Wahebrania 6 - UVORO GHWALOLI KWA WANDU WOSE

¹ Kwa hung'u tisighe nanyuma mafundiso gha kudyoweni gha Kikristo na tighende hambiri kele mafundiso gha kiubwaa. Sitawaghale sena msingi kufuma kele kuriha madeo gha kifwa na gha idumusi kwa Mlungu;

² na mafundiso gha ubatizo na kuikililo mikonu; kuzuka kwa wafwa na kutaghanyo kwa kale na kale.

³ Tisughute hambiri! Na agha tideagha, ilyi Mlungu ashaya.

⁴ Ndamu idimikagha ije kuwauja wandu wasighile idumusi lyawe warihe sena? Weluo kele mlangazi ghwa Mlungu; wakatowa manosi gha mlunguni na wakapata Roho wa Kuela;

⁵ wakamanya kamba ilagho lya Mlungu ni lyaloli, na wakazisikila ndighi za agho ghekujagha.

⁶ Nao ima wakasigha idumusi lyawe! Siyidimikagha kuwauja sena kele kuriha, kwa kukala wendemusulubisha sena Mwana wa Mlungu na kumufwisha waya wanduni.

⁷ Mlungu wanaghubarikiagha msanga ghumilagha mvula inyeghagha kila ngelo, na kuzeguisa mimea ya faida kwa walye wailimagha.

⁸ Ela ilyi ghwazeguisa miya na masaka, sighufwanagha kindu chingi, ghuo kele ndengwa yewanyizo ni Mlungu na kuisho na moto.

⁹ Ela hata ngera sani taghora hung'u washayo, tio na idumusi ighulu yenyu. Tamanya muo na mibaraka yaloli ifumagha kele ukizi ghwenyu.

¹⁰ Mlungu sedimagha kukala seo mhachi. Na sedimagha kuluwala kazi zaloli mudeile ango mashayo muonyeze kwake kwa uwaruro mufunyile na mufunyagha kwa Wakristo wambenyu.

¹¹ Beha yetu mbwaa kwenyu ni kamba kila mumoju wenyu ajuzile kukala na chadi icho chenyi hata kudua, eri kamba vindu mukosereagha vije kukatila.

¹² Isi sitishaile mukale waghadi, ela mukale sa walye wadumuse na warumaghiagha, eri mupate ghalye Mlungu alagile.

Ilagano lya Mlungu lya fulo

¹³ Ngelo Mlungu edeile ilagano na Abrahamu, wanaghemile kudea selyi alagile. Na kwa kukala sikowesi mundungi eluo mubwaa kumchumba iye, wanatumie Izina lyake lyenyi ngelo yeghema.

¹⁴ Wanaghorire, “Kwa hachi yenyi nikubarikiagha na kukuhawa wana wengi.”

¹⁵ Abrahamu karumaghia na kwa hung'u kapata ghalye Mlungu emulagile.

¹⁶ Ngelo mundu eghemagha watumia Izina lya mundu ewo mubwaa kumwisa iye, nalyo ighemi lyamalila marashano ghose.

¹⁷ Kwa walye weluo wepatagha lyilya ilagano, Mlungu oshaile wandu wamanye mwazi kamba seghalula ilagano lyake lyingi. Kwa hung'u kaghema sena kulyijuzila ndighi.

¹⁸ Kuwo na malagho maili aha, sighedimagha kughaluka, na Mlungu sedimagha kukala mndimi ighulu yake. Kwa hung'u isi wandu tipatile sere kwake, takumbo ngolo na ndighi kuwata gii ikosereo lyiikilo hambiri yetu.

¹⁹ Tio na ikosereo ilyi sa nanga ya umana ghwetu. Ikosereo ilyi lyanamangile na ni lya fulo, nalyo lyaita pazia ya hekalu ya mlunguni na kungila andu kwa kuela.

²⁰ Kwa undu ghwetu, Jesu wangila alye hambiri yetu na wakala Mkohani Mubwaa kwa kale na kale, kuirimirana na ukohani ghwa Melkizedeki.