Ufunuo 4 - UVORO GHWALOLI KWA WANDU WOSE

Utasi ghwa mlunguni

¹ Nyuma ya agha, nikaona iwoni izima. Nanaonile mjango ghwa mlunguni ghwarughuka. Nao nikasikila lwaka lufwanane na lwaka lwa tarumbeta, lukaghora nemi lukaghamba, “Njuu aha ighulu nemi nijekuonyeza agha ghekalagha nyuma ya agha.”

² Ngelo iyo yenyi nikangilo ni Roho. Nikaona alye mlunguni kifumbi cha uzuri, na mundu mumoju achikalila.

³ Ushu ghwake ghong'alileng'alile sa almasi na iwe lya ngundu; na kuchimara chilya kifumbi cha uzuri koluo ndana ya mvula ing'alang'ala sa iwe lya rangi ya makumbo.

⁴ Kuchimara chilya kifumbi cha nguma girigo, koluo na vifumbi mirongo mili na vine va nguma vekalililo ni waghosi mirongo mili na wane warwere nguo za mnyange na kofia za uzuri za zahabu.

⁵ Kufuma kele chilya kifumbi cha uzuri nikaona nyufu za king'alang'ala na kusikila nywaka na mrurumo. Hambiri ya kifumbi cha uzuri koluo na vilimiko mfungate veluo vikewaka, ivi ni Roho mfungate za Mlungu.

⁶ Sena hambiri ya chilya kifumbi cha uzuri koluo na kindu sa bahari ya kilole, chielile sa iwe lya barafu. Na kuchimara chilya kifumbi cha uzuri gasi zose koluo na viumbo vine vio na meso hambiri na nanyuma.

⁷ Cha hambiri cheluo sa shimba, cha kaili cheluo sa njau, cha katatu cheluo na ushu sa ghwa mdamu, na cha kane cheluo sa nderi iburukagha.

⁸ Kila kimoju cha ivi viumbo vine cheluo na mabambato matandatu, navo vejule meso komweni na nashighati. Kiro na msenya siveluo vikezumua kuimba, “Mweli, Mweli, Mweli, ni Bwana Mlungu wa Ndighi zose, eluo, ewo, na ejeja.”

⁹ Ngelo yose viumbo vine viimbagha nyumbo za ubwaa na ishima na kukasa kwa uyu ewo kitembo kele kifumbi cha uzuri na etulagha kwa kale na kale,

¹⁰ walye waghosi mirongo mili na wane wagwa hambiri ya maghulu ghake na kumutasa. Waika kofia zawe za kiuzuri hambiri ya kifumbi cha uzuri na kughora,

¹¹ “Uwe Bwana na Mlungu wetu, wanafweni kupata ubwaa, ishima na ndighi. Kwani wanaumbile vindu vose, na kwa mashayo ghako vikapata kukala moyo.”