Wahebrania 12 - UVORO GHWALOLI KWA WANDU WOSE

Mlungu Aba wetu

¹ Isi tio na ikoghano ilyi ibwaa lya washahidi lyatimara. Kwa hung'u tifunye mbali kila kindu chitiimagha, na kaung'a zilya zitinaililagha gii, na tikimbile kwa kurumaghia kele kukimbila kulya kuwo hambiri yetu.

² Meso ghetu ghamuzighane Jesu uyu idumusi lyetu lyio kwake kufuma kudyowa hata kudua. Kwani iye wanarumaghie kele msalaba. Ela kwa undu ghwa maboelo gheluo ghekemdafwa, seririkanye gha kufwishika waya ghwefwa kele msalaba, naye ndamu uwo kitembo kele mkonu ghwa kijo ghwa kifumbi cha Mlungu cha nguma.

³ Ririkanyeni ghalye ghamupatile, selyi arumaghie na ndighi kumenyo ni wakaung'a. Kwa hung'u simwafwe ngolo na kudaghada.

⁴ Kwani kele kulwana kwenyu na kaung'a, simulwanile hata kavui kuulagho.

⁵ Ado mwaluwala ghalye malagho Mlungu aghorire kwenyu wana wake? “Mwanwangu ukuzighane ngelo Mlungu ekufunyagha makosa na swafwe ngolo ngelo ekukanyagha.

⁶ Kwani Bwana wanamfunyagha makosa kila mundu amushaile na wanamuchapagha kila mundu emudumusagha kukala mwana wake.”

⁷ Rumaghieni kusirima, kwani ni makwito gha tatio. Kusirima kwenyu kwaonyeza kamba Mlungu wanamudeilagha sa wana wake. Kuo na mwana ungi sekwito ni tatie?

⁸ Ikakala simochapogho sa wana wake wose, inyo sinyo wana wake wengi wa fulo, ela ninyo wana wa shighati.

⁹ Ririkanyeni wana aba wativele selyi watideile, wanatikwitile na tikawahawa ishima. Ndamu siitifweni kuchumba kukuika isi ya makwito gha Aba wa kiroho na tikale moyo.

¹⁰ Wana aba wativele wanatichapile kwa ngelo njache selyi wewonile ni hachi, ela Mlungu watichapa kwa undu ghwa faida yetu, eri tighupate ueli ghwake.

¹¹ Ngelo yose tichapogho yanaonekanagha kwetu kukala si kindu chetidea tiboelo, ela cha kuwasilo. Ela konyuma walye wadeo kukala waloli ni makwito, wapata inosi lya sere lyekala wahachi.

Malaghizo na maonyo

¹² Ndamu nuleni mikonu yenyu yasilo ni ndighi, na mangiseni ngokoro zenyu zigaganikagha!

¹³ Mujuzile kusela kele ngila ighoroke, eri kighulu cha mshoghori sichashoghore, ela chibowe.

¹⁴ Mutime kukala na sere na wandu wose. Na mufunge ndighi kukala wa kuela. Kwani mundu seo nako sedimagha kumwona Bwana.

¹⁵ Mukulinde simwaisighe mbazi ya Mlungu. Mundungi sakale sa mwiti ghubile ghuzeguwagha na kuleta masirimi mengi kwa usungu ghwake.

¹⁶ Mundungi sakale mzingi ango sehawagha ishima malagho gha kiroho selyi Esau eluo, uyu ataghile hachi yake ya kukala mwana wa hambiri kwa kilalilo kimojori.

¹⁷ Nenyo mwamanya, konyuma ashaya kupata mubaraka ghwa tatie, kaimo, kwa kukala sapatile ulalo sena ghoriha, hata ngera sani wanaghuhadile kwa mbori.

¹⁸ Inyo simufikile kele mghondi ghwa Sinai ghuwatikagha selyi Waisraeli wefikile, andu koluo kukewaka moto, kiza na furuse na kiviriviri,

¹⁹ lwaka lwa tarumbeta na lwaka lukeghora. Nawo wandu waghenda kusikila lulya lwaka wakalomba siwasikile sena ilagho izima,

²⁰ Kwani siwadimile kuwata ghalye ghaghoriro, “Ilyi hata nyamandu yalatila ugho mghondi ni suti ilaso na mawe hata ifwe.”

²¹ Ghalye waghaonile gheluo ghengiza kiture, hata Musa kaghora, “Nagaganika kwa wogha.”

²² Ela inyo mwafika Mghondi ghwa Zioni na kele muzi ghwa Mlungu ewo moyo, Jerusalemu ya mlunguni, iwo na maelfu gha malaika.

²³ Mwafika andu kwa maboelo gha makoghano gha wana wa hambiri wa Mlungu, mazina ghawandiko mlunguni. Mwafika kwa Mlungu ewo mtaghanyi wa wadamu wose na kele roho za wandu waloli waeleso.

²⁴ Mweja kwa Jesu uyu ewo mpatanisi wa Ilagano Iwishi, na bighati yake itikile, ilya ilagagha malagho ghaloli kuchumba bighati ya Abeli.

²⁵ Ndamu kulideni, simwejelegha kumusikila ulya eghoragha. Walye weleghile kumusikila ulya aletile uvoro ghwa kuela urumenguni siwakilile. Ndamu isi tikilagha ije ilyi talegha kumusikila ulya eghoragha kufuma mlunguni?

²⁶ Lwaka lwake lwanashegheshe urumengu ilya ngelo, ela ndamu watilaga, “Nijesheghesha urumengu sena, ela si urumengu tu, ela na mlunguni.”

²⁷ Ilagho, “Sena” lyionyezagha mwazi kamba vindu viumbilo vijesheghesho na kufunyo, eri vilya vindu sivedimagha kusheghesho vikale.

²⁸ Ndamu isi timufunyile Mlungu asanta kwa kukala tipatagha uzuri sighoshegheshekagha. Timtase Mlungu kwa ngila ilya imuboelagha, kwa ishima na wogha;

²⁹ kwani Mlungu wetu fulo ni moto ghulunguzagha.