Wafilipi 3 - UVORO GHWALOLI KWA WANDU WOSE

Hachi ya fulo

¹ Kudua wana wakwetu, Boeloni kele Bwana. Nionagha si laghelaghe ingi kumwandikila malagho ghalye ghenyi nemwandikile kwani ghemwaruragha.

² Kulindeni na chuchu, wandu wedeagha ghawase, wandu weshotereagha kuchwigho muli.

³ Kwani isi nisi tichwilo fulo zenyi na siwo wengi, kwa kukala tanamtasagha Mlungu kwa ngila ya Roho wa Mlungu na tanaboelogho kele Kristo Jesu. Sititalagha gha muli kungi.

⁴ Imi mwenyi nadima kukukasa kele muli, ikakala mundungi wadima kukukasa, imi ni kuchumba.

⁵ Imi nanachwilo ijua lya nane. Nimi Mwisraeli kwa kuvalo na ne wa mbari ya Benjamini. Mhebrania avelo ni Mhebrania. Kwa kuirima sheria nimi Mfarisayo.

⁶ Nemi neluo na chadi kibwaa hata nikalyitirira ikanisa na kwa kuirima hachi ya sheria seluo na makosa.

⁷ Ela agha ghose neluo nikeghatala kukala ni faida, naghatala kukala ni hasara kwa undu ghwa Kristo.

⁸ Kwa fulo navitala vindu vose kukala hasara kwa undu ghwa gheo bora, ghemumanya Kristo Jesu Bwana wangu. Kwa undu ghwake nasigha kila kindu, nikevitala kukala sa mavi eri nimpate Kristo,

⁹ na nionekane niwataniso naye, sikweo kwa hachi yangu imi mwenyi ipatikanagha kwa sheria, sala ilya ipatikanagha kwa ngila ya idumusi kele Kristo. Hachi ifumagha kwa Mlungu kwa idumusi.

¹⁰ Eri nimumanye Kristo na ndighi za kuzuka kwake na niwatane naye kwa kutiriro kwake, nikekala saye kele kufwa,

¹¹ eri namose nikoseree kufikila kuzuka kwa wafwa.

Kukimbilila ilengo lyetu

¹² Sighambagha kamba namalila kupata ango nakala karakara kungi, ela nio nikekukaza kughenda hambiri nipate lyilya inosi Kristo Jesu anideilile imi nikale wake.

¹³ Wana wakwetu sighoragha kamba namalila kupata lyilya inosi, ela nadea ilagho imojori, lyesigha gheo nanyuma na nikekimbilila gheo hambiri.

¹⁴ Kwa hung'u nio nikekimbila kwa lyilya ilengo lyangu, eri nipate inosi nipang'ililo ni Mlungu kwa ngila ya Kristo Jesu kwa umana ghwa ighulu.

¹⁵ Isi isose tazegua kiroho tikale na maririkanyo ghalye ghenyi; na ngera muo na maririkanyo mazima, Mlungu umumanyisagha agho na ghose.

¹⁶ Hata ikale ni kwa kimuni, tighende hambiri na mghendo ghwa fulo ughu tighupatile.

¹⁷ Wana wakwetu niirimireni na sena muwairimire walye weirimagha selyi tio.

¹⁸ Kwani namughorera kengi na ndamu sena ndemughorera na mbori meso, kuwo wengi wendekala wamaiza wa msalaba ghwa Kristo.

¹⁹ Kudua kwawe ni motoni, mlungu wawe ni kifu, ubwaa ghwawe ni kufwishika waya. Maririkanyo ghawe ghose gheo kele vindu va urumengu ughu.

²⁰ Ela isi nisi wakidina wa mlunguni na kufuma mlunguni timudafuriragha Mkizi, Bwana Jesu Kristo.

²¹ Naye ughalulagha mili yetu minyonge ikale sa muli ghwake ghwa ubwaa, kwa ndighi zilya zenyi zidimagha kuika vindu vose isi yake.