Ufunuo 6 - UVORO GHWALOLI KWA WANDU WOSE

Kuvunjo na kufungulo muhuri ni Mwana Ng'onzi

¹ Nao nikaona Mwana wa Ng'onzi kefungula muhuri ghwa hambiri ghwa ilya mihuri mfungate; na nikasikila mumoju wa vilya viumbo vine keghora na lwaka luo sa lwa mururumo, “Njuu.”

² Imi nikazighana na alyenyi koluo na farasi ya mnyange na uyu aijokagha owatile ndana, naye kahawo kofia ya kiuzuri. Naye kaghenda noko sa musimi kusima.

³ Nao Mwana wa Ng'onzi kafungula muhuri ghwa kaili, nemi nikasikila chilya kiumbo cha kaili chikeghora, “Njuu.”

⁴ Nao kukafuma farasi mzima wa ngundu. Uyu aijokagha kahawo ndighi zeleta uta isangeni, eri wandu waulaghane, kahawo lufu lubwaa.

⁵ Nao Mwana wa Ng'onzi kafungula muhuri ghwa katatu, nemi nikasikila kiumbo cha katatu chikeghora, “Njuu!” Nikazighana na alye koluo na farasi wa nyilu. Uyu aijokagha oluo awata mizani mili mkonuni kwake.

⁶ Nikasikila sa lwaka kufuma ghati ya vilya viumbo vine, lukeghamba, “Kilo mojori ya ngano kwa dinari na kilo ndatu za shayiri kwa dinari mojori. Ela swahakile mavuta na divei!”

⁷ Nao Mwana wa Ng'onzi kafungula muhuri ghwa kane; nemi nikasikila chilya kiumbe cha kane chikeghora, “Njuu”,

⁸ Nikazighana, na alyenyi koluo farasi wa ivuivu. Uyu aijokagha oluo keito kifwa, na andu kwa wazimu komwirime na nyuma. Nawo wehawilo ndighi ighulu ya robo mojori ya urumengu, kuulagha kwa ngila ya uta, njala, makongo na nyamandu za isakeni.

⁹ Nao Mwana wa Ng'onzi kafungula muhuri ghwa kasanu. Nikaona mwenimweni ya mazabahu roho za walye waulagho kwa undu ghwa kueresa ilagho lya Mlungu na kwa ushuhuda ghwawe.

¹⁰ Wakakema na lwaka lubwaa, “Ee Bwana wa Ndighi zose, Mweli na Mfulo! Ukalagha hata nini, nao ima utaghanye wandu wa urumengu kwa kuulagho kwetu?”

¹¹ Nao kila mumoju wawe kahawo nguo ya mnyange, nawo wakauzo wazumuwe kachache, hata isabu lya watumishi wambawe na wana wakwawe waulagho lyikate.

¹² Nao Mwana wa Ng'onzi kafungula muhuri ghwa katandatu. Anyalye kukakala musukosuko ghwa isanga mubwaa, na ijua lyikakala lya nyilu sa igunia na mwezi ghukakala ghwa ngundu kamare sa bighati.

¹³ Ndonde zikapotoka msangeni selyi matunda gha mtini maishi ghapotologho ni mbeo mbwaa.

¹⁴ Mlunguni kukalaghaya kukerighika sa mkombolodi; na kila mghondi na kisiwa chikaukiso andu kwake.

¹⁵ Nao wazuri wa isanga, watawala na majemadari, wazuri wa vindu na wandu wa ndighi, na wandu wazima wose, wasunyi na wakidina, wakakuvisa kele mbanga na mwenimweni ya mawe mighondini.

¹⁶ Wakaipang'a mighondi na mawe wakaiuza, “Tigwileni na mutivise kufuma kele meso gha uyu ewo kitembo kele kifumbi cha uzuri na kele hare ya Mwana wa Ng'onzi!

¹⁷ Kwani ijua ibwaa lyawe lya hare lyafika, na nani edimagha kulyirumaghia?”