Wahebrania 9 - UVORO GHWALOLI KWA WANDU WOSE

Kutasa kwa urumengu na kwa mlunguni

¹ Ilagano lya hambiri lyeluo na ngila yake yetasa na andu kodeilo ni mdamu kotasa.

² Kowaghalo hema, ya gasi ya shighati yeluo ikeito Andu kwa Kuela. Na alyenyi koluo na kindu cheika taa na meza yeika mikate ifunyilo kwa Mlungu.

³ Nyuma ya pazia ya kaili koluo na hema iitogho Andu kwa Kuela na Ndighi.

⁴ Na Amweni kwake koluo na mazabahu ya zahabu yefukizila ubani, na isanduku lya Ilagano lyivililo zahabu, nalyo lyeluo na nyungu njache ya zahabu, yeika mana, na ndata ya Aroni yeluo na manyasi na vibao vili va mawe ghalye ghewandiko ilagano.

⁵ Ighulu ya isanduku, koluo na viumbo vio na mabambato vionyezagha kamba Mlungu uwo alyenyi, na mabambato ghawe ghebambile hata alye andu kaung'a zifwililogho waya. Ela ngelo iyi siyeghora mwazi kila kindu.

⁶ Hung'u niko vilya vindu viikilo. Wakohani wangila kila ijua hema ya shighati kudea kazi yawe,

⁷ ela ni Mkohani Mubwaa keng'weri angilagha kele hema ya komweni, na ni kamojori tu kwa mwaka. Iye wanatwalagha bighati yefunya kwa Mlungu kwa undu ghwake mwenyi na kwa undu ghwa kaung'a za wandu wazideile siwemanyagha.

⁸ Roho wa Kuela wafundisa mwazi malagho agha ghose kukala ngila yengila andu kwa Kuela na ndighi kwanatulagha sikofunguke ngelo hema ya shighati itulagha kimusi.

⁹ Iyi ni alama ionyezagha malagho gha indakwenyi. Uku ni kuonyeza mafunyo na vizangauna va nyamandu vifunyililo Mlungu sividimagha kuelesa ngolo ya mtasi,

¹⁰ ela ivi vose vendechinana na vakulya, vindu venwa na ada za kukuelesa. Izi ni ada za shighati, zikalagha kwa ngelo, hata Mlungu aghalule malagho maishi

¹¹ Ela Kristo wamalila kuja sa Mkohani Mubwaa wa vindu valoli vio aha. Hema iyi akalagha ketumika ni mbwaa na ya Kuela; si hema ideilo ni mdamu kungi, nayo si ya urumengu ughu ghuumbilo.

¹² Ngelo Kristo angilile kele hema, wanangilile kamojori tu Andu kwa Kuela na Ndighi, na iye satute bighati ya mbuzi ango ya ng'ombe kuifunya kukala sadaka; ela otute bighati yake mwenyi na katipatila ukizi ghwa kale na kale.

¹³ Bighati ya mbuzi na ng'ombe na ivu lya ngache iishilo zafisilo wandu siweelile na zawaelesa kwa kufunya uluwi ghwawe.

¹⁴ Ikakala agha ni fulo, Bighati ya Kristo siichumbile kudea hung'u! Kwa ngila ya Roho wanakufunyile mwenyi kukala sadaka iketi ya Mlungu. Bighati yake ijetielesa ngolo kwa ghawase, eri timutumikile Mlungu ewo moyo.

¹⁵ Kwa undu ughu Kristo niye eletagha ilagano iwishi, eri walye wapang'ilo ni Mlungu wapate mubaraka ghwa kale na kale Mlungu alagile. Agha ghadimika kwa kukala kwakala na kifwa chifungulagha wandu kele makosa wadeile ngelo ya ilagano lya hambiri.

¹⁶ Ufwa ghwanamanyikagha ngelo ulya mundu awandike ufwa, afwa.

¹⁷ Kwani ufwa sighutetogho ngelo ulya mundu ewo moyo, ghwakala tu ngelo ulya mundu afwa.

¹⁸ Kwa hung'u hata ilagano lya hambiri lyanakalile tu kwa kutumia bighati.

¹⁹ Hambiri Musa wanaghorerere wandu milomu yose selyi iwo kele sheria. Nao kawata bighati ya ng'ombe na mbuzi, kairunganya na meji, nao kaifisila chuo cha Sheria na wandu wose ketumia manyasi gha hisopo na pamba ya ngundu.

²⁰ Naye kaghora, “Iyi ni bighati io muhuri ghwa ilagano Mlungu ashaile mulyiwate”

²¹ Na hung'u kwenyi Musa wananyinyile bighati kele Hema ya Ilagano na vindu vose veluo viketumio kwa utasi.

²² Fulo kwa kuirimana na Sheria kila kindu chanaeleso kwa bighati, na kaung'a zafwilo waya tu, ilyi bighati yatika.

Sadaka ya Kristo yanafunyagha kaung'a

²³ Vindu vilya vio va fwana ya mlunguni, veluo vikeombocholo. Ela vindu va mlunguni venyi vanashaile sadaka yaloli kuchumba.

²⁴ Kwani Kristo sangilile Andu kwa Kuela kudeilo ni mdamu kofwanana na kwa fulo. Iye wanaghendile mlunguni kwenyi, andu aonekanagha ndamu hambiri ya Mlungu kwa undu ghwetu.

²⁵ Mkohani Mubwaa wa Wayahudi wangila Andu kwa Kuela na Ndighi kamojori kwa mwaka ewo na bighati ya nyamandu. Ela Kristo sangilile mandu mengi kukufunya,

²⁶ kwani ngera edeile hung'u, mango asirime mandu mengi kufuma kuumbo urumengu. Ela ndamu kele ngelo izi za kudua, waonekana indu imojori tu kufunya kaung'a kwa sadaka ya iye mwenyi.

²⁷ Kila mundu suti afwe kamojori na konyuma ataghanyo ni Mlungu.

²⁸ Niko kwenyi na Kristo naese, wanafunyilo kamojori kukala sadaka yefunya kaung'a za wengi. Ujeja indu lya kaili, ela si kwa kulwana na kaung'a, ela kuwakiza walye weo wekemdafurira.