Wafilipi 4 - UVORO GHWALOLI KWA WANDU WOSE

Malaghizo

¹ Kwa hung'u, wana wakwetu washayo, nio na beha yewaona, inyo ninyo mabwelo ghangu na kofia ya usimi ghwangu, mangeni kele Bwana washayo.

² Nendemlomba Eudio na Suntike wasikilane kwa undu ghwa Bwana.

³ Nendekulomba uwe nawose uwo mdei kazi wa fulo ngila mojori nemi, uwawarure awa wake, kwani niwadei kazi ya Injili ngila mojori nemi na Klementi na wadei kazi wambetu wose, awa mazina ghawe gheo kele chuo cha umana.

⁴ Boeloni kele Bwana majua ghose, sena ndeghora boeloni!

⁵ Na umbole ghwenyu ghumanyo ni wandu wose. Bwana uwo kavui.

⁶ Simwakambo ni chongo kwa ilagho lyingi, ela kele kila kindu kwa malombi gha ngolo ya asanta, mahadi ghenyu ghose ghamanyikane kwa Mlungu.

⁷ Na sere ya Mlungu iisagha kumanya kose, imulinde ngolo na suku zenyu kele Kristo Jesu.

⁸ Kudua, wana wakwetu, gharirikanyeni agha: malagho ghose gha fulo, malagho ghose gha ishima, malagho ghose gha hachi, malagho ghose ghaelile, malagho ghose gheboelagha, malagho ghose ghaloli, ngera kuwo uloli na ngera kuwo na chingi cheliko.

⁹ Na agho ghose mukufundise kwangu na kughahokera na kughasikila na kughaona ghadeeni, na Mlungu wa sere ukalagha ngila mojori nenyo.

¹⁰ Nio na kuboelo kubwaa kwa Bwana, kwa kukala ndamu muo na ngolo ya kushaya kunitunza; fulo mwoshaile kunitunza, ela ni ulalo tu mosowile.

¹¹ Sinung'unikagha kwa undu ghwa kushaya vindu; kwani nanakufundise kukato ni ivi nio navo.

¹² Nanaweni kugotua na nanaweni ungi, kele kila ngila na hali zose nanakufundise kupata vingi na kukala njala, kukala na vingi na kusowa.

¹³ Nadima kudea malagho ghose kwake uyu enidimisagha.

Asanta kwa inosi

¹⁴ Ela kwa ughoma ghwenyu mwananiwarura kele masirimi ghangu.

¹⁵ Inyo wandu wa Filipi mwanaweni inyo wenyi kamba kufuma kudyowa kuchila kwa Injili, nighenda niuka Makedonia, sikwesi ikanisa lyingi lyiwatane nemi kele kufunya na kupata ivi neshaile sala inyo.

¹⁶ Kwa kukala hata Thesalonike, monitumilile uwaruri kila ngelo.

¹⁷ Si kughamba nendeshaya manosi, ela nanashaile mavalo ghajuzilike kele isabu lyenyu.

¹⁸ Napata mafunyo ghose hata na kuchumba, Najula ndii nighenda nipata manosi muniletelele na Epafrodito. Kwani ni sadaka inukagha kirani ya Mlungu idumusilogho na imuboelagha.

¹⁹ Naye Mlungu wangu ujemhawa vose mushaile kuirimana na uzuri ghwake na ubwaa kele Kristo Jesu.

²⁰ Kwa Mlungu wetu na Aba kukale ubwaa kwa kale na kale! Ameni.

Maroghoi gha kudua

²¹ Waroghoweni wandu wose wa Mlungu weo kele Kristo Jesu. Wana wakwetu tikezanye wamuroghowa.

²² Wandu wose wa Mlungu wamuroghowa, kuchumba wa nyumba ya Kaisari.

²³ Mbazi ya Bwana Jesu Kristo ikale na roho zenyu.