Wakolosai 4 - UVORO GHWALOLI KWA WANDU WOSE

¹ Nenyo mabwana, muwadeile wasunyi wenyu ghafweni na gha hachi, mkemanya kamba nanyose muo na Bwana mlunguni.

Malaghizo

² Simwasighe kulomba na mukulinde ngelo yelomba, mkemfunyila Mlungu asanta.

³ Na natose mutilombele Mlungu, kamba atifungulile mjango ghochila uvoro ghuvisike ghwa Kristo, ughu nifungililo kwa undu ghwake.

⁴ Lombeni eri nipate kughora selyi inifweni nighore.

⁵ Mkale na mighendo yaloli kwa wandu siwedumuse, muketumia kirani ngelo muipatagha.

⁶ Maheleo ghenyu ghakale ghaloli na ghasingile kila ngelo, na mumanye kutumbulila kirani kila ikotelo.

Maroghoi gha kudua

⁷ Tukiko, wakwetu mshayo, ewo mdei kazi mdumusiliki na mtumishi mumbetu kele kazi ya Bwana, umughoreragha malagho ghangu ghose.

⁸ Kwa hung'u nendemtuma kwenyu eri amwelese ngolo kwa kumughorera malagho ghetu.

⁹ Naye ujanyagha na Onesimo wakwetu mshayo na mdumusiliki uyu ewo mumbenyu. Nawo wejemhawa malagho ghose gha aha.

¹⁰ Aristarko uyu ewo mfungo ngila mojori nemi wamuroghowa, na Marko mwana mee Baranaba (uyu mupatile mlomu ighulu yake, ilyi eja, mumuhokere).

¹¹ Joshua aitogho Justo naese wamuroghowa. Awa wandu watatu keng'weri, niwo Wayahudi wadumuse na wadeagha kazi ngila mojori nemi kele uzuri ghwa Mlungu. Nawo waniwarura na ndighi.

¹² Epafrasi, ewo mumbenyu na mtumishi wa Kristo Jesu wamuroghowa. Iye uwo na chadi chemlombela Mlungu kila ngelo, kamba mumangiso gii sa wandu wazeguwe na wakufunyile putu kudea mashayo gha Mlungu.

¹³ Nemi ndefunya ushuhuda ghwa selyi adeile kazi kwa chadi, kwa undu ghwenyu na kwa wandu wa Laodikea na Hierapoli.

¹⁴ Luka mghanga wetu mshayo na Demasi wamuroghowa.

¹⁵ Roghoweni wana wakwetu wa Laodikea na Nimfa na ikanisa lyikoghanagha kele nyumba yake.

¹⁶ Mkamalila kushoma barua iyi, muighenze kwa ikanisa lya Laodikea waishome; na nanyose mushome barua ya wana wakwetu wa Laodikea.

¹⁷ Mumuze Arkipo, “Zighana kamba wadea kazi uhawilo ni Bwana kirani.”

¹⁸ Imi Paulo nawandika kwa mkonu ghwangu maroghoi agha. Mkumbuke kamba nio kifungoni. Mbazi ya Mlungu ikale nenyo.