Waefeso 1 - UVORO GHWALOLI KWA WANDU WOSE

¹ Imi Paulo, mtumo wa Kristo Jesu kwa undu ghwa mashayo gha Mlungu, kwa wandu wa Mlungu weo Efeso, wadumusiliki kele kuwatana na Kristo Jesu:

² Mbazi ikale kwenyu na sere ifumagha kwa Mlungu Aba na kwa Bwana Jesu Kristo.

Baraka za kiroho kele Kristo

³ Akaso Mlungu na Aba wa Bwana wetu Jesu Kristo! Uyu atibarikie na baraka zose za kiroho za mlunguni kwa ngila ya Kristo.

⁴ Selyi kwenyi Mlungu atisaghule kutiwatanisa na Kristo kufuma kuumbo urumengu, eri tikale wa kuela sitewesi ikosa lyingi hambiri yake, kwa undu ghwa mashayo.

⁵ Naye Mlungu kwa mashayo ghake katisaghula kukala wana wake kwa ngila ya Jesu Kristo.

⁶ Kwa hung'u, timukase kwa mbazi yake atihawile bule kele Mwana wake mshayo.

⁷ Kwani kwa Kristo takombolo kwa bighati yake na kusigho kaung'a zetu, kuirimana na mbazi yake iyo mbwaa

⁸ iyi atihawile kwa ungi, kwa suku na kumanya kwake kose.

⁹ Mlungu katimanyisa kihambiri ivi vivisike kwa kushaya kwake mwenyi, selyi eshaile kudea kwa ngila ya Kristo kele ngelo yake.

¹⁰ Malagho agha oluo oghakatisa kwa ngelo yake aiikile, nagho ni kuwatanisa vindu vose mlunguni na isangeni, kwa ngila ya Kristo.

¹¹ Kwa undu ghwa Kristo, tanasaghulo kuirimana na kuona kwake Mlungu selyi eshaile kila kindu chikale.

¹² Kwa hung'u, isi tio wa hambiri wa ikosereo lya Kristo, yanatifweni tikase ubwaa ghwake.

¹³ Nenyo nanyose mughenda musikila uvoro ghwa fulo ghwa Ilagho Lyaloli lya ukizi ghwenyu, mukamudumusa Kristo, naye Mlungu kamkwita muhuri kwa kumujuza Roho wa Kuela etilagile.

¹⁴ Naye Roho watimanyisa tipatagha ghose Mlungu alagile wandu wake awakombole. Ubwaa ghwake ghukaso.

Ilombi lya Paulo

¹⁵ Kwa hung'u, nighenda nisikila gha idumusi lyenyu kwa Bwana Jesu Kristo, na selyi muwashaile wandu wa Mlungu,

¹⁶ sisighile kumukasa Mlungu na kumulombela,

¹⁷ eri Mlungu wa Bwana wetu Jesu Kristo, Aba wa ubwaa, amuhawe roho ya suku na kufunukulilo iye.

¹⁸ Nio nikelomba muhawo meso gheona mlangazi ghwake, eri mumanye ilyo ikosereo amupang'ilile, nako niko kujula kwa ubwaa ghwa ufwa ghwake kwa wandu wake,

¹⁹ na nini kujula kwa ubwaa ghwa ndighi zake kwetu isi tadumusa selyi kudeagha kazi za ndighi,

²⁰ uko niko akukatise kwa kumuzusa Kristo kufuma kwa wafwa na kumukalisa kitembo kele mkonu ghwake ghwa kijo mlunguni,

²¹ Aho Kristo watawala ighulu ya tawala zose na udimo ghose na ndighi zose, na izina lyake ni lya ighulu ya mazina ghose gheo kele ughu urumengu na ughu ghukujagha.

²² Vindu vose vanaikilo ni Mlungu isi ya maghulu ghake, na kamudea kukala chongo cha ikanisa na vindu vose.

²³ Ikanisa ni muli ghwa Kristo, kukata kwake iye akatisagha vindu vose andu kose.