Waefeso 5 - UVORO GHWALOLI KWA WANDU WOSE

Kukala mlangazini

¹ Kwa hung'u inyo sa wana mushailo, muirimireni Mlungu.

² Mghende kwa mashayo, selyi Kristo etishaile hata kakufunya iye mwenyi kukala sadaka inukagha kirani na sadaka yemuboela Mlungu kwa undu ghwetu.

³ Ela inyo sa waeli wa Mlungu, uzingi na ulaghelaghe ghungi ango choyo sivaghoro kwenyu.

⁴ Hata malagho ghengi ghefwisha waya ango uzimu ango milomu iwase siyaghoro kwenyu, sala kumfunyila Mlungu asanta.

⁵ Mumanye kamba muzingi ango mundu wa laghelaghe ango mundu wa choyo (uyu ni mutasi sanamu) sepatagha ufwa ghwa uzuri ghwa mlunguni ghwa Kristo na Mlungu.

⁶ Mundungi samwembeembe na malagho matuu. Kwani ni kwa undu ughu hare ya Mlungu iwajilagha walye wasikiriwe.

⁷ Kwa hung'u, simwawatane nawo.

⁸ Kwani ko hambiri mwoluo kele kiza, ela ndamu ninyo wandu wa mlangazi kele Bwana. Kwa hung'u, ghendeni sa wana wa mlangazi,

⁹ kwani mavalo gha mlangazi ghanaonekagha kele ghose gheo ghaloli na gha hachi na gha fulo.

¹⁰ Timeni kukufundisa ghalye ghemuboelagha Bwana.

¹¹ Simwawatane na kazi za kiza sizevalagha kindu chingi, ela yanafweni muzifunukule.

¹² Kwani ni waya kughora malagho waghadeagha kivisoni.

¹³ Ela ilyi kindu chingi chafunukulo mlangazini chionekagha,

¹⁴ kwani icho chose chionekanagha ni mlangazi. Kwa hung'u Mawandiko ghaghora, “Lavisa uwe utungure Zuka kufuma kele kifwa Naye Kristo ujekulangaza.”

¹⁵ Zighaneni mghendo ghwenyu, simwaghende sa wazimu ela sa wandu walachu.

¹⁶ Tumieni kirani ngelo zenyu, kwani majua agha ni gha laghelaghe.

¹⁷ Kwa hung'u simwakale wazimu, ela wandu wetambukilogho selyi mashayo gha Bwana gheo.

¹⁸ Hata simwanaruwe kwa divei, kwani yanadeagha wandu kukala wa kisha. Ela mujulo ni Roho wa Kuela.

¹⁹ Muheleaneghe kwa malagho gha Zaburi na nyumbo za kiroho; mwimbileni Bwana nyumba na Zaburi kwa kumkasa ngoloni kwenyu.

²⁰ Mukemfunyila asanta Mlungu Aba kila ngelo kwa undu ghwa vindu vose, kwa izina lya Jesu Kristo Bwana wetu.

Wake na walume

²¹ Mukuseleze kila mumoju kwa mumbawe kwa undu ghwa Kristo.

²² Wake wausilo wawasikile walume wawe sa kumusikila Bwana.

²³ Kwani mlume ni chongo cha muke, selyi Kristo ewo chongo cha ikanisa ilyo lyio muli ghwake; naye ni Mkizi wa ikanisa.

²⁴ Na selyi kwenyi ikanisa lyimusikilagha Kristo, niko kwenyi na wake wawasikile walume wawe kwa kila kindu.

²⁵ Nenyo walume, washaeni wake wenyu selyi Kristo eshaile ikanisa, hata kakufunya kufwa kwa undu ghwake,

²⁶ na kwa ilagho lyake kalyielesa kwa Mlungu. Naye kalyioghesha kwa meji,

²⁷ eri akupatile ikanisa lyaloli silyewesi ilibo ango kuhurika ango ghengi sa agho. Ela lyikale lya kuela silyewesi makosa.

²⁸ Na walume ni ukwenyi, wawashaye wake wawe selyi wakushaile wenyi. Mlume kamshaya mkwake, ondekushaya iye mwenyi.

²⁹ (Sikuwesi mundungi aghumenyagha muli ghwake, ela waghulyisa na kughurusa, selyi Kristo alyideilagha ikanisa,

³⁰ kwa kukala isi nisi viungo va muli ghwake.)

³¹ Selyi Mawandiko gha Kuela gheghoragha, “Kwa undu ughu Mundu umusighagha tatie na mee, awatane na mkwake, na awa waili wejekala muli ghumojori”.

³² Aha kuo na fulo ivisike. Nemi nionagha agha ghendeghoro ighulu ya Kristo na ikanisa.

³³ Ela ni hung'u kwenyi imufweni kila mlume amushaye mkwake sa iye mwenyi na muke amuhawe mlume wake ishima.