Wahebrania 3 - UVORO GHWALOLI KWA WANDU WOSE

Jesu ni mubwaa kumwisa Musa

¹ Wana wakwetu Wakristo, mupang'ilo ni Mlungu! Muririkanyeni Jesu, uyu atumilo ni Mlungu kukala Mkohani Mubwaa wa Idumusi tilyidumuse.

² Iye oluo mudumusiliki kwa Mlungu, uyu amusaghule kudea kazi yake, selyi kwenyi Musa eluo mdumsiliki kele kazi yake kele nyumba ya Mlungu.

³ Mundu ewaghalagha nyumba wanapatagha ishima kuchumba nyumba yenyi. Hung'u kwenyi Jesu naese yanamfweni ishima ibwaa kumchumba Musa.

⁴ Kila nyumba iwo na muwaghali wake, ela muwaghali wa vindu vose ni Mlungu.

⁵ Musa oluo mdumusiliki kele nyumba ya Mlungu sa mtumishi, naye kaghora malagho ghalye Mlungu eluo ughoragha ngelo zikujagha.

⁶ Ela Kristo ni mdumusiliki sa Mwana, ighulu ya nyumba ya Mlungu. Na isi nisi nyumba yake ilyi takala na ung'oni na tadumusa ghalye tikosereagha.

Kuzumuwa kwa wandu wa Mlungu

⁷ Kwa hung'u selyi Roho wa Kuela aghora, “Ilyi mwasikila lwaka lwa Mlungu lelo,

⁸ simwakulise ngolo zenyu, sa wana akeo ngelo weleghile kumusikila Mlungu, selyi weluo lyilya ijua kireti ngelo wemutimile.

⁹ Alye wana akeo wananitimile, hata ngera sani wanaonile selyi nideile kwa miaka mirongo mine.

¹⁰ Na kwa hung'u nikawasilo ni walye wandu na nikaghora, ‘Wandu awa waghenda kulele nemi ngoloni kwawe na walegha kuwata milomu yangu.’

¹¹ Nikawasilo na nikaghema, ‘Siwejengila lyingi kele isanga andu neluo niwahawagha kuzumuwa.’”

¹² Wana wakwetu mukulinde eri mumoju wenyu sejekala na ngolo iwase siyedumusagha hata amleghe Mlungu.

¹³ Ela eri mundungi wenyu saemboembo ni kaung'a na kukala kisikiriwi, ni suti muwarurane kila ijua, selyi kwenyi ilagho “Lelo” kele Mawandiko gha Kuela lyighoragha nesi.

¹⁴ Kwani isi itose tio na ungaro na Kristo, ilyi tamanzira gii lyilya idumusi tidyowile nalyo, hata kudua.

¹⁵ Mawandiko gha Kuela ghaghora, “Ilyi mwasikila lwaka lwa Mlungu lelo, simwakulise ngolo zenyu, selyi wana akeo weluo ngelo weleghile kumusikila Mlungu.”

¹⁶ Ni wandu muni wasikile lwaka lwa Mlungu na wakasikiriwa? Ni walye wose walongozo ni Musa kufuma Misri.

¹⁷ Ni wana ani wamwasilile Mlungu kwa miaka mirongo mine? Ni walye wandu wadeile kaung'a, wagwile na wakafwa alye kireti.

¹⁸ Ilyi Mlungu eghemagha, “Na lyingi siwengilagha kele isanga andu neluo niwahawagha kuzumuwa.” Woluo keghora ighulu ya wana ani? Ighulu ya walye wasikiriwe.

¹⁹ Kwa hung'u taona kamba siwangilile lyilya isanga kwa kukala siwadumuse.