Ufunuo 5 - UVORO GHWALOLI KWA WANDU WOSE

Chuo na Mwana wa Ng'onzi

¹ Nao nikaona chuo kele mkonu ghwa kijo ghwa uyu ekalile kitembo kele kifumbi cha uzuri; nacho chewandiko namweni na nashighati, nacho chefungilo na mihuri mfungate.

² Nao nikaona malaika ewo na ndighi keghora na lwaka lubwaa, “Nani efwanagha kuvunja mihuri na kuchifungula chuo?”

³ Ela sikowesi mundungi mlunguni ango msangeni ango msangeni na mweni edimile kuchifungula ango kuchizighana ko mweni.

⁴ Nao imi nikalila na ndighi kwa kukala mundungi saonekane afweni kufungula chuo ango kuchizighana ko mweni.

⁵ Nao mumoju wa Waghosi kaniuza, “Swalile, Lola! Shimba ya mbari ya Juda, mjukulu wa Daudi wakala msimi, naye wadima kuvunja mihuri mfungate na kuchifungula chuo.”

⁶ Nao nikaona Mwana wa Ng'onzi kekala kimusi ghati ya kifumbi cha uzuri chemariro ni vilya viumbo vine na waghosi. Mwana wa Ng'onzi owonekane sa aulagho. Naye oluo na mbembe mfungate na meso mfungate, nazo ni zilya roho mfungate za Mlungu zitumilo kele urumengu ghose.

⁷ Mwana wa Ng'onzi kaghenda, kausa chilya chuo kufuma mkonu ghwa kijo ghwa ulya ekalile kifumbi cha uzuri.

⁸ Naye aghenda awata chuo, vilya viumbo vine na walye waghosi mirongo mili na wane wakagwa hambiri ya Mwana wa Ng'onzi, kila mumoju oluo na zeze na bakuli ya zahabu ijule ubani, nagho ni malombi gha wandu wa Mlungu.

⁹ Nawo wakaimba lumbo luishi: “Uwe wanafweni wowusa chuo icho na kuivunja mihuri yake. Kwani uwe wanaulagho na kwa sadaka ya kifwa chako kwamughulila Mlungu wandu. Kufuma kele kila kiteto, kichuku na mbari.

¹⁰ Uwe wawadea wakale uzuri ghwa wakohani wemutumikila Mlungu wetu. Nawo wejetawala isanga.”

¹¹ Nao nikazighana, na nikasikila wana malaika maelfu na maelfu! Weluo kimusi wekechimara chilya kifumbi cha uzuri, vilya viumbe vine na walye waghosi mirongo mili na wane,

¹² wekeimba na lwaka lubwaa: “Mwana wa Ng'onzi ulya aulagho wanafweni, kupata nguma, uzuri, suku na ndighi ishima, ubwaa, na kuliko.”

¹³ Nao nikasikila viumbo vose mlunguni na urumenguni na urumengu ghuo na isi na naisi ya bahari, viumbo vose vio moyo, veluo vikeimba, “Kwake uyu akalagha kele kifumbi cha uzuri na kwa Mwana wa Ng'onzi, kukale makaso na ishima, ubwaa na nguma, kwa kale na kale.”

¹⁴ Na vilya viumbo vine vikatumbulila, “Ameni!” Na walye waghosi wakagwa hubu, wakatasa.