Wakolosai 2 - UVORO GHWALOLI KWA WANDU WOSE

¹ Nanashaile kumumanyisa selyi nideile kazi kwa chadi kwa undu ghwenyu na kwa wandu wa Laodikea na kwa undu ghwa wandu wose siwenionile kwa meso.

² Nendedea hung'u eri kuwakumba ngolo na kuwawatanisa ngila mojori kele mashayo, na wajulo ni kutambula na kumanya kwa fulo ivisilo ya Mlungu, nayo ni Kristo mwenyi.

³ Amweni kwake niko zivisilo mali zose za suku na zemanya.

⁴ Nendeghora hung'u, mundungi samwembeembe kwa malagho gha ndimi,

⁵ kwani hata ngera sani sio ngila mojori nenyo kwa muli, nio ngila mojori nenyo kwa roho, nikeboelo kuona ghaloli ghenyu na kumanga kele idumusi kwa Kristo.

Maisha kamili kele Kristo

⁶ Kwa kukala mwanamdumusile Kristo Jesu kukala Bwana, kaleni amweni kwake.

⁷ Dyaeni miriginga kwake na kuwaghalo kwake, mumange kele idumusi selyi kwenyi mufundiso, mkefunya asanta.

⁸ Zighaneni mundungi samtuke na mafundiso gha ndimi gha akili za kidamu, agha gheo gha ada za wandu na gha pepo zitawalagha urumengu, nagho si gha Kristo ghengi.

⁹ Kwani kele udamu ghwa Kristo ghanakalagha ghose gha Mlungu.

¹⁰ Nenyo mwahao umana ghuketi kwa kuwatana naye. Iye uwo ighulu ya pepo zose watawala na wabwaa wa urumengu.

¹¹ Nenyo mwanawataniso na Kristo kwa kuchwigho, si kuchwigho ni wandu, ela ni kuchwigho ni Kristo kumudeile mufungulo kufuma kele ndighi za kaung'a.

¹² Kwani kele ubatizo mwanazikilo na Kristo na kele ubatizo mwanazukile na Kristo kwa undu ghwa idumusi lyideagha kazi ya Mlungu uyu amuzusile Kristo kufuma kwa wafwa.

¹³ Nenyo moluo mufwile kele kaung'a zenyu na simochwilo mili yenyu, ela Mlungu katizusa ngila mojori na Kristo kwa kutifwila waya itose tio wakaung'a.

¹⁴ Kamalila kufuta deni zetu zose na mashitaki, kwa kuzikongotera misumari kele msalaba.

¹⁵ Na alye kele msalaba Kristo kazisima ndighi za pepo zetawala na maubwaa, kewaonyeza wanduni kukala ni mateka kele kusima kwake.

¹⁶ Kwa hung'u mundungi samutaghanye kwa ivo mulyighagha na kunwa, ango majua mabwaa, ango karamu za mwezi, ango Sabato.

¹⁷ Ivi vose ni virenderende va malagho ghekujagha. Fulo ni Kristo.

¹⁸ Mundungi samutaghanye kekuona iye ni mubwaa kwa maono ghake ghezitiria na kukuseleza kwa ndimi na kutasa wana malaika; mundu sa uyu waembeka kwa maririkanyo gha urumengu.

¹⁹ Wasigha kuwatana na Kristo uyu ewo chongo cha muli. Isi ya Kristo muli ghose ghwalyiso na kuwatanisa viungo vose na hasi, eri vizeguwe selyi Mlungu ashaile.

Kufwa na kukala moyo na Kristo

²⁰ Ikakala mwanafwile na Kristo na kukizo kele ndighi za pepo za urumengu? Kudani sena mkalagha sa wandu wa urumengu? Kudani mudumusa kuuzo.

²¹ “Simwawate ichi,” “Simwatoe icho,” “Simwapete chilya?”

²² Ivi vose ni vindu vidimagha kuhakilika vikatumio: nagho ni kuirima mafundiso gha kidamu.

²³ Agha ghaonekana kamba ghanafweni kwa suku zawe zetasa wana malaika na kukuseleza kwa ndimi na kughusirimisa muli, ela sighawesi faida ingi kele kusima tamaa za muli.