Waefeso 4 - UVORO GHWALOLI KWA WANDU WOSE

Umojori ghwa muli

¹ Kwa hung'o, namulomba imi nio mfungo kwa undu ghwa kumtumikila Bwana, mghende karakara sa kupang'o kwenyu ni Mlungu,

² kwa kukuseleza na umbole na kurumaghia, mkerumaghianya inyo wenyi kwa mashayo.

³ Mukale na kasidi kuleta umojori ghwa Roho, ughu ghumuletelagha sere.

⁴ Kuwo na muli ghumojori na Roho mumojori, selyi kuwo na ikosereo imojori kwa Mlungu amupang'ile.

⁵ Bwana mumojori, idumusi imojori na ubatizo ghumojori,

⁶ na Mlungu mumojori, Aba wetu itose, uyu ewo ighulu ya wose na kwa wose na kele wose.

⁷ Ela isi itose tanahawilo mbazi iketi kwa inosi lya Kristo.

⁸ Kwa hung'u, Mawandiko gha Kuela ghaghora, “Ajoka noko ighulu, otwalile mateka waenga; kawahawa wandu manosi.”

⁹ Ndamu nini kughora, “Wanajokile noko ighulu?” Ni kughora, jako wanaselele kele urumengu.

¹⁰ Kwa hung'u, uyu aselele niye mwenyi ajokile mlunguni eri ajuze vindu vose.

¹¹ Naye niye awahawile wandu manosi; wamoju wakale watumo, wamoju wana tondolo, wamoju wachili injili, wamoju walisa na walimu.

¹² Kawaika kirani wandu wose wa Mlungu kwa kazi yetumika, eri wawaghale muli ghwa Kristo.

¹³ Hung'u tighufikile umoju ghwa idumusi lyetu na kumumanya Mwana wa Mlungu, tikale wandu wazegue na kufikila kukatana na Kristo.

¹⁴ Sitakale wanake wakoo wetuko ni mivomivo ya bahari na kuburuso ni kila mbeo ya mafundiso gha wandu wakalile gheembaemba.

¹⁵ Ela ilyi taghora fulo kwa mashayo tizeguwagha kele Kristo, uyu ewo chongo cha muli ghose.

¹⁶ Kwani kwake muli ghose ghwawatana na kila kiungo chake chadea kazi yake karakara, kughudea muli ghuzeguwe na kuwaghalika kele mashayo.

Maisha maishi kwa Kristo

¹⁷ Ndamu namuonya kwa undu ghwa Bwana, simwakale sa wandu siwedumuse, wewo na maririkanyo gha kizimu.

¹⁸ Kwani weo kizeni, siwetambukilo selyi Mlungu ashaile tikale, kwa undu ghwa uzimu na kukulo ni ngolo kwawe.

¹⁹ Wasowa kulya kuona waya; na wakufunya kwa malaghelaghe eri wadee malaghelaghe ghose weo nagho beha.

²⁰ Ela inyo simukufundise hung'u ighulu ya Kristo.

²¹ Namanya mwanasikile malagho ghake na kufundiso hachi yake.

²² Kwa hung'u msighane na mghendo ghwa kale, ghulya undu ghwenyu ghwa kale gholuo ghukehakilo ni tamaa za ndimi;

²³ na mughalulo waishi rohoni na akili zenyu,

²⁴ na murware uishi ghudeilo kufwanana na Mlungu ghuo ghwa hachi na ghwa kuela.

²⁵ Kwa hung'u, sigheni ndimi mughorerane fulo, kwa kukala itose tio wandu wa muli ghumojori.

²⁶ Ilyi mwawasilo, simwadumusile hare imudee mungile kaung'eni na simwakale na hare hata ijua lyiswe.

²⁷ Simwamuhawe shetani ulalo.

²⁸ Uyu mundu eluo kiting'a; saiwe sena, ela adee kazi na mikonu yake, awawarure walye siwewo na udimo ghungi.

²⁹ Hata milomu yenyu siyaghore laghelaghe, ela ighore ghaloli ghedimagha kuwarura wazima na kuwahawa mbazi.

³⁰ Na simwamuharise ngolo Roho wa Kuela wa Mlungu; kwani Roho ni alama ya Mlungu ninyo wake, na kamba ijua lyikujagha lya Mlungu kumukombola.

³¹ Sighaneni na kubia, kimenya, hare, zuhe, vitukano na kila ulaghelaghe.

³² Na mkale na ngolo yaloli yefwilana waya na yesigha makosa, selyi Mlungu kwa ngila ya Kristo atifwilagha waya isi.