Wahebrania 13 - UVORO GHWALOLI KWA WANDU WOSE

Ngila yemuboela Mlungu

¹ Mtule mkeshayana sa wana wakwetu.

² Mkumbuke kuwahokera wagheni kele nyumba zenyu. Kwani wamoju wanadeile hung'u na wakawakaribisha wana malaika siwemanyagha.

³ Wakumbukeni walye weo kifungoni sa kamba muwo nawo kifungoni. Wakumbukeni walye wesirimagha sa kamba nanyose mwondesirima sawo.

⁴ Kulola kuhawo ishima ni wandu wose, na walume walole na wake wausilo ni suti wakale wadumusilane. Mlungu ujewataghanya wazingi.

⁵ Mukulinde na kushaya pesa na mukato ni chilya muwo nacho. Kwani Mlungu wanaghorire, “Sijekusigha lyingi, hata sijekubarika.”

⁶ Kwa hung'u sikweo na wogha, tighore, “Bwana niye mwaruri wangu sijedea wogha. Mdamu wadima kunidea ije?”

⁷ Wakumbukeni vilongozi wenyu wa kale, walye wamughorerere ilagho lya Mlungu. Mghelele selyi weluo wekekala hata wakafwa, na mulyiirime idumusi lyawe.

⁸ Jesu Kristo ni ulya mwenyi ighulo, lelo na hata kwa kale na kale.

⁹ Simwadumuse mafundiso gha kigheni gha kila mbari ghamulongoze kufuma kele ngila ya hachi. Ni kirani kupata ndighi ngoloni kwa mbazi ya Mlungu, na si kwa kuwata mirighido ighulu ya chakulya; walye wawatile mirighido iyi siyidimile kuwawarura.

¹⁰ Wakohani walye watumikagha kele andu kotasa kwa Wayahudi siwawesi hachi yelya kindu chingi cha sadaka zekasa tizifunyagha kele mazabahu ghetu.

¹¹ Mkohani Mubwaa wanaletagha bighati ya nyamandu kele Andu kwa Kuela na Ndighi aifunye sadaka kwa kaung'a, ela mili ya zilya nyamandu yanaishogho shighati ya chengo.

¹² Kwa undu ughu Jesu naese wanafwile shighati ya muzi, eri aelese wandu kufuma kele kaung'a kwa bighati yake.

¹³ Kwa hung'u, timughendele shighati ya chengo, tikutukise aibu yake.

¹⁴ Kwani aha urumenguni sitiwesi muzi ghotula, tio tikeghuhada muzi ghulya ghukujagha.

¹⁵ Kwa hung'u, kwa ngila ya Jesu yanafweni timulike Mlungu, iyo niyo sadaka ifunyogho ni milomu imughoragha iye kukala ni Bwana.

¹⁶ Mukumbuke kudea ghaloli na kuwarurana inyo wenyi, kwani izo nizo sadaka zimuboelagha Mlungu.

¹⁷ Musikile vilongozi venyu na muwate ghalye weghoragha. Walinda ngolo zenyu sikweo na kuzumuwa, kwani ni suti wafunye isabu kwa Mlungu lya utumishi ghwawe. Ilyi mwawasikila, wejedea kazi yawe kwa maboelo; ilyi mwalegha kuwasikila, wejedea kazi yawe wafuruse na iyo siyimuwaruragha inyo.

¹⁸ Mjuzile kutilombela isi. Tio na fulo kamba ngolo zetu zanaelile, kwa kukala tashaya ngelo zose kudea malagho gha hachi.

¹⁹ Namulomba na ndighi munilombele Mlungu kamba aniuje kwenyu kafwani.

Ilombi lyefunga

²⁰ Mlungu wanamuzusile Bwana wetu Jesu kufuma kele kifwa uyu ewo Mlisa Mubwaa wa ng'onzi kwa undu ghwa sadaka ya kifwa chake, na kwa icho Ilagano lya kale na kale lyikakwito mhuri.

²¹ Mlungu wa sere amuhawe vindu vose valoli vilya muvishaile eri mudee mashayo ghake, naye kwa ngila ya Jesu Kristo adee amweni kwetu ghalye ghedimagha kumuboela. Ubwaa ghukale kwa Kristo kwa kale na kale. Ameni.

Malagho gha kudua

²² Nemi namulomba wana wakwetu, musikizile kwa umbole uvoro ughu ghokumba ngolo; kwani barua iyi namwandikila si ndele ingi.

²³ Nanashaile mumanye kamba wakwetu Timotheo wanafunyilo kifungoni. Ilyi eja aha kafwani, nijejanya naye ngelo nijeja kumwona inyo.

²⁴ Waroghoweni vilongozi wenyu wose na wandu wose wa Mlungu. Wana wakwetu wa Italia wamuroghowa.

²⁵ Mbazi ya Mlungu ikale nenyo inyose.