Waroma 1 - UVORO GHWALOLI KWA WANDU WOSE

¹ Paulo, mtumishi wa Kristo Jesu, na mtumo asaghulo na apang'ilo ni Mlungu kwa undu ghwa kuchila Ilagho Lyake Lyaloli.

² Ko kale Mlungu owalagile wandu ighulu ya Ilagho Lyaloli kwa ngila ya wana tondolo wake kele Mawandiko gha Kuela.

³ Ilagho Lyaloli ilyi lyeluo ighulu ya Mwana wake, Bwana wetu Jesu Kristo: eluo kidamu wa kivali cha Daudi;

⁴ ela kiroho oluo wa Kuela Mwana wa Mlungu, kwa udimo mubwaa kazuka kufuma kwa wafwa.

⁵ Na kwa ngila yake nanapatile mbazi yekala mtumo, eri niwalongoze wandu wa mbari zose kele kumdumusa na kumsikila.

⁶ Kele awo, inyo nanyose mwanapang'ilo mkale wandu wake Jesu Kristo.

⁷ Kwa hung'u namwandikila inyose mkalagha Roma mshailo ni Mlungu uyu amsaghule kukala wake. Mbazi na sere ya Mlungu Aba wetu na Bwana Jesu Kristo ikale kwenyu.

Ilombi lyefunya asanta

⁸ Hambiri ya ghose namfunyila asanta Mlungu wangu kwa ngila ya Jesu Kristo kwa undu ghwenyu inyose, kwa kukala idumusi Lyenyu lyasikilika urumenguni kose.

⁹ Mlungu uyu nimtumikilagha kwa ngolo yangu yose kele kuchila Ilagho Lyaloli lya Mwana wake, niye shahidi amanya kamba nanamkumbukagha

¹⁰ kila ngelo kele malombi ghangu. Nemi namlomba Mlungu kwa mashayo ghake anipatile ulalo ghweja kwenyu kafwani.

¹¹ Kwani nanashaile na ndighi kumwona eri nimsarire manosi gha Roho na nimumangise.

¹² Ni kughamba, tihawane ndighi, idumusi lyenyu lyinimangise na idumusi lyangu lyimumangise.

¹³ Ela wana wakwetu nanashaile mumanye kamba ni kengi neshaile kuja kwenyu, ela hata hung'u sidimile kuja. Nanashaile nipate mavalo ghaloli kwenyu, selyi nipatile andu kuzima kwa wandu wa mbari nzima.

¹⁴ Kwani nio na deni kwa Wagiriki na wandu siweo Wagiriki, kwa weo na elimu na siwewesi elimu.

¹⁵ Kwa hung'u nio na beha yechila Ilagho Lyaloli kwenyu inyo muo Roma.

Ndighi ya Injili

¹⁶ Imi nadumusa kamare Injili, kwani ni ndighi ya Mlungu iwakizagha wandu wose wadumusa: Wayahudi na siweo Wayahudi.

¹⁷ Kwa kukala Injili yaonyeza selyi Mlungu awadeagha wandu wakale wahachi kwa ngila ya idumusi, kufuma kudyowa hata kudua. Selyi Mawandiko gha Kuela gheghoragha, “Uyu adeo mhachi ni Mlungu kwa idumusi, ukalagha moyo”.

Ikosa lya mdamu

¹⁸ Hare ya Mlungu yaonekana kufuma mlunguni, nayo yajila kaung'a na ulaghelaghe ghose ghwa wandu awa weimagha hachi siyamanyo.

¹⁹ Kwani ghose ghedimagha kumanyo ni wandu, waghamanya, kwa kukala Mlungu wawafunukulila.

²⁰ Kufuma Mlungu aumba urumengu, hata ngera sani seonekagha, ndighi zake na ulungu ghwake ghwamanyo. Wandu waghumanya kwa viumbo va Mlungu. Kwa hung'u siwawesi lyekutetela.

²¹ Hata ngera sani wanamumanyile Mlungu, siwamuhawile ishima sa Mlungu, hata siwamfunyilile asanta. Kwani maririkanyo ghawe ghanawase na akili zawe ni nduu zijulo ni kiza.

²² Wanaghoragha ni walachu, ela ni wazimu,

²³ kibalo chemtasa Mlungu, watasa sanamu zifwanane na mdamu, nyonyi, nyamandu ango nyamandu zikukurughusagha.

²⁴ Kwa undu ughu Mlungu wawasigha kele tamaa zawe ziwase, nawo wadea malagho ghefwisha waya mili yawe.

²⁵ Waghalula hachi ya Mlungu kukala ndimi: watasa na kutumikila vindu viumbilo ni Mlungu kibalo cha Muumbi wawe, uyu afweni akaso kwa kale na kale Ameni.

²⁶ Kwa undu ughu, Mlungu wawasigha wairime tamaa zefwisha waya. Hata wake wawe waghalula matumizi gha selyi waumbilo kwa ngila iyo kinyume cha selyi waumbilo.

²⁷ Nawo walume wasigha wake, waonelana beha iwase wenyi. Walume wadeilana malagho ghefwisha waya, kwa hung'u wakupatila makwito ghawafweni kwa ulaghelaghe ghwawe.

²⁸ Na kwa kukala wandu walegha kumtambula Mlungu, Mlungu wawasigha walaghaye kele maririkanyo ghawe ghawase.

²⁹ Nawo wajulo ni malaghelaghe gha kila mbari, uduu, tamaa ya vindu va wandu na kudeilana ghawase. Wajula iziso, kuulagha, kondo, ndimi na kuririkanyirana ghawase; waguna,

³⁰ na kuzighirirana; na ni wamaiza kwa Mlungu, wazarumi, weo na ngolo yekukuona, na kukukasa, weo na kuhada ngila zedea ghawase, siwewasikilagha wavali wawe;

³¹ ni wandu siwemanyagha; siwekatisagha malagano ghawe, na waomilo ni ngolo na siwefwilagha waya.

³² Wanaweni kamba sheria ya Mlungu ighambagha wandu weo hung'u yanafweni wafwe. Ela, wo waendelea kudea malagho agho ghenyi, na wadumusilana na walye wadeagha malagho sa agho.