Ufunuo 7 - UVORO GHWALOLI KWA WANDU WOSE

Wandu wa Israeli 144,000

¹ Nyuma ya agha nikaona wana malaika wane kimusi kele mbembe ine za isanga, wakazitangalila mbeo ine eri sizakwite kele isanga ango bahari ango kele mwiti ghungi.

² Nao nikamwona malaika mzima kejoka kufuma andu ijua lyifumagha ewo na muhuri ghwa Mlungu ewo moyo. Kawapanga na lwaka lubwaa walye wana malaika wane wahawilo ndighi ni Mlungu zehakila isanga na bahari,

³ kawauza, “Simwahakile isanga, bahari ango miti, mpaka tiwaike watumishi wa Mlungu wetu muhuri kele maushu ghawe.”

⁴ Nao nikasikila isabu lya walye waikilo muhuri ghwa Mlungu kele maushu ghawe, wandu elfu ighana imojori na mirongo mine na ine wa kila mbari ya wana wa Israeli.

⁵ Mbari ya Juda wandu elfu ikumi na mbili; Mbari ya Rubini wandu elfu ikumi na mbili; Mbari ya Gadi wandu elfu ikumi na mbili;

⁶ Mbari ya Asheri wandu elfu ikumi na mbili; Mbari ya Naftali wandu elfu ikumi na mbili; Mbari ya Manase wandu elfu ikumi na mbili;

⁷ Mbari ya Simeoni wandu elfu ikumi na mbili; Mbari ya Lawi wandu elfu ikumi na mbili, Mbari ya Isakari wandu elfu ikumi na mbili;

⁸ Mbari ya Zabloni wandu elfu ikumi na mbili; Mbari ya Josefu wandu elfu ikumi na mbili; Mbari ya Benjamini wandu elfu ikumi na mbili.

Bonjo ya wandu wa kila mbari

⁹ Nyuma ya agha nikazighana na nikaona bonjo mbwaa ya wandu siwedimagha kutalika! Weluo wandu wa kufuma kila mbari, kichuku, isanga na kiteto, nawo wekalile kimusi hambiri ya kifumbi cha uzuri na Mwana wa Ng'onzi, weluo warwere nguo za mnyange na maghangachi mikonuni.

¹⁰ Wakakema na lwaka lubwaa: “Ukizi ghwetu ghweja kufuma kwa Mlungu wetu uyu akalagha kele kifumbi cha uzuri, na kufuma kwa Mwana wa Ng'onzi!”

¹¹ Malaika wose wakakala kimusi kuchimara kifumbi cha uzuri, na walye waghosi na vilya viumbo vine vio moyo, wakagwa hubu hambiri ya kifumbi cha uzuri na wakamtasa Mlungu,

¹² wekeghora, “Ameni! Makaso, ubwaa, suku, kufunya asanta, ishima, udimo na ndighi vikale kwa Mlungu wetu kwa kale na kale! Ameni.”

¹³ Nao mumoju wa walye waghosi kanikotela, “Ni wana ani awa warwara nguo za mnyange? Na wanafumile hiyo?”

¹⁴ Nikamtumbulila, “Simanyile Bwana, Uwe wamanya.” Naye kaniuza, “Awa ni walye wandu waitile kele matiriro mabwaa banana. Nawo wafula nguo zawe na kuzielesa na bighati ya Mwana wa Ng'onzi.

¹⁵ Na kwa undu ughu, wakala kimusi hambiri ya kifumbi cha uzuri cha Mlungu kumtumikila msenya na kiro kele hekalu yake. Naye uyu akalagha kele kifumbi cha uzuri, ujekalanya nawo na kuwalinda.

¹⁶ Hata siwejeona njala sena, ango kau; ango ijua hata mruke ghungi sighudimagha kuwaisha.

¹⁷ Kwani Mwana wa Ng'onzi uyu ewo ghati ya kifumbi cha uzuri, ukalagha mlisa wawe, naye ujewalongoza kele ndoo ya meji ghehawa umana. Naye Mlungu ujewaghila kila mbori kufuma kele meso ghawe.”