Wafilipi 1 - UVORO GHWALOLI KWA WANDU WOSE

¹ Imi Paulo na Timotheo, watumishi wa Kristo Jesu, kwa wandu wa Mlungu wose wakalagha Filipi, ngila mojori na maaskofu na mashemasi:

² Mbazi na sere zifumagha kwa Mlungu Aba na kwa Bwana Jesu Kristo zikale kwenyu.

Ilombi lya Paulo kwa Wafilipi

³ Namufunyila asanta Mlungu wangu kila ngelo nimukumbukagha inyo;

⁴ ngelo zose namlombela inyose, namulombela kwa kuboelo,

⁵ kwa kukala mwananiwarure kele kazi ya Injili kufuma kudyowa hata lelo.

⁶ Nemi namanya putu kamba Mlungu uyu adyowile kazi yaloli amweni kwenyu, uikatisagha kele ijua lya Jesu Kristo.

⁷ Nemi nionagha ni hachi nisikile hung'u ighulu yenyu inyose. Kwani muo ngoloni kwangu kwa kukala mwawatana nemi kele mbazi iyi Mlungu anihawile yetetela Injili, ngelo iyi nio kifungoni na ngelo neluo nisefungilo.

⁸ Mlungu niye shahidi wangu, kamba nendeghora fulo na kamba nanashaile kumwona inyose kwa mashayo gha Kristo Jesu.

⁹ Na malombi ghangu ni mashayo ghenyu ghajuzilike kuchumba, ngila mojori na kumanya kwa fulo na kutambukilo kuketi,

¹⁰ eri mpate kusaghula gheo ghaloli. Nao ima mkale muelile simwowesi ilibo kele Ijua lya Kristo.

¹¹ Mukejuzo mavalo gha hachi ghepatikanagha kwa Jesu Kristo, ghamhawe Mlungu ubwaa na kukaso.

Kukala moyo ni Kristo

¹² Nemi nanashaile wana wakwetu mumanye kamba agha ghanipatile, ghananipatile kwa undu ghwa kueresa Injili.

¹³ Na kwa hung'u askari na wandu wose wa aha wamanya kifungo changu ni kwa undu ghwa Kristo.

¹⁴ Nako kufungo uku kwawahawa uing'oni wana wakwetu kele Bwana, waghore ilagho lya Mlungu sikweo na wogha.

¹⁵ Wamoju fulo wamuchila Kristo kwa iziso na marashano, ela wamoju kwa ngolo yaloli ielile.

¹⁶ Nawo awa wadea hung'u kwa mashayo, wekemanya kamba nio aha kwa undu ghwa kutetela Injili.

¹⁷ Walye wamoju siwamchilagha Kristo kwa mashayo kungi, ela kwa kukushaya wenyi, wekeririkanya kamba wenisirimisagha imi kele kifungo changu.

¹⁸ Sikwesi ilagho lyingi, Ngera ni kwa kutima ango kwa fulo; lyiniboelagha ni kamba Kristo wachilo.

¹⁹ Fulo nijeboelo, kwa kukala namanya malombi ghenyu ngila mojori na utario ghwa Roho wa Jesu Kristo, agha gheghalukagha ghakale ukizi ghwangu.

²⁰ Nagho agha nigho beha na makosereo ghangu eri safwishike waya ghungi, ela kwa mighori, indakwenyi na kila ngelo Kristo ahao ishima kele muli ghwangu, ikalagha ni kwa kukala moyo ango kufwa.

²¹ Kwani kukala moyo kwangu ni Kristo na kufwa ni faida,

²² Ela ikakala kukala moyo kwangu ni kudea kazi yaloli. Aho simanyagha ni lyio lyesaghula?

²³ Nio ghati ya malagho maili. Nanashaile nighende nikalanye na Kristo, kwani hung'u niko kirani.

²⁴ Ela kukala moyo kwangu kufwanagha kwa undu ghwenyu.

²⁵ Fulo namanya kamba nisighogho nikalanye nenyo inyose, kwa undu ghwa kughenda hambiri na kuboelo kwenyu kele idumusi,

²⁶ eri kwa kukalanya nenyo hung'u sena mjekala na kindu cheonyeza kukukasa kwangu kele kuwatanisa na Kristo Jesu.

²⁷ Ndamu ilagho ibwaa ni ilyi, mghendo ghwenyu ghukale karakara na Injili ya Kristo, eri ilyi neja kumwona ango nisejile, nisikile kamba mwanamangile na muo wandu wa ilengo imojori na kwa ngolo mojori mwawatana mkelwana kwa undu ghwa idumusi lya Injili.

²⁸ Simwawaoghe wamaiza wenyu, ela kila ngelo mkale mang'oni gheonyezagha kamba muwasimagha, kwa kukala Mlungu niye emuhawagha kusima.

²⁹ Kwani mwanahawilo kumutumikila Kristo si kwa kumdumusa tu, ela hata kusirima kwa undu ghwake.

³⁰ Ndamu mwangila kele uta neluo nagho, mughuonile na mughusikilagha ni ghwangu nilwanagha.