Wakolosai 3 - UVORO GHWALOLI KWA WANDU WOSE

¹ Kwa hung'u ngera muzukile na Kristo, loleni malagho gha ighulu andu Kristo ewo kitembo kele mkonu ghwa kijo ghwa Mlungu.

² Ikeni akili zenyu kele malagho gha ighulu, na si kele malagho gha urumenguni.

³ Kwani mwanafwile, na umana ghwenyu ghwanavisilo na Kristo kele Mlungu.

⁴ Umana ghwenyu ni Kristo na ngelo eonekagha, nanyose mujeonekana naye kele ubwaa.

Umana ghwa kale na umana mwishi

⁵ Kwa hung'u ulagheni tamaa zenyu za urumengu muo nazo: uzingi, ului, tamaa, tamaa ziwase na iziso, (Uku ni karakara na kutasa sanamu).

⁶ Kwa undu ghwa malagho agho hare ya Mlungu iwajilagha wasikiriwi.

⁷ Ngelo moju nanyose moluo mukekala nagho ilyi moluo hung'o.

⁸ Ela ndamu ni suti mughasighe malagho agha ghose: hare, kuwasilo, ulaghelaghe, matukano na milomu iwase siyaghoro ninyo.

⁹ Simwaembaneembane, kwani mwaghufunya ghulya undu ghwa kale

¹⁰ na kurwara undu mwishi, ughu ghudeogho uishi ni Mlungu Muumbi wake; eghughalulagha uishi kufwanana na kumanya kwake.

¹¹ Kwa ngila iyi sikuwesi machumbano ghati ya Mgiriki na Myahudi, achwilo na sechwilo, mgheni na mundu wa duu, msunyi na mkidina. Kristo ni wose na kwa wose.

¹² Kwa hung'u, inyo sa wandu wa Mlungu mushailo na kusaghulo kukala wake wenyi, rwareni ngolo yefwila waya, undu ghwaloli, kukuseleza, umbole na kurumaghia.

¹³ Mkerumaghiana na kufwilana waya ngera mundungi ewo na ilagho na mumbawe. Mufwilane waya selyi Bwana amufwilile waya.

¹⁴ Na kuchumba ghose mukale na mashayo, kwani mashayo nigho ghewatanisagha kila kindu kele umojori ghuketi.

¹⁵ Sere ifumagha kwa Kristo ilongoze ngolo zenyu kele kila ilagho; kwa kukala ni iyo sere Mlungu ampang'ilile kukala muli ghumojori, kaleni na asanta.

¹⁶ Ilagho lya Kristo lyikale amweni kwenyu lyijule. Mufundisane na kuonyana inyo wenyi kwa suku yose. Mkeimba zaburi, nyumbo, na nyumbo za rohoni, mumwimbile Mlungu kwa ngolo yemufunyila asanta.

¹⁷ Na kila ilagho mudeagha, kwa ghore ango kwa madeo, deeni ghose kwa izina lya Bwana Jesu, mukemufunyila asanta Mlungu Aba kwa undu ghwake.

Ghawafweni wandu kele umana mwishi

¹⁸ Inyo wake muusilo, wasikileni walume wenyu, kwani niko kumuboelagha Bwana.

¹⁹ Nenyo walume, mulole washaeni wake wenyu na simwakale mubile kwawe.

²⁰ Inyo wanake, wasikileni wavali wenyu kila ngelo, kwani niko kumuboelagha Bwana.

²¹ Nenyo wavali, simwadee wanake wenyu wawasilo ango wefwighagha ngolo.

²² Inyo wasunyi wasikileni wana bwana wenyu wa urumengu kwa kila kindu, na si ngelo wemulolilagha tu eri muwaboele; ela kwa ngolo ielile, kwa undu ghwa kumwogha Bwana.

²³ Kila ilagho mudeagha, deeni kwa ngolo, sa kumutumikila Bwana na si mdamu.

²⁴ Manyeni kamba Bwana ujemuhawa inosi lya ufwa aikilile wandu wake. Kwani mondemutumikila Bwana Kristo.

²⁵ Uyu edeagha ghawase ujepata ghawase ghake. Mlungu sasaghulagha.