Waefeso 2 - UVORO GHWALOLI KWA WANDU WOSE

Kufuma kele kifwa na kungila kele Umana

¹ Nenyo moluo mufwile kiroho kwa undu ghwa kaung'a na makosa ghenyu,

² ilyi moluo mukeirima ngila za laghelaghe za urumengu ughu, mukemusikila mubwaa wa pepo za ndighi za mbeoni, uyu adeagha kazi indakwenyi kwa wandu siwemusikilagha Mlungu.

³ Isi natose teluo ukwenyi, tikekala kele tamaa zetu za mili, tikeirima mashayo gha muli na akili zetu, na kwa hung'u, natose teluo wepata makwito gha Mlungu sa wose wazima.

⁴ Ela Mlungu wa mbazi nyingi kwa mashayo ghake mabwaa otishaile,

⁵ hata ngera sani teluo tifwile kwa kaung'a zetu katizusa ngila mojori na Kristo. Ni kwa mbazi ya Mlungu mwakizo

⁶ Kwa kuwatana na Kristo Jesu, Mlungu katizusa ngila mojori naye na kutikalisa kele kifumbi cha nguma chetawala na Kristo Jesu,

⁷ kamba kele urumengu ghukujagha aonyeze ubwaa ghwa mbazi yake mbwaa kwetu kwa undu ghwa Kristo Jesu.

⁸ Kwani ni kwa mbazi yake mwakizo kwa idumusi, si kwa madeo ghenyu ghengi, ela ni inosi lya Mlungu,

⁹ hata si kindu chingi tideile chaloli, kwa hung'u, mundungi sakukase.

¹⁰ Kwani isi nisi kazi ya Mlungu, tiumbilo kele Kristo Jesu kwa undu ghwa kazi zaloli aziikile Mlungu kufuma aho, eri tizidee

Nisi wamojori kele Kristo

¹¹ Kwa hung'u inyo wandu wa mbari nzima, mukumbuke selyi moluo kele muli mukeito wandu siwechwilo ni walye wachwilo, kulya kuchwigho muli kudeilo kwa mikonu.

¹² Nenyo iyo ngelo moluo kulele na Kristo; moluo wagheni na simoluo wandu wa Mlungu wasaghulo. Simoluo wandu wa ilagano. Nenyo moluo simowesi ikosereo lyingi na moluo simweo na Mlungu.

¹³ Ela ndamu, kwa kuwatana na Kristo Jesu, inyo moluo kulele, mwaleto kavui kwa undu ghwa bighati ya Kristo.

¹⁴ Kwani iye niye sere yetu. Niye adea Wayahudi na wandu wa mbari nzima kukala wandu wamojori, kwa kuvunja ukinda gholuo ghuketisara na kutidea tikale wamaiza.

¹⁵ Kwa muli ghwake, milomu na sheria za Wayahudi zikasigho, eri aumbe iye mwenyi mbari mojori kibalo cha mbili na kwa ngila iyi kaleta sere.

¹⁶ Kwa kifwa chake kele msalaba katipatanisa na Mlungu kukala muli ghumojori, kamalila kamare umaiza.

¹⁷ Kwa hung'u, Kristo wanajile kuchila sere kwa wose, kwenyu inyo moluo kulele na kwa walye weluo kavui.

¹⁸ Kwani kwa undu ghwake, itose kwa Roho mumojori tafika kwa Aba.

¹⁹ Kwa hung'u, inyo sinyo wagheni wengi na watambi, ela ninyo wakidina ngila mojori na waeli na wandu wa nyumba ya Mlungu.

²⁰ Mwawaghalo ighulu ya msingi ghwa watumo na wana tondolo, naye Kristo Jesu mwenyi niye iwe lya mbembeni.

²¹ Kwake iwaghali lyose lyamanga na kuzegua lyikale hekalu ya kuela ya Bwana.

²² Nenyo nanyose mwawaghalo kwake kukala makalo gha Mlungu kwa ngila ya Roho.