Waefeso 6 - UVORO GHWALOLI KWA WANDU WOSE

Wanake na wavali

¹ Inyo wanake wasikileni wavali wenyu kele Bwana, kwani iyo niyo hachi.

² “Umudeile ishima tatio na meo”, ughu ni mlomu ghwa hambiri ghuo na ilaghizo,

³ “eri malagho ghako ghaghende kirani na ukale na majua mengi kele isanga.”

⁴ Nenyo wavali simwawadee wana wenyu wawasilo, ela muwalele kele ngila ya ishima na mafundiso gha Bwana.

Wasunyi na mabwana

⁵ Nenyo wasunyi wasikileni wana bwana wenyu wa ughu urumengu kwa kuwaogha na kuwagaganikila, kwa ngolo ielile sa kumutumikila Kristo.

⁶ Simwadee hung'u eri muono ni wandu, ela sa watumishi wa Kristo wedeagha kwa ngolo agha Mlungu ashaile.

⁷ Mtumike kwa ngolo yaloli sa kwa Bwana na si kwa wadamu.

⁸ Mukemanya kamare kamba icho chose chaloli mundu edeagha, naese upatagha ghaloli kufuma kwa Bwana, akalagha ni msunyi ango mkidina.

⁹ Nenyo wana bwana mudee ukwenyi kwa wasunyi wenyu, simwamturuse mundungi. Ela mukumbuke kamba uwo Bwana wenyu na wawe mlunguni, na kwake wose weo karakara.

Mata zose za Mlungu

¹⁰ Kuduweni, kaleni na ndighi zewatana na Bwana, mumange kele ndighi zake mbwaa.

¹¹ Murware mata zose za Mlungu zimudimisagha kusima uya ghuwase ghwa Shetani.

¹² Kwani kulwana kwetu si kulwana na mdamu kungi, ela ni kulwana na ijeshi lyiwase lya urumengu ghwa roho, na watawala na wabwaa wa ndighi wa urumengu ghwa kiza.

¹³ Kwa hung'u rwareni mata zose za Mlungu, eri mupate kusima kele ijua lya laghelaghe, na mkamalila kudea ghose mumange.

¹⁴ Kwa hung'u mangeni, kwa kurwara fulo sa mkoa chunu, murware hachi sa nguo ya chuma lagaya,

¹⁵ na mungize vilatu va ilagho lyaloli lya sere kele maghulu.

¹⁶ Ngila mojori na ivi vose muwate ngao ya idumusi idimagha kuzima mawano gha moto gha ulya mumaiza.

¹⁷ Sena murware kofia ya chuma ya ukizi na lufu lwa roho, nilyo ilagho lya Mlungu.

¹⁸ Deeni agha ghose kwa malombi, mkelomba uwaruro kwa Mlungu. Lombeni kila ngelo selyi Roho emulongozagha. Kwa undu ughu kaleni meso simwakoje na mutule mkewalombela wandu wose wa Mlungu.

¹⁹ Nilombeleni namose, eri nihawo udimo ghoghora sikowesi wogha ghavisike gha Ilagho Lyaloli,

²⁰ ilyi lyanidea nikale mtumo ewo kifungoni. Nilyighore sikweo na wogha ghungi selyi ifweni.

Maroghoi gha kudua

²¹ Ndamu namanya mwanashaile kumanya selyi nio na selyi nideagha, Tukiko wakwetu mshayo na mtumishi wa Bwana mdumusiliki umughoreragha malagho ghose.

²² Namtuma kwenyu kwa undu ughu, eri amughorere malagho ghetu na amukumbe ngolo.

²³ Sere na mashayo ngila mojori na idumusi kufuma kwa Mlungu Aba na Bwana Jesu Kristo, vikale kwa wana wakwetu.

²⁴ Mbazi ya Mlungu ikale kwa wose wamushaile Bwana Jesu Kristo kwa mashayo sigheduagha.