Wahebrania 7 - UVORO GHWALOLI KWA WANDU WOSE

Mkohani Melkizedeki

¹ Melkizedeki oluo mzuri wa Salemu na mkohani wa Mlungu wa Ighulu na Ndighi. Naye Abrahamu ilyi eluo keuya kufuma kele ghulya uta awasimile wazuri wane, Melkizedeki kakoghana naye kamubarikia,

² naye Abrahamu kamuhawa ifungu lya ikumi lya vose apatile. (Kutambula kwa hambiri kwa izina lya Melkizedeki ni “Mzuri wa Hachi”, naye kwa kukala oluo mzuri wa Salemu, kutambula kwa izina lyake sena ni “Mzuri wa Sere”).

³ Melkizedeki sewesi tatie ango mee ango kichuku chake; siimanyikane ni nini avelo ango afwile. Iye ni sa Mwana wa Mlungu; naye utulagha kekala mkohani kwa kale na kale.

⁴ Ndamu mwaona selyi eluo mundu mubwaa. Ake Abrahamu wanamuhawile ifungu lya ikumi lya vose apatile uteni!

⁵ Kichuku cha Lawi weo wakohani walaghizo ni Sheria wause ifungu lya ikumi kufuma kwa Waisraeli wa muzawe, awa weo mbari ya Abrahamu na wose.

⁶ Melkizedeki seluo wa mbari ya Lawi, ela wanausile ifungu lya ikumi kwa Abrahamu, naye kamubarikia mundu epatile ilagano lya Mlungu.

⁷ Kwa hung'u uyu emubarikiagha mumbawe ni mubwaa kuchumba ulya ebarikiogho.

⁸ Kwa Wakohani ifungu lya ikumi lyeusilo ni wandu wefwa, ela kwa Melkizedeki, ifungu lya ikumi lyeusilo ni mundu sefwighagha, selyi ghaghora Mawandiko gha Kuela.

⁹ Ni kughora, kamba Abrahamu alipa ifungu lya ikumi, Lawi (uyu kichuku chake chiusagha ifungu lya ikumi) naese olipile.

¹⁰ Kwani Lawi woluo sevelo, ela ni kughora oluo kele muli ghwa akee Abrahamu ngelo ekoghane na Melkizedeki.

¹¹ Yeluo ni kwa ngila ya ukohani ghwa Walawi, wandu wa Israeli wahawilo Sheria. Ndamu ngera kazi ya wakohani Walawi yeluo iketi, sikokalagha na kushaika kuja mkohani ungi mzima, kufuma kele ukohani ghwa Melkizedeki sighweo ghwa mbari ya Aroni.

¹² Kwani ukohani ghukaghaluka, na Sheria nayose yaghaluka.

¹³ Naye Bwana wetu uyu malagho agha ghaghoriro, oluo ni wa mbari nzima, na sikowesi mundungi wa mbari yake atumike sa Mkohani.

¹⁴ Yamanyikana mwazi kamba wanavelo kele mbari ya Juda, naye Musa saikumbuke mbari iyi ilyi eluo keghora gha wakohani.

Mkohani mumoju ewo sa Melkizedeki

¹⁵ Ilagho ilyi lyakala mwazi; lya kuonekana kwa mkohani mzima ewo sa Melkizedeki.

¹⁶ Iye wanadeilo kukala mkohani, si kwa kuirimana na Sheria za kidamu kungi, ela kwa ngila ya ndighi ya umana sighowesi kudua.

¹⁷ Kwani Mawandiko gha Kuela ghaghora, “Ujekala mkohani kwa kale na kale, kele ukohani ghuirimagha ukohani ghwa Melkizedeki.”

¹⁸ Kwa hung'u Sheria ya kale yaiko na mbali, kwa kukala siyemangile na siyefweni.

¹⁹ Kwani Sheria ya Musa siidimile kudea kindu chingi kukala kamili, ela ndamu tapata ikosereo lyidimagha kutisughusa avui na Mlungu.

²⁰ Sena kuo na ighemi lya Mlungu nalyose. Sikoluo na ighemi lyingi sa ilyo ngelo walye wazima wadeilo kukala wakohani.

²¹ Ela Jesu wanakalile mkohani kwa ngila ya ighemi ilya ngelo Mlungu emuuzile, “Bwana wadea ighemi naye sejeghaluka: ‘Uwe ujekala mkohani kwa kale na kale.’”

²² Ndamu machumbano agha, ghamudea Jesu kukala mumanziri wa Ilagano lyaloli.

²³ Kuwo na ichumbano imoju nalyose: koluo kukekala na wakohani wengi, kwa kukala weluo wekefwa na siwadimile kuendelea na kazi zawe.

²⁴ Ela Jesu uwo moyo kwa kale na kale, na kazi yake sa mkohani siihawilanogho mundungi.

²⁵ Kwa hung'u, wadima indakwenyi, na ngelo zose, kuwakiza walye wamjila Mlungu kwa ngila yake; kwa kukala wanakalagha moyo kwa kale na kale, kemlomba Mlungu kwa undu ghwawe.

²⁶ Kwa hung'u, Jesu ni Mkohani Mubwaa edimagha kutikatisila ghalye tishaile. Iye ni wa kuela, amweni kwake sikwesi ikosa ango kaung'a; naye wanaikilo mbali na wakaung'a na kajoso ighulu mlunguni.

²⁷ Iye si karakara na wakohani wazima, safunyagha sadaka kwa undu ghwake iye mwenyi jako, nao afunye kwa undu ghwa wandu wazima. Iye wanafunyile sadaka kamojori tu, ngelo ekufunyile iye mwenyi.

²⁸ Sheria ya Musa yanasaghulagha wandu weo wanyonge kukala Wakohani Wabwaa; ela Ilagano lya Mlungu lyideilo kwa ighemi, lyijile nyuma ya Sheria, lyamusaghula Mwana, uyu adeilo kukala kamili kwa kale na kale.