Wahebrania 5 - UVORO GHWALOLI KWA WANDU WOSE

¹ Kila Mkohani Mubwaa wanasaghulogho kufuma kele wandu, na wanasaghulogho kumtumikila Mlungu kwa undu ghwawe, kufunya sadaka na kizangauna kwa undu ghwa kaung'a zawe.

² Kwa kukala iye mwenyi ni mnyonge kwa ngila nyingi, wanakalagha wa mbole kwa walye siwemanyagha na wadeagha makosa.

³ Na kwa kukala iye mwenyi ni mnyonge, ni suti afunye kizangauna chefunya kaung'a za wandu na kizangauna chefunya kaung'a zake iye mwenyi.

⁴ Sikuwesi mundungi akusaghulilagha mwenyi ishima lyekala Mkohani Mubwaa. Ela ondesaghulo ni Mlungu selyi Aroni asaghulo.

⁵ Niko kwenyi na Kristo, sakusaghule iye mwenyi na kuusa ishima lyekala Mkohani Mubwaa. Ela Mlungu kamuza, “Uwe nuwe Mwana wangu, lelo nakala Tatio.”

⁶ Sena andu kuzima waghora, “Uwe ujekala Mkohani kwa kale na kale, kuirimira ukohani ghwa Melkizedeki.”

⁷ Kele umana ghwake ghwa urumengu, Jesu wanalombile kwa lwaka lubwaa na mbori kwa Mlungu, uyu eluo na udimo ghwa kumkiza kufuma kifwa. Naye kwa kukala woluo wa mbole na akufunyile, Mlungu wanamusikile.

⁸ Ela hata ngera sani oluo Mwana wa Mlungu, wanakufundise kusikila kwa ngila ya matiriro ghake.

⁹ Naye aghenda adeo kukala kamili, kakala kudyowa kwa ukizi kwa walye wose wamusikilagha,

¹⁰ na Mlungu kamdea kukala Mkohani Mubwaa, kuirimana na ukohani ghwa Melkizedeki.

Maonyo ighulu ya kusigha idumusi

¹¹ Tio na mengi ghemughorera ighulu ya ilagho ilyi, ela sitidimagha kumghorera, kwa kukala ninyo wa mbole mbole wetambukilo.

¹² Mango hung'u mwakala walimu, ela mwanatulagha mushaile mundu womufundisa ishomo lya hambiri lya uvoro ghwa Mlungu. Kibalo chelya vindu vikulile, mwanatulagha mukenwa mazia.

¹³ Mundu uwo wose anweghagha mazia ni mwanake, saweni malagho gha uhachi na gha makosa.

¹⁴ Chakulya chikulile nacho ni cha wandu wabwaa wedimagha kutambula ghaloli na ghawase.