Wafilipi 2 - UVORO GHWALOLI KWA WANDU WOSE

Kukuseleza kwa Kristo na ubwaa ghwake

¹ Ngera kukala kwenyu kwa Kristo kwamhawa ndighi na mashayo ghake ghamsarusa, muo na Roho imudeagha muonelane mbazi na kufwilana waya inyo wenyi.

² Katiseni mabwelo ghangu kwa kukala na maririkanyo ghafwanane, mshayane, mukewatana na muo na maririkanyo ghamojori.

³ Simwadee ilagho lyingi kwa ngolo yesimana ango kukukasa, ela mkale wandu wekuseleza na wetalagha wazima kukala bora.

⁴ Mundungi sahade faida yake mwenyi, ela ahade faida ya wambawe.

⁵ Ngolo ifweni mkale nayo; ikale ilya yenyi yeluo na Kristo Jesu:

⁶ Iye oluo ni Mlungu kufuma kale, ela satalile ghulya ulungu ghwake kukala ni kindu chingi.

⁷ Ela kwa kushaya mwenyi, kasigha ghose, kakudea mtumishi, kwa kuusa muli ghwa mdamu.

⁸ Naye kele kidamu chake kakuseleza na kasikila hata kifwa, kifwa cha msalaba.

⁹ Kwa hung'u, Mlungu kamunula ighulu na ndighi na kumhawa izina lyiisile mazina ghose.

¹⁰ Eri kwa izina lya Jesu, ngokoro za vindu vose viumbilo zidyayo, mlunguni na msangeni na msangeni na mweni.

¹¹ Na nyumi zose zighore Jesu Kristo ni Bwana kwa ubwaa ghwa Mlungu Aba.

Kung'ala sa mlangazi kele urumengu

¹² Kwa hung'u, washayo wangu, ni selyi kwenyi moluo mkenisikila, munisikile ndamu ngelo iyi sitekezanye kuchumba ngelo ilya tekezanye. Deeni kazi kwa wogha na kugaganika kwa undu ghwa ukizi ghwenyu

¹³ Kwani Mlungu wanadeagha kazi amweni kwenyu kwa kushaya na udeagha kuirimana na ghaloli aghapangile.

¹⁴ Deeni malagho ghose sikweo na kuzughunuka ango kukotela.

¹⁵ Eri mkale simowesi makosa na muo muelile sa wana wa Mlungu, weo kele urumengu ghwa laghelaghe na ghwa wandu wa kaung'a. Inyo mung'ale ghati yawe selyi ndonde zing'alagha kele urumengu ghwa kiza,

¹⁶ mkewata putu ilagho lya umana; eri nipate kukukasa kele Ijua lya kuja Kristo kamba sikimbile tuu na kazi yangu siyeluo nduu.

¹⁷ Hata bighati ya umana ghwangu ikatika sa mafunyo kele sadaka ya idumusi lyenyu. Nikalagha na kubwelo ngila mojori nenyo.

¹⁸ Nenyo nanyose muboelo ngila mojori nemi.

Timotheo na Epafrodito

¹⁹ Nakoserea Bwana Jesu kashaya, nimtumagha Timotheo kwenyu kafwani, eri nikumbo ngolo kwa kupata uvoro ghwenyu.

²⁰ Siwesi mundungi saye, edimagha kuzighana malagho ghenyu kwa ngolo.

²¹ Wandu wose wendetala malagho ghawe ghenyi, siwatalagha malagho gha Jesu Kristo.

²² Timotheo selyi mumanyagha wanamufweni; kwani iye nemi, sa mwana na tatie ngila mojori watumikila Injili.

²³ Kwa hung'u, nio nikekoserea kumtuma kwenyu ngelo namanya selyi malagho gheghendagha.

²⁴ Nemi nadumusa kwa Bwana kamba namose nadima kuja kafwani.

²⁵ Neonile ni kirani nimtume kwenyu wakwetu Epafrodito ewo mumbetu kazini na uteni, naye ni mtumiki wenyu na mundu anitariagha kwa vindu vangu.

²⁶ Kwani uwo na beha yemwona inyose na seo na kuboelo kwa kukala mwanasikile ni mkongo.

²⁷ Fulo kwenyi oluo mkongo avui na kufwa. Ela Mlungu kamfwila waya, na si iye keng'weri, ela nemi namose, eri nisapato ni furuse mbwaa.

²⁸ Kwa hung'u, nio na beha na ndighi kumtuma kwenyu, eri muboelo sena kwa kumwona na kufurusa kwangu kudue.

²⁹ Kwa hung'u mkaribisheni kwa mabwelo kwa undu ghwa Bwana. Na muwahawe ishima wandu sa awa.

³⁰ Kwani oluo kavui na kufwa kwa undu ghwa kazi ya Kristo, kangiza ndengweni umana ghwake eri akatise utumishi ghwenyu kwangu.