¹ Ela ighulu ya Israeli waghora, “Nanaghorore mikonu yangu msenya dii kwa wandu wasikiriwe na siwesikilagha.”