Wahebrania 10 - UVORO GHWALOLI KWA WANDU WOSE

¹ Sheria ya Wayahudi siiketi na ni fwana tu ya malagho ghenyi, ni sa kirenderende cha malagho ghaloli ghekujagha. Sadaka zilya zafunyo kila ngelo, mwaka hata mwaka, Ndamu Sheria idimagha ije kwa Sadaka kuwadea wandu waele na wamjile Mlungu?

² Ngera wandu wamtasagha Mlungu waombocholo fulo kele kaung'a zawe, macho siwekuonagha sena na kaung'a na sadaka zose macho zisighilo.

³ Ela kwa fulo, sadaka zifunyogho mwaka kwa mwaka, zakumbusa wandu kaung'a zawe.

⁴ Kwani bighati ya ng'ombe na mbuzi siidimagha kufunya kaung'a.

⁵ Kwa undu ughu ilyi Kristo eluo avui kuja urumenguni, wanamwuzile Mlungu, “Uwe sushaile sadaka na mafunyo, ela waniboesela muli.

⁶ Uwe suboelogho ni nyamandu ziishogho ndazi ndazi kele mazabahu ango sadaka zefunya kaung'a.

⁷ Niko nikaghora, ‘Imi nio aha Mlungu. Kudea mashayo ghako, Selyi kwenyi niwandikilo kele chuo cha Sheria.’”

⁸ Naye hambiri wanaghorire, “Uwe sushaile hata suboelogho ni sadaka na mafunyo, ango nyamandu ziishilo kele mazabahu na sadaka zefunya kaung'a.” Iye wanaghorire hung'u hata ngera sani sadaka zanafunyogho kuirimana na Sheria.

⁹ Nao kaghora, “Nio aha Mlungu kudea mashayo ghako.” Kwa hung'u Mlungu kasighana na sadaka zose za kale na kaika sadaka ya Kristo kibalo chake.

¹⁰ Kwa kukala Jesu Kristo wanadeile selyi Mlungu eshaile, isi itose taeleso kaung'a kwa sadaka afunyile ya muli ghwake kamojori na kwa wose.

¹¹ Kila mkohani wa Kiyahudi wanadeagha utumishi ghwake kila ijua na wanafunyagha sadaka mandu mengi, ela izi sadaka sizidimagha lyingi kufunya kaung'a.

¹² Ela Kristo wanafunyile sadaka mojori kwa kaung'a, sadaka ifweni kwa kale na kale, nao kakala kitembo mkonu ghwa kijo ghwa Mlungu.

¹³ Naye ndamu ondemdafurira Mlungu awaike wamaiza wake isi ya maghulu ghake.

¹⁴ Ndamu kwa sadaka yake mojori, wawaelesa kwa kale na kale walye wose waeleso kaung'a.

¹⁵ Naye Roho wa Kuela watihawa ushuhuda ghwake. Hambiri waghora,

¹⁶ “Ilyi nilyo ilagano nijedea nawo majua gha kudua, aghamba Bwana: Nijengiza sheria zangu ngoloni kwawe, na niziwandike kele akili zawe.”

¹⁷ Na sena waghora, “Sijekumbuka kaung'a na madeo ghawe ghawase sena.”

¹⁸ Kwa hung'u ilyi wafwilo waya, sadaka yefunya kaung'a zawe siishaikagha sena.

Timusughutile Mlungu

¹⁹ Kwa hung'u wana wakwetu, tio na udimo ghongila Andu kwa Kuela na Ndighi kwa undu ghwa kifwa cha Jesu.

²⁰ Iye wanatifungulile ngila mbishi, ngila iwo moyo, kuitila pazia, nagho ni muli ghwake.

²¹ Tio na Mkohani Mubwaa azighanagha nyumba ya Mlungu.

²² Kwa hung'u timusughutile Mlungu na ngolo ielile na idumusi lya fulo, kwa ngolo zieleso kufuma ulaghelaghe na kwa mili iwoghesho na meji ghaelile.

²³ Tiwate gii ikosereo tilyighoragha, kwani tadumusa Mlungu ukatisagha ilagano lyake.

²⁴ Tiririkanye kunula wambetu, kuwawarura, kuwashaya na kuwadeila ghaloli.

²⁵ Sitasighe kukoghana ngila mojori selyi wamoju wadea. Ela tikumbane ngolo kuchumba, kwani muonagha Ijua lya Bwana lyio avui.

²⁶ Kwani tikaendelea kudea kaung'a kidali nyuma ya kumanya fulo, sikuwesi sadaka ingi sena idimagha kufunya kaung'a.

²⁷ Ela chasigho ni kudafurira na wogha kutaghanyo na moto ghubile ghujewahaitisa walye wose weo kinyume cha Mlungu.

²⁸ Mundu uyo wose sewatagha Sheria ya Musa wanaulaghogho sikwewo kufwilo waya ilyi ataghanyo kukala mkosa kwa ushuhuda ghwa wandu waili ango watatu.

²⁹ Ndamu ikalagha ije kwa mundu emumenyesagha Mwana wa Mlungu, na kuimenya bighati ya Ilagano lya Mlungu lyielesagha kaung'a, na kutukana Roho wa mbazi? Hebu ririkanya ni makwito ghafweni ije eghapatagha?

³⁰ Kwani tamumanya uyu aghorire, “Imi nilwanilagha; Imi nilipilagha.” Na sena aghorire, “Bwana utaghanyagha wandu wake.”

³¹ Kujekala na wogha mubwaa kugwila kele mikonu ya Mlungu ewo moyo.

³² Ela mukumbuke selyi moluo ko kale. Ghalye matuku nyuma ya kulangalilo ni mlangazi ghwa Mlungu, mwanasirime malagho mengi, ela mwanarumaghie.

³³ Mwanatukano ngelo zimoju wanduni na kutiriro na ngelo zimoju mokufunyile kuwatana na walye weluo wekedeilo hung'u.

³⁴ Mwanawaonelele mbazi wafungo kwa kusirimiso kwawe, na vindu venyu vose viuso mwanarumaghie kwa kuboelo, kwa kukala momanyile mpatagha kindu chaloli chikalagha kwa kale na kale.

³⁵ Kwa hung'u simwafwe ngolo, kwa kukala kumpatilagha inosi ibwaa.

³⁶ Yanamfweni kurumaghia, eri mudee mashayo gha Mlungu na kupata chilya alagile.

³⁷ Kwani Mawandiko gha Kuela ghaghora, “Kwani ni kwa ngelo njache, na ulya ekujagha ujeja semukagha luma.

³⁸ Ela wandu wangu wa hachi wekalagha moyo kwa idumusi: ela ilyi mundungi auya na nyuma siboelanyogho naye.”

³⁹ Isi, sisi wandu weuya na nyuma na kulaghaya, tio na idumusi na tanakizilo.