Wahebrania 2 - UVORO GHWALOLI KWA WANDU WOSE

Ukizi mubwaa

¹ Kwa undu ughu ni suti tiwate gii ghalye ghose gha fulo tighasikile, eri sitejetuko kulele nagho.

² Uvoro gholetilo ni wana malaika gholuo ghwa fulo, na uyo wose seghuirime ango kughuwata kapata makwito ghamuketi.

³ Ndamu isi tikilagha ije ikakala sitetalagha ukizi mubwaa sa ughu? Hambiri Bwana wanaerese uvoro ughu ghwa ukizi, na walye wamusikile wakatihakikishila kamba ni fulo.

⁴ Mlungu naese kajuzila ushuhuda ghwake kwa kudea wana mwakilimbita wa kila mbari na mashiniko, na kawasarira manosi gha Roho wa Kuela kuirimana na kushaya kwake.

Uyu atilongozagha kele ukizi

⁵ Mlungu saikile wana malaika kukala watawala ighulu ya urumengu mwishi ughu ghukujagha, ghulya tighughoragha.

⁶ Ela selyi ighorogho andu kumoju kele Mawandiko gha Kuela: “Mdamu nani Ee Mlungu kamba umuririkanye, mdamu tu hata umutale?

⁷ Wanamdeile kwa ngelo njache kukala isi ya wana malaika; kwamungiza kofia ya kiuzuri kwa ubwaa na ishima,

⁸ na kwamudea akale mutawala wa vindu vose.” Yaghora kamba Mlungu kamdea mdamu kukala mtawala wa vindu vose, na iyi ni kughamba ni kila kindu. Ela indakwenyi sitionagha mdamu ketawala kila kindu.

⁹ Ela tanamwonagha Jesu, uyu adeilo kwa ngelo njache kukala isi kuchumba wana malaika, eri kwa ngila ya mbazi ya Mlungu afwe kwa kila mundu. Nesi tamwona ndamu arwariso kofia ya uzuri kele ubwaa na ishima kwa undu ghwa kifwa achisirime.

¹⁰ Yeluo ni karakara kamba Mlungu uyu aumbagha na kuika kirani vindu vose, kumdea Jesu sakale na ikosa lyingi kwa ngila ya kusirima, eri awalete wana wengi kele ubwaa ghwake. Kwani Jesu niye ewalongozagha kele ukizi.

¹¹ Iye wanawaelesagha wandu kaung'a zawe, naye na walye wose waeleso niye, weo na Aba mumojori. Niko Jesu sefwighagha waya kuwaita wana wakwawe.

¹² Naye wanamuuzagha Mlungu, “Niwaereseragha wana wakwetu izina lyako. Nijekukasa kele makoghano ghawe.”

¹³ Na sena waghora, “Nijemudumusila Mlungu.” Na sena waghora, “Imi nio aho ngila mojori na wanake Mlungu anihawile.”

¹⁴ Kwa hung'u wanake, selyi awaitagha, ni wandu weo na nyama na bighati, naye Jesu mwenyi okalile sawo na kuusa udamu ghwawe. Wanadeile hung'u eri kwa ngila ya kifwa chake amuhakile Shetani, uyu ewo na ndighi ighulu ya kifwa,

¹⁵ na kwa ngila iyi, wawakombola walye weluo wasunyi majua ghawe ghose kwa undu ghwa kuogha kifwa.

¹⁶ Kwani ni mwazi kamba sawawaruragha wana malaika, ela selyi Mawandiko gha Kuela ghaghoragha, “Wanawaruragha kivali cha Abrahamu.”

¹⁷ Kwa undu ughu yemufweni akale sa wana wakwawe kwa kila ngila, eri akale Mkohani wawe Mubwaa mdumusiliki na ewo na mbazi kele utumishi ghwa Mlungu, eri kaung'a za wandu zifwilo waya.

¹⁸ Naye ndamu wadima kuwawarura walye wetimogho, kwa kukala iye mwenyi wanatimilo na kasirima.