Wakolosai 1 - UVORO GHWALOLI KWA WANDU WOSE

¹ Imi Paulo, mtumo wa Kristo Jesu kwa undu ghwa mashayo gha Mlungu, na wakwetu Timotheo.

² Tawandika kwa wandu wa Mlungu na wana wakwetu wadumusiliki kele Kristo wakala Kolosai: Mbazi ikale kwenyu na sere ifumagha kwa Mlungu Aba.

Ilombi lyefunya asanta

³ Tamfunyila Mlungu asanta, Aba wa Bwana wetu Jesu Kristo ngelo zose timulombelagha,

⁴ kwa kukala tasikila gha idumusi lyenyu kele Kristo Jesu na mashayo muo nagho kwa wandu wose wa Mlungu.

⁵ Kwa undu ghwa ikosereo muikililo mlunguni. Ilyi molyisikile ko hambiri kele ghore ya fulo nayo niyo Injili.

⁶ Iyi yanamufikilile selyi ifikilile urumengu ghose nayo yavala mavalo na kuzegua ghati yenyu kufuma mwaisikila na kuitambula mbazi ya Mlungu ya fulo.

⁷ Nenyo mwanakufundise mbazi iyi kufuma kwa Epafrasi mtumishi mumbetu mshayo. Iye ni mtumishi mudumusiliki wa Kristo kwa undu ghwetu.

⁸ Naye watighorera gha mashayo ghenyu kele Roho.

⁹ Kwa undu ughu, kufuma tasikila uvoro ghwenyu, sitisighile kumulombela. Tikemlomba Mlungu amujuze suku na kumanya kufumagha kele Roho yake.

¹⁰ Eri mpate kukala selyi Bwana ashaile, Aho mjemuvalila mavalo gha madeo ghaloli na kujuzilika kele kumumanya Mlungu.

¹¹ Mlungu amujuzile ndighi kele ubwaa ghwake mubwaa eri mudime kurumaghia kila kindu kwa marumaghio.

¹² Na kwa maboelo, mumuhawe asanta Aba uyu amudeile mufwane kupata ifungu lya wandu wa Mlungu lya uzuri ghwa mlangazi.

¹³ Iye wanatiokole kufuma kele ndighi za kiza na kutileta kele uzuri ghwa Mwana wake mshayo.

¹⁴ Uyu kwake tapata kukombolo na kusigho kaung'a.

Kristo na kazi yake

¹⁵ Kristo ni ifwani lya Mlungu seonekagha, naye ni mvalo wa hambiri wa vose viumbilo.

¹⁶ Kwani kwa iye vindu vose vanaumbilo mlunguni na isangeni, vilya vionekagha na siveonekagha, wakalagha ni wazuri ango watawala, ango weo na udimo ango weo na ndighi; vose vanaumbilo kwa iye na kwa undu ghwake.

¹⁷ Naye oluo hambiri ya vindu vose na kwa iye vindu vose vanawatanagha.

¹⁸ Naye ni chongo cha muli ghwake, nilyo ikanisa; iye ni kudyowa kwa ugho muli. Iye ni muvalo wa hambiri wa wafwile azukile kufuma kwa wafwa, eri akale wa hambiri keng'weri wa vindu vose.

¹⁹ Kwani kwa kushaya kwake Mlungu, ulungu ghose ghojule amweni kwake,

²⁰ na kwa undu ghwake Mlungu kapatanisa vindu vose naye, vio urumenguni na vio mlunguni, kaleta sere kwa bighati yake itikile kele msalaba.

²¹ Nenyo ko hambiri moluo kulele na Mlungu, moluo wamaiza wake ngoloni na akilini na madeo ghenyu gheluo ghawase.

²² Ela ndamu kwa kifwa chake Kristo uyu eluo na muli ghwa nyama, Mlungu wamupatanisa na iye mwenyi, eri amulete kwake muo waelile simowesi iboli.

²³ Kwa hung'u tuleni kele idumusi, mumangile kele msingi na lyingi simwafume kele ikosereo lya Injili iyi muisikile na ichililo kila mundu urumenguni. Nayo iyi Injili niyo imi Paulo nikalile mtumishi wake.

Kazi ya Paulo sa mtumishi wa Ikanisa

²⁴ Ndamu nio na maboelo kwa masirimi ghangu kwenyu, kwani kwa kusirima kwangu nawarura kukatisa kusirima kwa Kristo kwa muli ghwake, nilyo ikanisa.

²⁵ Nemi nakala mtumishi wa ikanisa lya Mlungu, uyu anihawile kazi iyi kwa undu ghwenyu, eri nidee ilagho lya Mlungu lyimanyikane,

²⁶ nayo ni ngasu ivisike kwa miaka na kwa vivali na vivali, ela ndamu yafunukulilo wandu wa Mlungu.

²⁷ Mupango ghwa Mlungu ni kudea wandu wake wamanye ngasu iyi ya uzuri na ubwaa ewo nagho kwa undu ghwa wandu wose. Na ngasu iyi ni Kristo amweni kwenyu, na ni kughamba mpatagha ifungu lya ubwaa ghwa Mlungu.

²⁸ Kwa hung'u tamchila Kristo kwa kila mundu, Tamwonya na kumufundisa kila mundu kwa uya, eri timulete kila mumoju wenyu azeguwa kele kuwataniso na Kristo.

²⁹ Kwa undu ughu nadea kazi na ndighi na nio na chadi kwa ndighi za Kristo zio amweni kwangu izi zideagha kazi.